გზამკვლევი დამწყებთათვის მდგრადი მასპინძლობის შესახებ

ეკოლოგიური თვალსაზრისით პასუხისმგებლობიანი მიდგომა არა მხოლოდ გარემოსთვის, არამედ თქვენი მასპინძლობის ბიზნესისთვისაც იქნება სასარგებლო. 2019 წელს ეკოლოგიურად მდგრადი საცხოვრებლების ჯავშნების რაოდენობა, წინა წელთან შედარებით, 141 პროცენტით* გაიზარდა.

მასპინძლობისას ეკოლოგიური მდგრადობის ხარისხის ამაღლებაში რომ დაგეხმაროთ, ჩვენ მჭიდროდ ვთანამშრომლობთ გაეროში წამყვანი გარემოსდაცვითი ინსტანციის, გაეროს გარემოსდაცვითი პროგრამის, და მსოფლიოს მოწინავე გარემოსდაცვითი ორგანიზაციის, ბუნების მსოფლიო ფონდის, ექსპერტებთან. ამას გარდა, თავი მოვუყარეთ მსოფლიოს სხვადასხვა კუთხეში მცხოვრები იმ მასპინძლების რჩევებსაც, რომლებიც მარტივი, მაგრამ ეფექტური ნაბიჯებით ცდილობენ სამყაროს უკეთესობისკენ შეცვლას.

ქვემოთ შეიტყობთ, როგორ შექმნათ ეკოლოგიური თვალსაზრისით უფრო მდგრადი გარემო თქვენი სტუმრებისთვის.

საცხოვრებლის ენერგოეფექტურობის ამაღლება დაგეხმარებათ, შეამციროთ სხვადასხვა რესურსის მოხმარება, ხარჯები და ნახშირბადის ნაკვალევი. აი, რამდენიმე რჩევა:

• შეახსენეთ სტუმრებს, გამოაერთონ მოწყობილობები, როცა მათ არ იყენებენ: მობილური ტელეფონების მიერ მოხმარებული ელექტროენერგიის 50%‑მდე** მოდის დამტენებზე, რომლებიც მიერთებულია ქსელთან, როცა ისინი არ გამოიყენება.
• დაარეგულირეთ წყლის გამაცხელებელი: წყლის გაცხელების სტანდარტული ტემპერატურა, როგორც წესი, შეადგენს 60 გრადუსს ცელსიუსით, თუმცა მისი 48‑54 გრადუსამდე შემცირება ენერგიის დაზოგვაში დაგეხმარებათ.
• შეამოწმეთ ნათურები: მაქსიმალურად დაბალი სიმძლავრის ნათურების გამოყენება შეამცირებს თბოგამოყოფასა და ენერგომოხმარებას. ამასთან, ენერგოეფექტური ვარიანტები (მაგალითად, ფლუორესცენციური ან შუქდიოდური) ნაკლებ ენერგიას მოიხმარს და უფრო დიდხანს მუშაობს,** ვიდრე ვარვარის ნათურები.
• დაიცავით საცხოვრებელი ატმოსფერული მოვლენებისგან: იზრუნეთ კარებისა და ფანჯრების ჰერმეტიზებაზე, რომ დაზოგოთ თანხა გათბობასა და გაგრილებაზე.
• შეიძინეთ ჭკვიანი თერმოსტატები მართვის ავტომატიზებული საშუალებებით: Wi‑Fi კავშირის მხარდაჭერის მქონე თერმოსტატები საშუალებას მოგცემთ, საჭირო დროს დაარეგულიროთ ტემპერატურა (მაგალითად, დაბინავებამდე და სტუმრობის დასრულების შემდეგ).
• შეაფასეთ საცხოვრებელში არსებული ტექნიკა: როცა ახალი მოწყობილობების შეძენის დრო მოვა, შეეცადეთ, შეარჩიოთ ენერგოეფექტურობის მაღალი კლასის მქონე მოდელები.

მრავალჯერადი გამოყენების საწმენდი საშუალებები და სხვა პროდუქცია გარემოზე უარყოფითი ზემოქმედების შემცირების შესანიშნავი საშუალებაა. დაიხმარეთ შემდეგი რჩევები:

• უარი თქვით ერთჯერადი გამოყენების საწმენდ საშუალებებზე: ანა, სუპერმასპინძელი პემბრუკშირიდან (უელსი), ქაღალდის ერთჯერადი ხელსახოცების ნაცვლად, სამზარეულოში იყენებს მრავალჯერადი გამოყენების ღრუბლებსა და მიკროფიბრის ტილოებს.
• გამოიყენეთ გადამუშავებული ქაღალდისგან დამზადებული პროდუქცია: ქაღალდის პროდუქციის (მაგალითად, სახის ხელსახოცების ან ტუალეტის ქაღალდის) შერჩევისას უპირატესობა მიანიჭეთ იმ ვარიანტებს, რომლებიც 100%‑ით შედგება გადამუშავებული მასალისგან.
• შეამცირეთ აგრესიული ქიმიკატების გამოყენება: შეიძინეთ არატოქსიკური (ან ნაკლებტოქსიკური), ნატურალური ან ბიოხრწნადი შემადგენლობის მქონე პროდუქცია — მაგალითად, ჭურჭლის სარეცხი საშუალება, სარეცხი ფხვნილი, პირადი ჰიგიენის ნივთები და ა.შ. პასკალი, სუპერმასპინძელი ბორდოდან (საფრანგეთი), ადგილობრივ მაღაზიებში ყიდულობს ორგანულ საშუალებებს აბაზანისა და სხეულის კანის მოვლისთვის.
• გადადით ორგანული ქსოვილების გამოყენებაზე: როცა საწოლის თეთრეულისა და პირსახოცების გამოცვლის დრო მოვა, შეეცადეთ, ორგანული ქსოვილებისგან დამზადებული ნაწარმი შეარჩიოთ. ეს თავიდან აგაცილებთ პესტიციდებთან, ინსექტიციდებთან და იმ სხვა ტოქსიკურ ნივთიერებებთან კონტაქტს, რომლებიც საზიანოა ადამიანებისა და გარემოსთვის.

ვინაიდან სუფთა მტკნარი წყალი შეზღუდული რესურსია, მნიშვნელოვანია, თქვენ და თქვენმა სტუმრებმა გონივრულად ხარჯოთ ის, განსაკუთრებით იმის გათვალისწინებით, რომ კლიმატური კრიზისი გვალვების გახშირებას უწყობს ხელს. გთავაზობთ რამდენიმე სასარგებლო რჩევას წყლის ეკონომიისთვის:

• დაუტოვეთ სტუმრებს სამახსოვროები: შხაპის ერთი წუთით გათიშვას 4 ლიტრზე მეტი წყლის დაზოგვა შეუძლია.** ანტონელას, სუპერმასპინძელს მილანიდან (იტალია), სტუმრებისთვის ონკანებთან აქვს გაკრული შეხსენებები იმის შესახებ, რომ დაკეტონ წყალი, როცა კბილებს იხეხავენ. ამას გარდა, შეგიძლიათ ურჩიოთ სტუმრებს, ნაკლები დრო გაატარონ საშხაპეში.
• შეამოწმეთ, ხომ არ ჟონავს წყალი: უნიტაზების, ნიჟარების, აბაზანებისა და სხვა სანტექნიკური ნაწარმის რეგულარული დათვალიერება დაგეხმარებათ წყლის გაჟონვის შემთხვევების აღმოჩენაში. წყლის ჭკვიანი მრიცხველის მეშვეობით გააკონტროლებთ, რამდენი წყალი იხარჯება, უჩვეულო ხარჯვის შემთხვევაში კი გაფრთხილებას მიიღებთ — მაგალითად, თუ სამზარეულოში ონკანის გამორთვა დაგავიწყდებათ ან როცა ჭურჭლის სარეცხი მანქანა ჟონავს.
• გამოიყენეთ ენერგოეფექტური პარამეტრები და მოწყობილობები: სარეცხი მანქანები (მათ შორის, ჭურჭლის სარეცხი) ბევრ წყალს მოიხმარს. თუ ისინი არის საცხოვრებელში, ურჩიეთ სტუმრებს, გამოიყენონ რეცხვის სწრაფი და „ეკო“ რეჟიმები. ამასთან, როცა ტექნიკის გამოცვლის დრო მოვა, აირჩიეთ ის მოდელები, რომლებიც ნაკლებ ელექტროენერგიასა და წყალს მოიხმარს.
• დაამონტაჟეთ დაბალი ხარჯვის მქონე სანტექნიკა: წყლის ეკონომიაში, ასევე, დაგეხმარებათ ონკანები დაბალი ხარჯვით და უნიტაზები ორმაგი ჩარეცხვის მექანიზმით. მერიდიტს, სუპერმასპინძელს ტასმანიიდან (ავსტრალია), საცხოვრებელში დამონტაჟებული აქვს საშხაპის საგანგებო თავი, რომელიც წყლის ნაკადს იმგვარად ამცირებს, რომ კარგ წნევას ინარჩუნებს.

* ეფუძნება Airbnb‑ს შიდა მონაცემებს 2018 წლის აგვისტოდან 2019 წლის აგვისტომდე პერიოდში იმ საცხოვრებლებში დაბინავებათა წლიურ ზრდასთან დაკავშირებით, რომელთა სათაურები თუ აღწერილობები შეიცავდა კონკრეტულ საკვანძო სიტყვებს (ეკომეგობრული, ეკოლოგიური და ა.შ.).

** „ბუნების მსოფლიო ფონდის“ პუბლიკაციიდან „60 ღონისძიება პლანეტისთვის“, რომელიც 2021 წლის 5 მარტს გამოქვეყნდა

სტატიაში მოცემული ინფორმაცია, შესაძლოა, შეცვლილიყო მისი გამოქვეყნების შემდეგ.