მასპინძლობა მეტი ეკოლოგიური პასუხისმგებლობით: ერთი სუპერმასპინძლის ისტორია

სიტყვა „ეკოლოგიურად მდგრადი“ დამთრგუნველად ჟღერს, მაგრამ სინამდვილეში ის სულაც არ არის საშიში.

უბრალოდ, ჩვევები გამოვიმუშავე, რაც ნებისმიერ ადამიანს შეუძლია. კომპოსტირება ეკოლოგიურ მდგრადობასთან დაკავშირებული ჩვევაა და სავარაუდოდ, ამაზე ბევრი ადამიანი ფიქრობს. თუ ამას აკეთებთ, შესანიშნავია! მე ასე არ ვიქცევი. ნარჩენების შემცირება, ხელახლა გამოყენება და გადამუშავება უამრავი მარტივი მეთოდით არის შესაძლებელი, რაც დიდი ხარჯების გაღებასაც არ მოითხოვს.

საშრობი ბურთებით გაშრობის თითო ციკლზე 10-15 წუთი დავზოგე, ეს კი დიდი საქმეა, როცა ზედიზედ რამდენიმე ჯავშანი მაქვს. მათი გამოყენება ენერგიის მოხმარებასაც ამცირებს და ერთჯერადი საშრობი ტილოებისგან განსხვავებით, გარემოსაც არ აყენებს ზიანს. ნებისმიერ შემთხვევაში ზოგავთ თანხას.

მე ბევრ ძველებურ ნივთს ვიყენებ. რატომ უნდა შევიძინო მასობრივი წარმოების ახალი ნივთი, როდესაც უამრავი უნიკალური მეორადი საქონელია, რომელიც უფრო ხარისხიანიც არის და გამორჩეულიც? შესანიშნავი შედეგის მისაღებად ზოგჯერ სრულიად საკმარისია სკამის ბალიშის აღდგენა ან ლამპის აბაჟურის შეცვლა, რომელიც ავტოფარეხში იმტვერება.

ჩვენ სოფლად ვცხოვრობთ, ამიტომ სტუმრებს ხშირად ვუმასპინძლდები ადგილობრივი ფერმერების ხილითა თუ ბოსტნეულით. ამგვარად ადგილობრივებსაც ვეხმარებით და ნახშირბადის ნარჩენებსაც ვამცირებთ, რადგან საყიდლებზე შორს სიარული არ გვიწევს, სტუმრები კი კალიფორნიის ქალაქ ოქსნარდის სიმდიდრეს ეზიარებიან.

სახლი პლაჟზე ფერმერების ბაზრიდან ორი კვარტლის მოშორებითაა და მანქანით ხუთი წუთის სავალზეა, ამიტომ სტუმრებს მრავალჯერად ჩანთებს ვუტოვებ, რომ საყიდლებზე წასვლისას გამოადგეთ.

ჩვენ 50 ნაბიჯი გვაშორებს სისუფთავის მხრივ საუკეთესო შეფასების მქონე პლაჟს. სულ უფრო გახშირდა პლაჟზე ნაგვის დატოვების ფაქტები, რაც საბოლოო ჯამში ოკეანის დაბინძურებას იწვევს. მსურს, რომ ჩვენი სტუმრები ასე არ მოიქცნენ. სწორედ ამიტომ, მათ მრავალჯერად ჭიქებსა და საჭმლის შესანახ კონტეინერებს ვთავაზობთ.

ბევრი მასპინძელი სტუმრების სიამოვნებას ცდილობს, მაგალითად, ღვინოს სთავაზობს მათ, მაგრამ ვთვლი, რომ ეკოლოგიური პასუხისმგებლობით მასპინძლობა არანაკლებ გამოარჩევს მათ. ეკოლოგიური მდგრადობის პრაქტიკა არა მარტო პლანეტისთვის იქნება სასარგებლო, არამედ სტუმრებს შორისაც აამაღლებს ეკოლოგიურ პასუხისმგებლობას.

ჩვენ ვცდილობთ ზომიერების დაცვას. მიუხედავად იმისა, რომ ქსოვილის პირსახოცების გამოყენებით ქაღალდის გამოყენებას ვამცირებთ, ქაღალდის ხელსახოცს მაინც ვტოვებთ საცხოვრებელში, რითაც სტუმრებს არჩევანის საშუალებას ვაძლევთ. ამასთან, ჩვენ მხოლოდ იმ ხელსახოცებსა და ტუალეტის ქაღალდს ვიყენებთ, რომლებიც დამზადებულია ბამბუკისგან, გადამუშავებული ან PEFC‑ს („ტყეების სერტიფიცირების პროგრამის“) მიერ სერტიფიცირებული ქაღალდისგან.

ეკოლოგიური ნაგვის პარკი თეორიულად ძალიან კარგია, მაგრამ ჩემი გამოცდილებით, მცენარეულ მასალაზე დამზადებული პარკები ჟონავს და იხევა ნარჩენების ზოგიერთი ტიპისგან. სტუმრებთან მათ გამოყენებას ვერ გავრისკავ, რადგან არ ვიცი, რას ჩაყრიან ისინი. ჩვენი სამზარეულო მეოთხე სართულზეა, ამიტომ არ მინდა, პარკები მანამდე დაიშალოს, სანამ სტუმარი მათ პირველ სართულზე მდგარ ნაგვის ურნამდე ჩაიტანს. ნაგვის ბიოდეგრადირებადი პარკები ჩემს შემთხვევაში არ გამოდგება, მაგრამ შესანიშნავი იქნება, თუ თქვენ შეძლებთ მათ გამოყენებას.

სტუმრები ხშირად ტოვებენ შეფუთულ საკვებს, რომელიც შეგიძლიათ სურსათის ადგილობრივ ბანკებს შეწიროთ და ამით დაეხმაროთ მათ, ვისაც უჭირს. დიახ, სურსათის ბანკში საკვების მიტანა თვითონ მოგიწევთ, მაგრამ სამაგიეროდ კეთილ საქმეს გააკეთებთ.

წელს ჩემი მიზანია, Instagram‑ზე ჩემს გამომწერებს დავუმტკიცო, რომ ეს ყველაფერი შესაძლებელია და ეკოლოგიური პასუხისმგებლობის პრინციპებს უკავშირდება. იმედია, ეკოლოგიური პასუხისმგებლობის პრაქტიკას არა მარტო სტუმრები დააფასებენ, არამედ ჩვენი გამომწერი მასპინძლებიც მიხვდებიან, თუ როგორ აისახება ეკოლოგიური მდგრადობა მათ ყოველდღიურობაზე.

შემდეგი: როგორ ქმნიან Airbnb მასპინძლები ეკოლოგიურად მდგრად საცხოვრებლებს

სტატიაში მოცემული ინფორმაცია, შესაძლოა, შეცვლილიყო მისი გამოქვეყნების შემდეგ.