მასპინძლობისთვის ანაზღაურების მიღების წესი

ანაზღაურების მიღების პარამეტრების დაყენება Airbnb‑ზე რამდენიმე მარტივი ნაბიჯის გავლით შეგიძლიათ.

მასპინძლობისთვის კუთვნილი თანხის მიღების მეთოდს თავად ირჩევთ. ვარიანტების ხელმისაწვდომობა დამოკიდებულია თქვენს საცხოვრებელ ქვეყანაზე. ანაზღაურების მიღების მეთოდებში შედის:

• საბანკო ანგარიში
• სწრაფი ჩარიცხვა
• საერთაშორისო საბანკო გადარიცხვა
• წინასწარი გადახდის სადებეტო ბარათი Payoneer Mastercard
• PayPal
• Western Union

ანაზღაურების მიღების მეთოდების დასაყენებლად დაამატეთ ანაზღაურების მიღების მეთოდი — მასპინძლობისთვის გამოყენებული ანგარიშის პარამეტრებიდან გადადით ჯერ საგადახდო ოპერაციების სექციაზე, შემდეგ კი — ანაზღაურებაზე. თქვენ მიერ არჩეული მეთოდი გამოყენებული იქნება მომავალში მისაღები ყველა ანაზღაურებისთვის, სანამ მას არ შეცვლით.

სათანადო საგადასახადო დოკუმენტაცია რომ მოგიმზადოთ, შესაძლოა, გადასახადის გადამხდელის შესახებ ინფორმაციის მოწოდება დაგჭირდეთ. ზუსტად არ იცით, გეხებათ თუ არა აღნიშნული? შეიტყვეთ ვრცლად Airbnb‑ს მიერ მომზადებული საგადასახადო დოკუმენტების შესახებ.

სანამ ანაზღაურების მიღების მეთოდის დადასტურება მიმდინარეობს, მისი სტატუსი იქნება „მომლოდინე“. დადასტურებას, შესაძლოა, 10 დღემდე დასჭირდეს. აღნიშნული არ ეხება „სწრაფ ჩარიცხვას“ — ეს მეთოდი მომენტალურად დასტურდება.

ამა თუ იმ სტუმრობისთვის კუთვნილ თქვენს შემოსავალს რომ გაეცნოთ, კალენდრიდან აირჩიეთ თქვენთვის საინტერესო ჯავშანი. ამის შემდეგ გადადით ოდნავ ქვემოთ, სადაც მოცემული იქნება:

• ფასი სტუმრობის ერთ ღამეზე;
• დასუფთავების, შინაური ცხოველების ან თქვენ მიერ დაწესებული სხვა არასავალდებულო გადასახადები (ასეთის არსებობის შემთხვევაში);
• ბინადრობის გადასახადები;
• Airbnb‑ს მომსახურების გადასახადები;
• თანამასპინძლის კუთვნილი ანაზღაურება (თუ დაყენებული გაქვთ);
• თქვენი ჯამური ანაზღაურება.

გადასახადები საშუალებას აძლევს Airbnb‑ს, მასპინძლობაში დასახმარებლად შემოგთავაზოთ სხვადასხვა პროდუქტი თუ მომსახურება — მაგალითად, მომხმარებელთა მხარდაჭერის სადღეღამისო სამსახური. შეიტყვეთ ვრცლად Airbnb‑ს მომსახურების გადასახადების შესახებ.

თუ თქვენი ანაზღაურება მოსალოდნელზე ნაკლებია, ამის მიზეზი შეიძლება იყოს თქვენ მიერ დაწესებული ფასდაკლებები ან ჯავშნის გაუქმება/ცვლილება. ანაზღაურების მიღების ზოგიერთი მეთოდით სარგებლობისთვის, შესაძლოა, გარკვეული ოდენობის საკომისიოს გადახდაც იყოს საჭირო, თუმცა მათი უმეტესობის გამოყენება დამატებით გადასახადს არ ითვალისწინებს.

მასპინძლობისთვის კუთვნილი ანაზღაურება, როგორც წესი, გაიცემა სტუმრის დაბინავებიდან ერთი სამუშაო დღის განმავლობაში. არსებობს შემთხვევები, როცა თანხა გაიცემა სტუმრობის დასრულებიდან ერთი სამუშაო დღის განმავლობაში. მაგალითად, თუ:

• ახალბედა მასპინძელს არ დაუდასტურებია საცხოვრებლის ნამდვილობა;
• მასპინძელმა დაარღვია ჩვენი წესები, პირობები თუ სტანდარტები;
• Airbnb საფუძვლიანად ჩათვლის, რომ აუცილებელია თავისი პლატფორმის, მისი მომხმარებლების ან მესამე მხარეების დაცვა.

ამა თუ იმ ჯავშნისთვის კუთვნილი ანაზღაურების გაცემის ვადების გასაგებად გადადით შემოსავლის მართვის პანელზე. Airbnb‑ს მიერ თანხის გაცემის შემდეგ თქვენს ანგარიშზე მისი ასახვის ზუსტი დრო დამოკიდებულია ანაზღაურების მიღების მეთოდზე.

გთავაზობთ ინფორმაციას ანაზღაურების მიღების სხვადასხვა ხელმისაწვდომი მეთოდისა და ტრანსაქციების დამუშავების სტანდარტული ვადების შესახებ:

• სწრაფი ჩარიცხვა: მაქსიმუმ 30 წუთი;
• წინასწარი გადახდის სადებეტო ბარათი Payoneer Mastercard: მაქსიმუმ 24 საათი;
• PayPal: 1 სამუშაო დღე;
• Western Union: 1 სამუშაო დღე (შესაძლოა, განსხვავდებოდეს ქვეყნის ან რეგიონის მიხედვით);
• საბანკო გადარიცხვა: 3–5 სამუშაო დღე;
• საერთაშორისო საბანკო გადარიცხვა: 3–7 სამუშაო დღე.

28 ან მეტი ღამის ხანგრძლივობის ჯავშნების შემთხვევაში, Airbnb თქვენს კუთვნილ ანაზღაურებას ყოველთვიურად გასცემს. პირველი ნაწილი გაიცემა სტუმრის დაბინავებიდან ერთი სამუშაო დღის განმავლობაში. ზოგიერთ შემთხვევაში, მათ შორის, როცა ახალბედა მასპინძელს არ დაუდასტურებია საცხოვრებლის ნამდვილობა, პირველი ნაწილი გაიცემა სტუმრის დაბინავებიდან 28 დღეში.

შეიტყვეთ ვრცლად კუთვნილი თანხის მიღების შესახებ. თქვენი კუთვნილი ანაზღაურების სტატუსის შემოწმება ნებისმიერ დროს შეგიძლიათ შემოსავლის მართვის პანელიდან.