საცხოვრებლიდან გასვლის მარტივი და მკაფიო პროცედურა

საცხოვრებლიდან გასვლა სტუმრებისგან და მასპინძლებისგან მინიმალურ ძალისხმევას უნდა მოითხოვდეს. აქამდე მასპინძლებს დამოუკიდებლად უწევდათ სტუმრებისთვის საცხოვრებლიდან გასვლის დროისა და ისეთი სტანდარტული ამოცანების შესრულების შეხსენება, როგორიც არის, მაგალითად, შუქის გამორთვა ან გათბობის დაწევა.

თქვენგან მიღებული გამოხმაურებიდან შევიტყვეთ, რომ სტუმრებისთვის საცხოვრებლიდან გასვლასთან დაკავშირებული ინფორმაციის მიწოდების მარტივი ხერხი გჭირდებოდათ. სწორედ ამიტომ, ჩვენ მოგიმზადეთ სიახლეები, რომლებიც ამ კუთხით დაგეხმარებათ.

საცხოვრებლიდან გასვლის ინსტრუქციის დამატება ამიერიდან უშალოდ Airbnb‑ზე შეგიძლიათ — ზუსტად ისე, როგორც სახლის სტანდარტულ წესებს ამატებთ.

სწრაფად შექმენით საცხოვრებლიდან გასვლისას შესასრულებელი ამოცანების სია სტანდარტული ვარიანტების არჩევით. მაგალითად:

• გამოყენებული პირსახოცების შეგროვება
• ნაგვის გადაყრა
• ყველაფრის გამორთვა
• კარის დაკეტვა
• გასაღების დაბრუნება

თითოეულ ამოცანას შეგიძლიათ დეტალური ინფორმაცია დაურთოთ. მაგალითად, საშუალება გექნებათ, დაუზუსტოთ სტუმრებს, რომ ორგანული ნაგავი ერთ კონკრეტულ ურნაში ჩაყარონ, ხოლო ის, რაც გადამუშავებას ექვემდებარება — სხვა რომელიმე ურნაში. ამას გარდა, შეძლებთ კონკრეტულად თქვენ მიერ განთავსებული საცხოვრებლისთვის სპეციფიკური თხოვნების მითითებას — ვთქვათ, თუ სტუმრებმა გრილი გამოიყენეს, საცხოვრებლიდან გასვლამდე თავსახურის დახურვა რომ არ დაავიწყდეთ.

საცხოვრებლიდან გასვლის ინსტრუქციის გაცნობას სტუმრები შეძლებენ პირდაპირ „სტუმრობების“ ჩანართიდან Airbnb‑ზე. ინსტრუქცია ხელმისაწვდომი იქნება საცხოვრებლამდე მისასვლელ გზასთან, სახლის წესებთან, Wi‑Fi ქსელის ინფორმაციასთან და სხვა მნიშვნელოვან ცნობებთან ერთად. სახლის წესების მსგავსად, სტუმრობის მსურველებს საცხოვრებლიდან გასვლის ინსტრუქციის გაცნობა ჯავშნის გაფორმებამდე შეეძლებათ.

გახსოვდეთ: სტუმრები მოელიან, რომ საცხოვრებლიდან გასვლა მარტივი იქნება, ამიტომ მისი დასუფთავება არ უნდა დაავალოთ, თუმცა არც სტუმრებმა უნდა დატოვონ საცხოვრებელი ისეთ მდგომარეობაში, რომ საგულდაგულო დასუფთავება ან ღრმა წმენდა დაგჭრიდეთ. აღნიშნული მითითებულია სტუმრებისთვის მოქმედ ძირითად წესებში.

„ვცდილობთ, საცხოვრებლიდან გასვლის პროცედურა მაქსიმალურად მარტივი იყოს“, — აღნიშნავს კეშავი, მრჩეველ მასპინძელთა საბჭოს წევრი ნიუ‑დელიდან (ინდოეთი), და დასძენს: „დანარჩენზე დამლაგებელი იზრუნებს“.

სტუმრებს ავტომატურად შევახსენებთ საცხოვრებლიდან გასვლის დროს და შესაბამის მითითებებსაც მივაწვდით. სტუმრები თავიანთ მობილურ მოწყობილობაზე მიიღებენ push‑გაფრთხილებას, სტუმრობის დასრულების წინა დღეს, 17:00‑ზე (იმ სასაათო სარტყლის მიხედვით, რომელშიც იმყოფებიან).

აღნიშნული შეხსენების მისაღებად სტუმრებს სჭირდებათ Airbnb‑ს აპის ჩამოტვირთვა და push‑გაფრთხილებების ფუნქციის ჩართვა. საცხოვრებლიდან გასვლის შემდეგ სტუმრები ღილაკზე ერთი შეხებით ან დაწკაპუნებით შეძლებენ, შეგატყობინონ, რომ წავიდნენ.

სურვილისამებრ, შეგიძლიათ ხაზი გაუსვათ იმას, თუ რატომ არის მნიშვნელოვანი, დროულად გავიდნენ საცხოვრებლიდან. „სტუმრებს ვუხსნი, რომ 11 საათზე დამლაგებელი მოვა. ასე უკეთ ესმით, რატომ არის მნიშვნელოვანი საცხოვრებლიდან დროულად გასვლა“, — გვიზიარებს ჯო, სუპერმასპინძელი სან‑ფრანცისკოდან (აშშ).

ახალი ბარათები ინფორმაციით საცხოვრებლიდან გასვლის შესახებ საშუალებას გაძლევთ, მარტივად გაუზიაროთ სტუმრებს შესაბამისი ინფორმაცია. მოამზადეთ ინსტრუქცია, შემდეგ კი დაამატეთ ბარათი ინფორმაციით საცხოვრებლიდან გასვლის შესახებ მზა პასუხებს ან დაგეგმილ შეტყობინებებს. ბარათში მოცემული იქნება ბმული, რომელიც თქვენ მიერ მომზადებულ ინსტრუქციაზე გადავა.

მართალია, ერთი დღით ადრე Airbnb ავტომატურად შეახსენებს სტუმრებს საცხოვრებლიდან გასვლის მოახლოებას, თუმცა თავადაც შეგიძლიათ სხვა შეტყობინებების მომზადება. მაგალითად, დაგეგმეთ ისეთი შეტყობინების გაგზავნა, რომლითაც სტუმრებს საცხოვრებლიდან გასვლას შეახსენებთ და რომელსაც ისინი პირდაპირ Airbnb‑ზე, თავიანთ შემომავალ შეტყობინებებში მიიღებენ (იმ შემთხვევისთვის, თუ მათ არ აქვთ ჩამოტვირთული აპი და არც push‑გაფრთხილებები ჩართული).

საცხოვრებლიდან გასვლის შემდეგ სტუმრებს შეუძლიათ მასპინძლის შეფასება კომუნიკაციის კუთხით და იმის დაზუსტება, თუ რა მოეწონათ და რის გაუმჯობესებას ისურვებდნენ. მაგალითად, ზოგმა, შესაძლოა, აღნიშნოს „ზედმეტი მითითებები გასვლასთან დაკავშირებით“. თუ მასპინძელი ბევრ დაბალ შეფასებას მიიღებს არაადეკვატური ამოცანებისთვის, შესაბამისი განცხადება, შესაძლოა, წაიშალოს Airbnb‑დან.

სტუმრობა მთლიანობაში კვლავ ერთიდან ხუთამდე ვარსკვლავით შეფასდება. კონკრეტულ კატეგორიებში (მაგალითად, „კომუნიკაციის“ კუთხით) მიღებული შეფასება არ აისახება სუპერმასპინძლის სტატუსზე.

საცხოვრებლიდან გასვლასთან დაკავშირებული ახალი ფუნქციები შემოთავაზებულია Airbnb‑ს 2023 წლის ზაფხულის განახლების ფარგლებში, რომელიც მასპინძელთათვის 25 სიახლეს მოიცავს. მოითხოვეთ ადრეული წვდომა, რომ დღესვე დაიწყოთ ახალი ხელსაწყოებით სარგებლობა.

სტატიაში მოცემული ინფორმაცია, შესაძლოა, შეცვლილიყო მისი გამოქვეყნების შემდეგ.