Airbnb ოთახები: ახლებურად წარმოდგენილი ცალკე ოთახები

Airbnb‑ს შექმნის თავდაპირველი მიზანი იყო, მოგზაურებს საშუალება მისცემოდათ, ხელმისაწვდომ ფასად გაეთიათ ღამე სხვა ადამიანის საცხოვრებელში. მასპინძლები, რომლებიც სტუმრებს ცალკე ოთახებს სთავაზობდნენ, წლების მანძილზე ეხმარებოდნენ ადამიანებს ერთმანეთთან დაახლოებაში და აცნობდნენ მათ ახალ ადგილებს, სადაც ისინი თავს ადგილობრივივით იგრძნობდნენ.

არსებული ეკონომიკური პირობების გათვალისწინებით, დღეს ადამიანებს კვლავ სურთ, იმოგზაურონ ხელმისაწვდომ ფასად. პანდემიის დროს იზოლირებულ პირობებში გატარებული წლების შემდეგ მათ ახალი ნაცნობების შეძენა და ავთენტური შთაბეჭდილებების მიღება სწადიათ.

სწორედ ამიტომ, წარმოგიდგენთ Airbnb ოთახებს — ცალკე ოთახების ახალ კონცეფციას. ამ კუთხით შემდეგი სიახლეებია:

• მასპინძლების გაცნობითი ბარათები, რომლებიც სტუმრობის მსურველებს თქვენს წინასწარ გაცნობაში დაეხმარება;

• „ოთახების“ ახალი კატეგორია და სახეცვლილი საძიებო ფილტრები, რომ სტუმრობის მსურველებმა მარტივად იპოვონ ცალკე ოთახები;

• პირად სივრცესთან დაკავშირებული დეტალების მითითების შესაძლებლობა, რომ საცხოვრებელში ყველამ მყუდროდ იგრძნოს თავი.

სტუმრებისგან შევიტყვეთ, რომ ცალკე ოთახის დაჯავშნამდე სურდათ, სცოდნოდათ, ვისთან იქნებოდა სივრცე საზიარო. მასპინძლის გაცნობითი ბარათის მეშვეობით ამიერიდან უკეთ წარუდგენთ თავს სტუმრებს. ბარათზე მოცემული იქნება სხვადასხვა დეტალი თქვენი პროფილიდან როგორც ძიების შედეგებში, ისე განცხადების გვერდზე.

პირველი ცვლილება თქვენს პროფილის ფოტოს შეეხება: ამიერიდან ის განცხადების მთავარი ფოტოს კუთხეში იქნება წარმოდგენილი. მასზე შეხებით ან დაწკაპუნებით სტუმარი შეძლებს თქვენს გაცნობით ბარათზე გადასვლას და თქვენ მიერ მითითებული ინფორმაციის გაცნობას.

ბარათის ზედა ნაწილში მითითებული იქნება თქვენი სახელი, მასპინძლობის გამოცდილების ხანგრძლივობა, ვარსკვლავებით მიღებული შეფასება და რამდენიმე სტუმრის მიმოხილვა. ქვედა ნაწილში იქნება ახალი სექციები, რომელთა შევსებითაც სხვებს გაუზიარებთ დამატებით ინფორმაციას, მაგალითად, თქვენს საცხოვრებელ ადგილსა და ჰობის, შინაური ცხოველების სახელებს, სახალისო ფაქტებს ან რას სთავაზობთ სტუმრებს განსაკუთრებულს.

თუ გსურთ, შეცვალოთ ფოტო ან გააზიაროთ მეტი ინფორმაცია თქვენ შესახებ, ჩაასწორეთ თქვენი პროფილი. ამას გარდა, განახლდა მასპინძლის პროფილის ძველი სექციების ფორმატი, ამიტომ გადაამოწმეთ, სწორად არის თუ არა წარმოდგენილი თქვენი პროფესია, მდებარეობა და ენები, რომლებზეც საუბრობთ.

გაეცანით რჩევებს მასპინძლის გაცნობითი ბარათისთვის შესანიშნავი ფოტოს გადაღების შესახებ

სტუმრებს გაუმარტივდებათ თქვენი განცხადების პოვნა „ოთახების“ ახალი კატეგორიის მეშვეობით, რომელიც მთავარი გვერდის ზედა ნაწილში იქნება მოცემული. ცალკე ოთახების, მთლიანად შემოთავაზებული საცხოვრებლებისა და სხვა ვარიანტების შერჩევას ხელს შეუწყობს სახეცვლილი საძიებო ფილტრიც, სადაც მითითებული იქნება თითოეული ტიპის საცხოვრებლის საშუალო ფასი.

3 მაისიდან, „ოთახების“ კატეგორიაში რომ მოხვდეს საცხოვრებელი, ის უნდა აკმაყოფილებდეს ყველა შემდეგ კრიტერიუმს:

• სტუმარს უნდა ჰქონდეს ცალკე საძინებელი, რომელიც იკეტება კარით.

• სტუმარს უნდა ჰქონდეს საკუთარი ან საზიარო სააბაზანო.

• სტუმარს სარგებლობა უნდა შეეძლოს მინიმუმ ერთი საერთო დანიშნულების სივრცით, როგორიცაა, მაგალითად, სამზარეულო, მისაღები ოთახი ან უკანა ეზო.

• განცხადებაში მითითებული უნდა იყოს მასპინძლის ნამდვილი სახელი და არა კომპანიის ან სხვა რაიმე სახელი.

• საცხოვრებლის ან ოთახის ტიპად განცხადებაში მითითებული უნდა იყოს „ცალკე ოთახი“.

• ცალკე ოთახი არ უნდა იყოს საზიარო ოთახი, სასტუმროს ნომერი, კურორტი, კარავი, ავტოფურგონი, ცალკემდგომი ნაგებობა (მაგალითად, ბუნგალო უკანა ეზოში) ან სხვა ტიპის ობიექტი ამ სიიდან.

საცხოვრებლები, რომლებიც ზემოაღნიშნულ ახალ კრიტერიუმებს ვერ დააკმაყოფილებს, არ იქნება მითითებული „ოთახების“ სახით არც ძიების შედეგებში და არც გაცხადების გვერდზე. ამ შემთხვევაში გირჩევთ, საცხოვრებლისთვის აირჩიოთ სხვა ტიპი, ან ჩაასწოროთ განცხადება კრიტერიუმების დაცვით. თუ გსურთ, თქვენი განცხადება დაემატოს „ოთახების“ კატეგორიას ან წაიშალოს იქიდან, მიმართეთ მოთხოვნით გაერთიანების მხარდაჭერის გუნდს.

ცალკე ოთახების მაძიებელი სტუმრები ყურადღებას აქცევენ დეტალებს, რომლებიც მათ თავს კომფორტულად და დაცულად აგრძნობინებს. ამ ტიპის სტუმრებისთვის სწორი მოლოდინის შესაქმნელად თქვენი განცხადების ზედა ნაწილში გადავიტანეთ შემდეგი ინფორმაცია:

• აქვს თუ არა საკეტი საძინებლის კარს. სტუმრები მოელიან, რომ თავიანთ ოთახს ექნება საკეტი. თუ თქვენ მიერ შეთავაზებულ ცალკე ოთახს არ აქვს საკეტი, იზრუნეთ მის დამონტაჟებაზე.

• რა ტიპისაა სააბაზანო: ოთახშივე მდებარე, პირადი თუ საზიარო. სტუმრებისთვის აუცილებლად უნდა იყოს გათვალისწინებული სააბაზანო, რომელშიც არის ხელსაბანი, უნიტაზი და საშხაპე/აბაზანა. ამიერიდან განცხადებაშივე შეძლებთ მიუთითოთ, სტუმრების სააბაზანო საკუთარი და ოთახშივე მდებარეა, პირადი (ასეთ სააბაზანოში მოსახვედრად საჭიროა საზიარო სივრცის, მაგალითად, დერეფნის, გავლა) თუ სხვასთან საზიარო.

• სტუმრის გარდა სხვა ვინ იქნება საცხოვრებელში. სტუმრებს აინტერესებთ, დახვდებიან თუ არა საცხოვრებელში უცხო ადამიანები, მაგალითად, სხვა სტუმრები, მასპინძლის ოჯახის წევრები ან თანამაცხოვრებლები. სტუმრებს არასწორი წარმოდგენა რომ არ შეუქმნათ, განცხადებაშივე მიუთითეთ შესაბამისი დეტალები.

• რა ინტენსივობით იქნებით კონტაქტზე. სტუმრების ნაწილს მოსწონს მასპინძელთან ერთად დროის გატარება და მისგან რჩევების მიღება, რომ ადგილობრივის მსგავსად ცხოვრება გამოცადოს. ამერიდან საშუალება გაქვთ, წინასწარ მიუთითოთ, რა დროის დათმობა შეგიძლიათ სტუმართან პირისპირ კომუნიკაციისთვის.

აღნიშნული დეტალების გასაახლებლად გადადით თქვენი განცხადების „ოთახებისა და სივრცეების“ სექციაზე.

Airbnb ოთახები და 25 სიახლე მასპინძელთათვის არის Airbnb‑ს 2023 წლის ზაფხულის განახლების ნაწილი, რომელსაც ამ კვირაში შემოგთავაზებთ.