შემოთავაზებულ შედეგებზე წვდომისთვის გადადით წინ
    ეს კონტენტი თქვენ მიერ არჩეულ ენაზე მიუწვდომელია, ამიტომაც ამჟამად იმ ენაზე გთავაზობთ, რომელიც მასთან ყველაზე ახლოსაა.

    10 სასიკეთო საქმე დღესასწაულებზე და მათ შემდეგ

    ჩაერთეთ Airbnb‑ს საქველმოქმედო პროგრამებში — სიკეთე გადამდებია.
    ავტორი: Airbnb (13 ნოე, 2019)
    4-წუთიანი საკითხავი
    განახლების თარიღი: 21 აპრ, 2021

    ყველაზე მნიშვნელოვანი

    • დღესასწაულები შესანიშნავი საბაბია სასიკეთო საქმეებისთვის

      • Airbnb‑ს მეშვეობით შესაძლებელია საცხოვრებლის შეთავაზება გასაჭირში მყოფი ადამიანებისთვის, ჯავშნებიდან მიღებული შემოსავლის შემოწირულობის სახით გაღება და სოციალურ პროექტებში მონაწილეობა

      • შეიტყვეთ, როგორ ცვლიან სხვა მასპინძლები სამყაროს უკეთესობისკენ და თავად როგორ დაეხმაროთ ადგილობრივებს

        დღესასწაულები იდეალური პერიოდია დროის ოჯახთან და მეგობრებთან ერად გასატარებლად, თუმცა სასიკეთო საქმეებისთვისაც შესანიშნავი საბაბია. არ იცით, საიდან დაიწყოთ? გაეცანით Airbnb‑ს საქველმოქმედო პროგრამებს და შეიტყვეთ, როგორ ცვლიან სხვა მასპინძლები სამყაროს უკეთესობისკენ.

        1. გაუღეთ სახლის კარი გასაჭირში მყოფებს

        მსოფლიო მასშტაბით უკვე ათასობით გულუხვი მასპინძელი ჩაერთო პროგრამაში Open Homes, რომლის ფარგლებშიც შესაძლებელია დროებითი საცხოვრებლის შეთავაზება რთულ ვითარებაში აღმოჩენილი ადამიანებისთვის. ადამიანებს სხვადასხვა მიზეზით უწევთ საცხოვრებლის ძიება — მაგალითად, ზოგს სხვა ქალაქში სასწრაფო მკურნალობა ესაჭიროება, ლტოლვილებს — ფეხის ადგმა, არიან სტიქიით დაზარალებულებიც და სამაშველო სამსახურების მუშაკები, რომლებიც მათ ეხმარებიან. განურჩევლად იმისა, თუ ვის დახმარებას გადაწყვეტთ, იცოდეთ, რომ სამყაროს უკეთესობისკენ შეცვლაში დიდ წვლილს შეიტანთ. პროგრამაში ჩართვა.

        2. გაიღეთ მცირედი ყოველი მასპინძლობისას

        „ხელგაშლილი სამშაბათი“ ქველმოქმედების საერთაშორისო დღეა, რომელიც აშშ‑ში მადლიერების დღის მომდევნო სამშაბათს აღინიშნება. სწორედ მან გვიბიძგა, წამოგვეწყო შემოწირულობების პროგრამა, რომლის ფარგლებშიც მთელი წლის განმავლობაში შეგიძლიათ გაიღოთ კონკრეტული თანხა ჯავშნებიდან მიღებული შემოსავლიდან, რომ Open Homes‑თან მოთანამშრომლე არაკომერციულ ორგანიზაციებს დაეხმაროთ.

        თქვენ თავად წყვეტთ, რა პროცენტი გამოგექვითოთ თითოეული ანაზღაურებიდან შემოწირულობის სახით. გაღებული თანხა მთლიანად ჩაერიცხება არაკომერციულ ორგანიზაციებს, რომელთა თანამშრომლებიც დროებითი საცხოვრებლის პოვნაში ეხმარებიან რთულ ვითარებაში აღმოჩენილ ადამიანებს. ამჟამად ეს პროგრამა ხელმისაწვდომია მხოლოდ აშშ‑ში, მექსიკაში, ესპანეთში, იაპონიაში, ახალ ზელანდიაში, ტაილანდში, მალაიზიასა და შრი‑ლანკაში, თუმცა მის გაფართოებაზე უკვე ვმუშაობთ, ამიტომ დაელოდეთ სიახლეებს. შემოწირულობების გაღების დაწყება.

        3. გახდით სტუმარი სასიკეთო საქმისთვის

        მხარი დაუჭირეთ არაკომერციულ ორგანიზაციებს — მიიღეთ მონაწილეობა 700‑ზე მეტ სოციალურ პროექტში მთელი მსოფლიოს მასშტაბით. მაგალითად, შეგიძლიათ ეწვიოთ თუთიყუშთა ნაკრძალს ჰავაის კუნძულებზე, ჩაეწეროთ მოზაიკის მასტერკლასზე ვაშინგტონში (კოლუმბიის ოლქი), გაისეირნოთ ფემინისტებთან ერთად ლონდონში, დატკბეთ მზის ამოსვლით კანოედან მეხიკოში და სხვა. ამ ტიპის ღონისძიებების მასპინძლებს მომსახურების 20%‑იან გადასახადს არ ვაკისრებთ, ამიტომ თქვენ მიერ გადახდილი თანხა მთლიანად შესაბამის არაკომერციულ ორგანიზაციას გადაერიცხება. სოციალურ პროექტში მონაწილეობა.

        4. გაავრცელეთ ინფორმაცია

        თუ იცით არაკომერციული ორგანიზაცია, რომელსაც სტუმრებისთვის სოციალურ პროექტებში მონაწილეობის შეთავაზება სარგებელს მოუტანს, მოიწვიეთ ის ამ გვერდიდან, რომელზეც პროგრამის შესახებ დამატებითი ინფორმაციაა ხელმისაწვდომი.

        5. გააერთიანეთ ძალები სხვა მასპინძლებთან კეთილი მიზნებისთვის

        გაიცანით სხვა ადგილობრივი მასპინძლები — ჩაეწერეთ მასპინძელთა კლუბში და შექმენით მოხალისეთა გუნდი. მაგალითად, ახლახან მასპინძლებმა, ჩვენმა თანამშრომლებმა და არაკომერციული ორგანიზაციების წევრებმა მონაწილეობა მიიღეს Airbnb‑ს ყოველწლიურ მოხალისეობრივ ინიციატივაში სახელწოდებით „სიკეთის კვირეული“:

        • სევილიაში (ესპანეთი) მასპინძელთა კლუბი შეხვდა ფედერაციას, რომელიც მიგრანტებს ადგილობრივ ორგანიზაციებს აკავშირებს, და შეეცადა, ხელი შეეწყო იმ პროგრამების რეალიზებაში, რომლებიც განვითარებასა თუ თანასწორობის იდეების პოპულარიზაციაზეა ორიენტირებული.
        • კეიპტაუნში მასპინძელთა კლუბმა ადგილობრივ ორგანიზაციასთან თანამშრომლობით შეიმუშავა ექვსთვიანი გეგმა, რომელიც მიზნად ისახავდა იქაური Airbnb გაერთიანების წევრებს შორის პიროვნული მრავალფეროვნებისა და წინასწარგანწყობებისგან თავისუფალი დამოკიდებულების წახალისებას.
        • 2019 წელს, სისუფთავის საერთაშორისო დღის ფარგლებში, მასპინძელთა კლუბმა ნეაპოლში (იტალია) თავისი პირველი მოხალისეობრივი ღონისძიება გამართა და ქალაქის ისტორიული ცენტრი დაასუფთავა.

        6. გაუფრთხილდით პლანეტას

        მსოფლიოს გარშემო მცხოვრები მასპინძლები სხვადასხვა გზით ზრუნავენ გარემოზე — ზოგი პლაჟებს ასუფთავებს, ზოგი რესტავრაციას უტარებს ავეჯს, ზოგი კი სხვა ხერხს ირჩევს:

        • გამოიყენეთ რესტავრირებული ნივთები: „ავეჯს ქუჩაში ვპოულობ ან ოჯახებისგან ვყიდულობ, შემდეგ კი რესტავრაციას ვუკეთებ,“ — დელფინა პარიზიდან.
        • შეამცირეთ, გამოიყენეთ ხელახლა და გადაამუშავეთ: ბრაიანი ფელტჰემიდან (გაერთიანებული სამეფო) თანამშრომლობს Freecycle‑თან, ონლაინ‑სისტემასთან, რომელიც ცდილობს, ნივთები ნაგავსაყრელებზე მოხვედრისგან გადაარჩინოს და მათ მეორე სიცოცხლე აჩუქოს ახალ სახლში.
        • უარი თქვით პლასტიკზე: პლუეზეკში (საფრანგეთი) მოღვაწე მასპინძლები პიერინი და მაქსიმი თავად ამზადებენ მრავალჯერადი გამოყენების ნივთებს, მაგალითად, შესაფუთ ქაღალდს ფუტკრის ცვილისგან, რომ პლასტიკის მოხმარება შეამცირონ. საფრანგეთის ქალაქ სომიურში მცხოვრები სელინი კი პროდუქტებს ბითუმად ყიდულობს, თანაც საყიდლებზე ნაჭრის ჩანთებით, მრავალჯერადი გამოყენების კონტეინერებითა და ქილებით დადის.
        • დაასუფთავეთ გარემო: ლეტისია კანკუნიდან (მექსიკა) პლაჟებს ასუფთავებს, ასევე იქცევა ელენა პალამოსიდან (ესპანეთი): „ჩვენი პლაჟებიდან ყოველი დაბრუნებისას გადასაყრელად მომაქვს მინიმუმ ხუთი ნივთი: პარკები, სიგარეტის ნამწვები და ა.შ.“.

        7. დაეხმარეთ ადგილობრივებს

        აიღეთ მაგალითი მასპინძლებისგან, რომლებიც ცდილობენ, გააძლიერონ ადგილობრივი საზოგადოება და უფრო მრავალფეროვნად აქციონ:

        • დაეხმარეთ სკოლებს: „სკოლის ბიბლიოთეკას წიგნები გადავეცით, ბავშვებს კი წასახემსებლები დავურიგეთ,“ — ამბობს მარია ესპერანსა ბოგოტიდან (კოლუმბია).
        • იზრუნეთ ადგილობრივი ისტორიის შენარჩუნებაზე: ლინდა და რიჩარდი სან‑ანტონიოს დამცველთა საზოგადოებასთან თანამშრომლობენ და ისტორიულ შენობებს, ადგილებსა თუ ტეხასურ წეს‑ჩვეულებებს იცავენ.
        • გაწევრიანდით ადგილობრივ ორგანიზაციაში: ტილი და იუტა შტუტგარტიდან (გერმანია) ეხმარებიან ღვინის მწარმოებელთა და მებაღეთა ადგილობრივ ასოციაციას.

        8. დაიცავით ცხოველთა უფლებები

        მრავალი მასპინძელი ცხოველებსა და ფრინველებზე ზრუნავს:

        • ამოუდექით გვერდში ცხოველთა მაშველებს: ფედერიკო რონკი‑დეი-ლეჯონარიდან (იტალია) ცხოველთა თავშესაფარში მუშაობს მოხალისედ, სიბილა და ჰარი ჰამბურგიდან, ასევე, რალფი ინცელიდან (გერმანია) კი ცხოველთა თავშესაფრებს გადასცემენ ძველ პირსახოცებს, ზეწრებს და სხვა ნივთებს.
        • იბრძოლეთ ცხოველთა უფლებების დასაცავად: ალექსანდრა ლინკოლნიდან (კანადა) თანამოაზრეების გუნდთან ერთად ცდილობს, დაიცვას ცხოველთა უფლებები ესპანეთში და პატრონებისგან მიტოვებული ძაღლებისთვის ახალ საცხოვრებლებს ეძებს.
        • დაიცავით გადაშენების პირას მყოფი სახეობები: „ახალი ზელანდიის ბუნებრივი რესურსების დაცვის დეპარტამენტთან თანამშრომლობით ქვეყანაში ფრინველთა უიშვიათესი სახეობის, ავსტრალიური მეთოვლიის, გადარჩენას ვცდილობ. სულ 35 ცალიღა დარჩა. ჩვენ ვავრცელებთ ინფორმაციას, ვაკონტროლებთ ბუდეებს და მტაცებლებს ვიჭერთ,“ — ჰყვება რია ნორთლენდიდან (ახალი ზელანდია).

        9. შეიტანეთ ფიზიკური წვლილი

        ზოგიერთმა მასპინძელმა გასაჭირში მყოფი ადამიანების დახმარება გადაწყვიტა პირველადი საჭიროების ნივთების გადაცემის, საბავშვო ბაღების აშენებისა და სხვა მსგავსი სასიკეთო საქმეების მეშვეობით:

        • დაარიგეთ შემოწირული ნივთები: იუნი და ერიკი ჰავანიდან (კუბა) Airbnb სტუმრებთან ერთად დადიან ქალაქის ღარიბ უბნებში და ერთობლივად არიგებენ შეგროვებულ ტანსაცმელს, ფეხსაცმელს, წამლებს, სათამაშოებსა და პირველადი საჭიროების სხვა ნივთებს.
        • ებრძოლეთ შიმშილს: ანა და ხუანი ბარსელონის საკვების ბანკთან თანამშრომლობენ და ხელს უწყობენ მას შობის პერიოდში საკვების შეგროვების ყოველწლიური კამპანიის ორგანიზებაში.
        • მოიმარჯვეთ ჩაქუჩი: მარკომ ლიგურიიდან (იტალია) ააშენა საბავშვო ბაღი და ეხმარება ერთ‑ერთ საავადმყოფოს აფრიკაში.

        10. იზრუნეთ მოხუცებსა და ბავშვებზე

        სხვა მასპინძლების მსგავსად, თქვენც შეგიძლიათ შესთავაზოთ სხვებს თქვენი უნარები, მომსახურებები და დრო:

        • ასწავლეთ წერა‑კითხვა: „ბევრ ბავშვს არ აქვს ენობრივი უნარების განვითარების საშუალება, ამიტომ მათ ვეხმარებით,“ — კლარა პენსაკოლიდან (ფლორიდა)
        • გაატარეთ დრო გასაჭირში მყოფ ბავშვებთან: „ხშირად ვსტუმრობთ ბავშვებს, დაგვყავს კინოში, ვაჭმევთ, მოგვაქვს სათამაშოები, ასევე, მცირე თანხებითაც ვეხმარებით,“ — ამბობს გორდონი ლონდონიდან, რომელიც ეხმარება აივ‑ინფიცირებულ ბავშვთა თავშესაფარს კარაკასში, ვენესუელა
        • დაიმგზავრეთ ვინმე: „ავადმყოფებსა და მოხუცებს ყოველკვირეულად ვსტუმრობ, გადაადგილების შეზღუდვის მქონე ადამიანებს ტრანსპორტს ვთავაზობ,“ — გვიყვება მონიკა, რომელიც ვენაში ცხოვრობს

        ვიმედოვნებთ, რომ ეს ისტორიები დაგეხმარებათ, გადაწყვიტოთ, როგორ დაეხმაროთ ადგილობრივებს როგორც დღესასწაულებზე, ისე სხვა დღეებში. არ დაგავიწყდეთ სტუმრების წამოყვანაც!

        სტატიაში მოცემული ინფორმაცია, შესაძლოა, შეცვლილიყო მისი გამოქვეყნების შემდეგ.

        ყველაზე მნიშვნელოვანი

        • დღესასწაულები შესანიშნავი საბაბია სასიკეთო საქმეებისთვის

          • Airbnb‑ს მეშვეობით შესაძლებელია საცხოვრებლის შეთავაზება გასაჭირში მყოფი ადამიანებისთვის, ჯავშნებიდან მიღებული შემოსავლის შემოწირულობის სახით გაღება და სოციალურ პროექტებში მონაწილეობა

          • შეიტყვეთ, როგორ ცვლიან სხვა მასპინძლები სამყაროს უკეთესობისკენ და თავად როგორ დაეხმაროთ ადგილობრივებს

            Airbnb
            13 ნოე, 2019
            სასარგებლო იყო?

            გაეცანით სხვა თემებს