მზა პასუხების გამოყენება დროის დაზოგვის მიზნით

უმეტეს შემთხვევაში, სტუმრები, რომლებიც Airbnb‑ზე წარმოდგენილ მომსახურებებს ჯავშნიან, ჯერ მასპინძელს წერენ. „შეტყობინებების“ ჩანართში წარმოდგენილი მზა პასუხები საშუალებას გაძლევთ, სწრაფად უპასუხოთ გავრცელებულ შეკითხვებს, განაწყოთ სტუმრობის მსურველები ჯავშნის გასაფორმებლად და, ზოგადად, უფრო ოპერატიულად წარმართოთ კომუნიკაცია.

მზა პასუხი გულისხმობს მოკლე, წინასწარ შედგენილ შეტყობინებას, რომელიც შაბლონის სახითაა შენახული თქვენს მიმოწერის პარამეტრებში.

ხელმისაწვდომია სხვადასხვა მონაცემის — მაგალითად, სტუმრის სახელის — შესავსებად განკუთვნილი ცვლადებიც, რომლებიც პერსონალურ ელფერს შესძენს თითოეულ შეტყობინებას. აღნიშნული მონაცემები მიიღება განცხადებაში ან ჯავშანში დაფიქსირებული ინფორმაციიდან.

შესაძლებელია როგორც საკუთარი მზა პასუხების შექმნა, ისე Airbnb‑ს მიერ მომსახურებათა გამწევი მასპინძლებისთვის მომზადებული შაბლონების გამოყენება. მაგალითად, თუ სტუმრობის მსურველებს ხშირად სცემთ მსგავს პასუხს თქვენს შეთავაზებასთან დაკავშირებით, შეინახეთ თქვენი სტანდარტული პასუხი მზა პასუხის სახით.

მზა პასუხების გამოყენება შესაძლებელია სტუმრებთან მიმოწერისას. ამას გარდა, შეგიძლიათ წინასწარ დაგეგმოთ, რომ ისინი ავტომატურად გაიგზავნოს მნიშვნელოვან ეტაპებზე.

სტუმრისთვის მზა პასუხის დაუყოვნებლივ გასაგზავნად:

• გადადით „შეტყობინებების“ ჩანართზე.
• აირჩიეთ მიმოწერა, რომელშიც გსურთ პასუხის გაცემა.
• შეტყობინების აკრეფის პუნქტთან აირჩიეთ პლუსის ნიშანი (+).
• აირჩიეთ მზა პასუხის გაგზავნა.
• აირჩიეთ მზა პასუხი, რომელიც მიმოწერაში გამოჩნდება.
• ჩაასწორეთ შეტყობინება, ან დატოვეთ ის უცვლელი სახით.
• შეტყობინების გასაგზავნად აირჩიეთ ისარი (↑).

„შეტყობინებების“ ჩანართში ხელმისაწვდომია შემოთავაზებული პასუხებიც. კერძოდ, ხელოვნური ინტელექტი ამოიცნობს სტუმრის შეკითხვას და შემოგთავაზებთ ერთ‑ერთ მზა პასუხს. შემოთავაზება აისახება მიმოწერაში და მას მხოლოდ თქვენ დაინახავთ. გაგზავნამდე შეძლებთ როგორც მზა პასუხის ჩასწორებას, ისე განსხვავებული შეტყობინების აკრეფას.

მზა პასუხი ავტომატურად რომ გაეგზავნოს ყველა სტუმარს:

• გადადით „შეტყობინებების“ ჩანართზე.
• აირჩიეთ პარამეტრების ხატულა ეკრანის ზედა ნაწილში.
• აირჩიეთ მზა პასუხების მართვა.
• აირჩიეთ მზა პასუხი, რომლის გაგზავნის დაგეგმვაც გსურთ, და — შემდეგი.
• აირჩიეთ დაგეგმვა შემდეგი დროისთვის: და ის, თუ როდის გსურთ, სტუმრებმა მიიღონ ეს კონკრეტული შეტყობინება (მაგალითად, ჯავშნის გაფორმებიდან 5 წუთში ან მომსახურების გაწევის დასრულებიდან 2 საათში).

როცა მზა პასუხის გაგზავნის დაგეგმილი დრო მოახლოვდება, სტუმართან მიმოწერაში შეხსენებას მიიღებთ. თქვენ საშუალება გექნებათ, ჩაასწოროთ შეტყობინება, ან გამოტოვოთ მისი გაგზავნა, თუ ის იმეორებს ინფორმაციას, რომელიც უკვე გაუზიარეთ სტუმარს.

უმჯობესია, თუ მზა პასუხები იქნება მოკლე და მხოლოდ ერთ საკითხზე კონცენტრირებული. მაგალითად, მზა პასუხში შეიძლება ახსნილი იყოს სტუმრისთვის დამატებითი ადამიანის დაპატიჟების ან განსაკუთრებული საჭიროების შესახებ შეტყობინების წესი, ანდა საგანგებო ვითარებაში სამოქმედო გეგმა.

სცადეთ მზა პასუხების გაგზავნის დაგეგმვა შემდეგი მნიშვნელოვანი ეტაპებისთვის:

ჯავშნის დადასტურება

დაურთეთ შეტყობინებას მისალმება და შეკითხვები, რომელთა მეშვეობითაც გაარკვევთ, როგორ მოარგოთ თქვენი შეთავაზებები სტუმართა საჭიროებებს. მაგალითად, ფოტოგრაფს შეუძლია იკითხოს:

• რასთან დაკავშირებით გსურთ ფოტოსესია? 
• რომელი კადრების აღბეჭდვაა თქვენთვის მნიშვნელოვანი?

თუ მომსახურებას თქვენი თანამასპინძელი გასწევს, ან ასისტენტი გახლდებათ თან, წარუდგინეთ ის სტუმრებს და აღნიშნეთ მისი კვალიფიკაცია.

მომსახურების გაწევამდე

შეახსენეთ სტუმრებს თქვენი მისვლის დრო და შეხვედრის ადგილი, ასევე, ურჩიეთ მათ, როგორ მიიღონ მაქსიმალური სარგებელი თქვენ მიერ შეთავაზებული მომსახურებიდან. მაგალითად, პირად ინსტრუქტორს შეუძლია გარე აქტივობებისა და სეზონური ამინდისთვის რეკომენდებული ტანსაცმლის მოკლე ჩამონათვალის დართვა.

მომსახურების გაწევის შემდეგ

გადაუხადეთ სტუმრებს მადლობა, რომ თქვენ აგირჩიეს. შეახსენეთ მათ, დაგიტოვონ საჯარო მიმოხილვა, რომელიც დაეხმარება სტუმრობის სხვა მსურველებს, გადაწყვიტონ, რამდენად შეესაბამება თქვენ მიერ გაწეული მომსახურება მათ საჭიროებებს. აღნიშნეთ ისიც, რომ მიესალმებით ნებისმიერი ტიპის გამოხმაურებას, მათ შორის, იმის შესახებ, თუ რის გაუმჯობესება შეიძლებოდა და როგორ.

მზა პასუხებისთვის შესაძლებელია ფოტოებისა და ვიდეოების დართვა. აღნიშნული დაგეხმარებათ სტუმრებისთვის თქვენი თავის წარდგენაში, ინდივიდუალური შეთავაზებების მომზადებასა და მათთან ერთად გატარებული დროის სამახსოვრო კადრების გაზიარებაში. მაგალითად, შეფმზარეულს შეუძლია მენიუს ნიმუშის ფოტოს გაგზავნა.

შეტყობინებისთვის ფაილების მიმაგრება ჯავშნის დადასტურების შემდეგ ნებისმიერ დროსაა შესაძლებელი. ფოტოები უნდა იყოს PNG‑ ან JPG‑ფორმატში (50 მბაიტამდე ზომის), ხოლო ვიდეოები — MP4‑ ან MOV‑ფორმატში (100 მბაიტამდე ზომის და 60 წამამდე ხანგრძლივობის).

ხელსაწყოები და ფუნქციები, შესაძლოა, განსხვავდებოდეს მდებარეობის მიხედვით. სტატიაში მოცემული ინფორმაცია, შესაძლოა, შეცვლილიყო მისი გამოქვეყნების შემდეგ.