მოლოდინის გადაჭარბების ხერხები
მაღალი შეფასებები და დადებითი მიმოხილვები, შესაძლოა, მეტი ჯავშნისა და შემოსავლის მიღებაში დაგეხმაროთ. გაითვალისწინეთ სტუმრებისგან მიღებული გამოხმაურება, რომ კიდევ უფრო მეტად დახვეწოთ თქვენი მომსახურების ხარისხი.
„ანალიტიკის“ სექციაში მოცემული იქნება როგორც თქვენი საერთო შეფასება, ისე საჯარო მიმოხილვები, პირადი კომენტარები და დეტალური შეფასებები სტუმარ-მასპინძლობის, მდებარეობის (შესაბამის შემთხვევებში), საიმედოობისა და ფასის ხარისხთან შეფარდების კუთხით.
სტუმარ‑მასპინძლობა
სტუმრებს მოსწონთ, როცა მათ მიმართ ზრუნვასა და ყურადღებას იჩენენ. შეეცადეთ, წინასწარ განვჭვრიტოთ მათი საჭიროებები და მაღალი დონის მომსახურება უზრუნველეყოთ.
- დაგეგმეთ მისასალმებელი შეტყობინების ავტომატური გაგზავნა. იზრუნეთ, რომ სტუმრებმა დროულად მიიღონ აუცილებელი ინფორმაცია. მაგალითად, ფოტოგრაფს შეუძლია ამინდის დეტალური პროგნოზისა და ტანსაცმელთან დაკავშირებული რეკომენდაციების გაზიარება.
- შეიტყვეთ მეტი თქვენი სტუმრების შესახებ. მიწერეთ სტუმრებს და დაინტერესდით მათი სურვილებითა თუ საჭიროებებით. ეს დაგეხმარებათ, უფრო ინდივიდუალური ელფერი შესძინოთ მომსახურებას. მაგალითად, საღონისძიებო მომსახურების მომწოდებელს შეუძლია, ჰკითხოს სტუმრებს, ხომ არ აქვთ რამეზე ალერგია ან მენიუში პატარ‑პატარა ცვლილებების შეტანის სურვილი.
- წარმოიდგინეთ თავი სტუმრის ადგილას. ზოგიერთი სტუმარი, შესაძლოა, პირველად იმყოფებოდეს თქვენს ქალაქში ან ქვეყანაში და, შესაბამისად, კარგად არ ერკვეოდეს ქუჩებსა თუ ადგილობრივ წეს‑ჩვეულებებში. შეეცადეთ, გაგებით მოეკიდოთ ამ საკითხს, ურთიერთობისას კი იყოს კეთილგანწყობილი.
- თან იქონიეთ დამატებითი ნივთები. სათანადოდ მოემზადეთ გაუთვალისწინებელი შემთხვევებისთვის, ვთქვათ, ხელსაწყოებისა თუ აღჭურვილობის დაზიანებისთვის ან სტუმრის გულმავიწყობისთვის. მაგალითად, პირად ინსტრუქტორს შეუძლია, რომ ყოველი შემთხვევისთვის თან იქონიოს იოგის სათადარიგო ხალიჩები.
- შეეხმიანეთ სტუმრებს მომსახურების გაწევის შემდეგ. მიწერეთ სტუმრებს, გადაუხადეთ მადლობა და განიხილეთ მომდევნო ეტაპები. მაგალითად, შეატყობინეთ, როდის იქნება მზად ფოტოები, ან გაუზიარეთ იმ კერძის რეცეპტი, რომელიც მათ განსაკუთრებით მოეწონათ.
მდებარეობა
თუ სტუმრებს მომსახურებას თქვენს დაწესებულებაში ან საჯარო სივრცეში სთავაზობთ, მათ მდებარეობის შეფასებასაც ვთხოვთ. მაგალითად, ესთეტისტს სახის კანის მოვლის პროცედურის ჩატარება შეუძლია საკუთარ სპა‑სალონში, ხოლო ფოტოგრაფს — ფოტოსესიის პარკში დაგეგმვა. სტუმრებს მოსწონთ მყუდრო, სუფთა ადგილები, რომლებიც სათანადოდაა აღჭურვილი.
- განსაკუთრებული ყურადღება მიაქციეთ სტუმრების კომფორტს. სუფთა და უსაფრთხო სივრცეში სტუმარი მომსახურებისგან მეტი სიამოვნების მიღებას შეძლებს. მაგალითად, მასაჟისტმა სპა‑სალონში ჰიგიენის მაღალი დონე უნდა უზრუნველყოს, რომ ღრმაქსოვილოვანი მასაჟის დროს სტუმარმა ბოლომდე მოშვება შეძლოს.
- დეტალურად აუხსენით სტუმრებს მოსასვლელი გზა. მკაფიოდ განუმარტეთ სტუმრებს, რა არის მოსალოდნელი მომსახურების გაწევის ადგილზე და კონკრეტულად სად შეხვდებით. დაფიქრდით, რა პრობლემები შეიძლება წარმოიშვას საპარკინგე ადგილებთან ან საზოგადოებრივ ტრანსპორტთან დაკავშირებით. თუ სტუმრებს საზიარო სივრცეში იღებთ, არ დაგავიწყდეთ იმის აღნიშვნაც, თუ როგორ მოგაგნონ. გაითვალისწინეთ ადაპტირებული პირობების საჭიროებაც. მაგალითად, ის, შესაძლებელია თუ არა ფოტოსესიის ადგილზე მოხვედრა შშმ პირთა ეტლით.
სტუმრებს არ ვთხოვთ მდებარეობასთან დაკავშირებით გამოხმაურებას, თუ მათ თავად აკითხავთ.
საიმედოობა
სტუმრები მასპინძლებისგან უზადო მომსახურებას მოელიან. ეს იმას ნიშნავს, რომ მათ მკაფიო წარმოდგენა უნდა შეუქმნათ ყველა კომპონენტის შესახებ, ასევე, დროულად შეეხმიანოთ და გამოიჩინოთ ორგანიზებულობა.
- სიზუსტე უპირველეს ყოვლისა. იზრუნეთ, რომ აღწერილობები და ფოტოები სრულად შეესაბამებოდეს იმას, რასაც სტუმრები რეალურად მიიღებენ. მაგალითად, თმის სტილისტს შეუძლია გამოყენებული პროდუქტებისა და ტექნიკის ხსენება, ასევე, იმ ვარცხნილობებისა და ნაწნავების ამსახველი ფოტოების ატვირთვა, რომელთა არჩევანსაც სთავაზობს სტუმრებს.
- იყავით კავშირზე. „განცხადებების“ ჩანართიდან მიუთითეთ სტანდარტული სამუშაო საათები, რომ სტუმრებმა იცოდნენ, როდის ხართ ხელმისაწვდომი. ჩართეთ გაფრთხილებების მიღება Airbnb‑ს აპისა და თქვენი მოწყობილობის პარამეტრებიდან, რომ მყისიერად იხილოთ სტუმრებისგან მიღებული შეტყობინებები და დროულად უპასუხოთ მათ.
- დაგეგმეთ ყველაფერი წინასწარ. საკმაო ხნით ადრე მოამზადეთ ყველაფერი აუცილებელი, რომ თავიდან აიცილოთ შეფერხებები და სხვა პრობლემები. მაგალითად, შეფმზარეულს წინასწარ შეუძლია ბოსტნეულის დაჭრა იმ წვნიანისთვის, რომლის მომზადებასაც ის სტუმრის საცხოვრებელში აპირებს.
- იყოლიეთ დამხმარეები. თუ დიდ ჯგუფს მასპინძლობთ ან სტუმრებს კომპლექსურ მომსახურებებს სთავაზობთ, ყველაფერთან მარტო გამკლავება, შესაძლოა, რთული იყოს. თუ მომსახურების გაწევისას თანაშემწე გახლდებათ თან, საკმაო ხნით ადრე შეატყობინეთ ამის შესახებ სტუმრებს, რომ მათ, სურვილის შემთხვევაში, გადასახადის გარეშე შეძლონ ჯავშნის გაუქმება.
- იყავით პუნქტუალური. თუ სტუმრებს თავად აკითხავთ, კარგად შეარჩიეთ მარშრუტი და გაითვალისწინეთ გზებზე არსებული მდგომარეობა.
- გაუფრთხილდით სხვის საკუთრებას. თუ მომსახურებას სხვის საცხოვრებელში უზრუნველყოფთ, დატოვეთ იქაურობა ზუსტად იმ მდგომარეობაში, როგორშიც დაგხვდათ.
ფასი/ხარისხი
სტუმრები ეძებენ მომსახურებებს, რომელთა ფასიც ხარისხის შესაბამისია. დაფიქრდით, როგორ აქციოთ თქვენი შეთავაზებები კიდევ უფრო განსაკუთრებულად, რომ სტუმრებმა მაქსიმალურად მაღალი ხარისხის მომსახურება მიიღონ გადახდილი თანხის სანაცვლოდ.
- მოამზადეთ რამდენიმე ვარიანტი. დაამატეთ მინიმუმ 3 შეთავაზება სხვადასხვა ფასად, რომ მეტი არჩევანი მისცეთ სტუმრობის მსურველებს და უფრო სწრაფად მიაღწიოთ შემოსავლის კუთხით დასახულ მიზნებს. უმჯობესია, თუ დაწესებული გექნებათ საწყისი, სტანდარტული და პრემიუმდონის ფასები. მაგალითად, აშშ‑ში მყოფ ფოტოგრაფს შეუძლია ჩაატაროს ნახევარსაათიანი ფოტოსესია, რომლის ღირებულებაც 50 აშშ დოლარზე ნაკლებია; პერსონალური პორტრეტების ფოტოსესია, რომლის ღირებულებაც 50 აშშ დოლარიდან 150 აშშ დოლარამდეა, ასევე, საოჯახო ფოტოგადაღება, რომლის ღირებულებაც 150 აშშ დოლარზე მეტია.
- მოარგეთ შეთავაზებები სტუმრების საჭიროებებს. Airbnb საშუალებას გაძლევთ, მიწეროთ სტუმრებს, გაარკვიოთ მათი სურვილები, შემდეგ კი ინდივიდუალური მომსახურებები და ფასები შესთავაზოთ მათ.
- უზრუნველყავით შესანიშნავი მომსახურება. გამოიყენეთ მაღალხარისხიანი მასალები და შეიტანეთ დამატებითი შტრიხები, რომ თქვენ მიერ გაწეული მომსახურება კიდევ უფრო განსაკუთრებულად აქციოთ. მაგალითად, ესთეტისტს შეუძლია, პროცედურის დასრულების შემდეგ სტუმარს ეთერზეთი აჩუქოს.
ყველა მასპინძელი, ფოტო და განცხადებაში მითითებული ცნობა უნდა პასუხობდეს Airbnb‑ზე წარმოდგენილი მომსახურებების მიმართ მოქმედ სტანდარტებსა და მოთხოვნებს.
სტატიაში მოცემული ინფორმაცია, შესაძლოა, შეცვლილიყო მისი გამოქვეყნების შემდეგ.