ბრწყინვალე მიმოხილვის მიღების ხერხები
შეფასებები და მიმოხილვები ქვეყნდება თქვენს განცხადებაში. სწორედ მათი მეშვეობით იგებენ სტუმრობის მსურველები, რამდენად შეესაბამება თქვენი მომსახურება მათ საჭიროებებს. სტუმრებისგან მიღებული დადებითი გამოხმაურება ხელს შეუწყობს არა მხოლოდ თქვენი ბრენდის განვითარებას Airbnb‑ს ფარგლებში, არამედ მეტი ჯავშნისა და შემოსავლის მიღებასაც.
მიმოხილვის პრინციპში გარკვევა
სტუმრებს მიმოხილვის დატოვებას მომსახურების დასრულებისთანავე ვთხოვთ. მათი მოსაზრებების გათვალისწინება დაგეხმარებათ უმაღლესი ხარისხის მომსახურების უზრუნველყოფაში. კერძოდ, სტუმრებს ვთხოვთ, დატოვონ:
- საერთო შეფასება. თქვენ მიერ გაწეულ მომსახურებას სტუმრები 1‑დან 5 ვარსკვლავამდე სკალით შეაფასებენ. საშუალო შეფასება შემდეგ აისახება როგორც თქვენს განცხადებაში, ისე ძიების შედეგებსა და თქვენს პროფილში.
- დეტალური შეფასებები. სტუმრები უფრო კონკრეტულ გამოხმაურებასაც მოგაწვდიან სტუმარ‑მასპინძლობის, საიმედოობისა და ფასის ხარისხთან შეფარდების ცალ‑ცალკე შეფასების გზით. თუ სტუმრებს მომსახურებას სთავაზობთ თქვენს დაწესებულებაში ან საჯარო სივრცეში (მაგალითად, თმის დავარცხნას თქვენს სალონში ან იოგის გაკვეთილს პლაჟზე), მათ მდებარეობის შეფასებასაც ვთხოვთ.
- საჯარო მიმოხილვა. ის აისახება როგორც თქვენს პროფილში, ისე თქვენი განცხადების „მიმოხილვების“ სექციაში. თუ საჯარო მიმოხილვაზე პასუხის გაცემას გადაწყვეტთ, ისიც საჯაროდ გამოქვეყნდება სტუმრის მიერ დატოვებული მიმოხილვის ქვეშ.
- პირადი კომენტარი. ამ ტიპის გამოხმაურება არ დაერთვება თქვენს განცხადებას — მის გაცნობას მხოლოდ თქვენ შეძლებთ.
პირველი 3 მიმოხილვის მიღების შემდეგ ჩვენ შემოგთავაზებთ ანალიტიკურ ინფორმაციას სტუმრებისგან მიღებული გამოხმაურების საფუძველზე. Airbnb‑ს აპში „ანალიტიკის“ სექციაზე გადასასვლელად ისარგებლეთ მენიუთი.
ხარისხზე კონცენტრირება
Airbnb‑ზე ხელმისაწვდომი სამასპინძლო ხელსაწყოები დაგეხმარებათ, გადააჭარბოთ სტუმრების მოლოდინს.
უზრუნველყავით შესანიშნავი მომსახურება. დაფიქრდით, როგორ შესძინონ პერსონალური ელფერი თქვენს შეთავაზებებს, რომ სტუმრებმა მათზე ზრუნვა იგრძნონ.
- ეკონტაქტეთ სტუმრებს „შეტყობინებების“ ჩანართიდან — ჰკითხეთ, რა ურჩევნიათ, ასევე, უპასუხეთ მათ შეკითხვებს, ან მოუმზადეთ ინდივიდუალური შეთავაზებები.
- ისარგებლეთ მზა პასუხების ფუნქციით, რომ მარტივად შეადგინოთ და გაგზავნოთ ხოლმე კონკრეტული შეტყობინებები ჯავშნის გაფორმებისა და მომსახურების გაწევის დასრულების შემდეგ.
- შეიტანეთ დამატებითი შტრიხები, რომ თქვენი შეთავაზება კიდევ უფრო განსაკუთრებულად აქციოთ.
იზრუნეთ უსიამოვნო სიურპრიზების აღკვეთაზე. მოახდინეთ თქვენი საიმედოობისა და მზაობის დემონსტრირება — დაეხმარეთ სტუმრებს სათანადო მოლოდინის შექმნაში, ასევე, ოპერატიულად უპასუხეთ მათ შეკითხვებს როგორც მომსახურების გაწევამდე, ისე ამის შემდეგ.
- დროულად მოიმარაგეთ ყველაფერი აუცილებელი, ხოლო თუკი სტუმარს თავად აკითხავთ, კარგად დაგეგმეთ მარშრუტი, რომ არ დააგვიანოთ. ისარგებლეთ Airbnb‑კალენდრით, რომ გამოყოთ გზისა და ჯავშნებს შორის მომზადებისთვის საჭირო დრო.
- წინასწარ დაგეგმეთ კონკრეტული შეტყობინებების კონკრეტულ დროს (მაგალითად, მომსახურების გაწევამდე ერთი დღით ადრე) ავტომატურად გაგზავნა, რომ სტუმრებმა იცოდნენ, რა ელით წინ.
- ჩართეთ გაფრთხილებების მიღება Airbnb‑ს აპისა და თქვენი მოწყობილობის პარამეტრებიდან, რომ არ გამოგრჩეთ მნიშვნელოვანი შეტყობინებები.
- თუ მომსახურებას სხვის საცხოვრებელში უზრუნველყოფთ, დატოვეთ იქაურობა ზუსტად იმ მდგომარეობაში, როგორშიც დაგხვდათ.
გაითვალისწინეთ ფასის შესაბამისობა ხარისხთან. მომსახურების ღირებულება კონკურენტუნარიანი უნდა იყოს. ფასებისა და ფასდაკლებების დაწესება „განცხადებების“ ჩანართიდან შეგიძლიათ.
- დაამატეთ მინიმუმ 3 შეთავაზება სხვადასხვა ფასად, რომ მეტი არჩევანი მისცეთ სტუმრობის მსურველებს და უფრო სწრაფად მიაღწიოთ შემოსავლის კუთხით დასახულ მიზნებს. უმჯობესია, თუ დაწესებული გექნებათ საწყისი, სტანდარტული და პრემიუმდონის ფასები.
- დაფიქრდით, ხომ არ ჯობს შედარებით დაბალი ფასით დაწყება და მისი გადახედვა, როცა Airbnb‑ზე დადებით შეფასებებსა და მიმოხილვებს დააგროვებთ.
- სტუმრობის მსურველები რომ დააინტერესოთ, დააწესეთ ფასდაკლებები კონკრეტულ პერიოდზე, ასევე, ადრეულ დაჯავშნაზე და დიდი ჯგუფებისთვის.
- მოიძიეთ თქვენის მსგავსი ადგილობრივი მომსახურებები Airbnb‑სა და სხვა პლატფორმებზე, კონკურენტუნარიან ფასზე რომ შეჯერდეთ.
სტუმარ‑მასპინძლობასთან დაკავშირებული ამ რჩევების გარდა, მხედველობაში იქონიეთ Airbnb‑ს ძირითადი წესები მასპინძლებისთვის და უსაფრთხოდ მასპინძლობასთან დაკავშირებული მითითებები. აღნიშნულ დოკუმენტებში განმარტებულია ძირითადი მოთხოვნები მომსახურებათა ხარისხისა და უსაფრთხოების მიმართ.
ყველა მასპინძელი, ფოტო და განცხადებაში მითითებული ცნობა უნდა პასუხობდეს Airbnb‑ზე წარმოდგენილი მომსახურებების მიმართ მოქმედ სტანდარტებსა და მოთხოვნებს.
სტატიაში მოცემული ინფორმაცია, შესაძლოა, შეცვლილიყო მისი გამოქვეყნების შემდეგ.