საცხოვრებლის შესანიშნავი ფოტოების გადაღება

საცხოვრებლის ხარისხიანი ფოტოები იპყრობს ყურადღებას, რეალისტურ მოლოდინს ქმნის და სტუმრობის მსურველებს ეჭვებს უქარწყლებს. სწორედ ამიტომ, ჩვენ მოგიმზადეთ რამდენიმე რჩევა საცხოვრებლისთვის ფოტოების გადაღებასთან დაკავშირებით.

სხვადასხვა დეტალის ამსახველი ფოტოებით სტუმრობის მსურველები უფრო მარტივად გადაწყვეტენ, რამდენად შეეფერება მათ თქვენ მიერ განთავსებული საცხოვრებელი. პირველ რიგში, მოაწესრიგეთ საცხოვრებელი სივრცე და დაგეგმეთ, რას და როგორ გადაუღებთ ფოტოებს.

• იზრუნეთ სისუფთავეზე და შეინახეთ ზედმეტი ნივთები. აჩვენეთ სტუმრობის მსურველებს ზუსტად ის, რაც მათ დაბინავებისას დახვდებათ. „თითქოს თავისთავად ცხადია, მაგრამ ბევრ ადამიანს ავიწყდება ზედმეტი ნივთების მოცილება ფოტოების გადაღების დაწყებამდე“, — ამბობს ჯეფი, ფოტოგრაფი და სუპერმასპინძელი ჯოშუა‑ტრიდან (კალიფორნია, აშშ).
• დაფიქრდით, რას გაუსვათ ხაზი. ყველაზე მეტად რა მოეწონებათ სტუმრებს საცხოვრებელში? წინასწარ რა უნდა იცოდნენ მათ, უსიამოვნო სიურპრიზები რომ არ დახვდეთ? ფოტოებზე შეგიძლიათ წარმოაჩინოთ საცხოვრებლის თავისებურებები, მოთხოვნადი საყოფაცხოვრებო ნივთები და ადაპტირებული პირობები.
• შეადგინეთ სია. დაგეგმეთ, რას აღბეჭდავთ ფოტოებზე და რომელი რაკურსებით გადაიღებთ იმ ოთახებსა და სივრცეებს, რომლებიც სტუმრების განკარგულებაში იქნება. მაგალითად, უკანა ეზოს ფოტოებზე შეგიძლიათ წარმოაჩინოთ მთლიანი ეზო, აუზი, პატიო შეზლონგებით ან ჭიშკრის საკეტი.
• იზრუნეთ საუკეთესო განათებაზე. რბილი ბუნებრივი განათება ფოტოებს სითბოსა და სიმყუდროვეს სძენს. შიდა სივრცეების ფოტოების გადაღება ჯობს იმ დროს, როცა ოთახებში დღის ყველაზე მეტი სინათლე შემოდის. გარეთ ფოტოების გადაღება უმჯობესია „ოქროს საათებში“ (მზის ამოსვლიდან ან მის ჩასვლამდე 60 წუთის განმავლობაში).
• დაფიქრდით პროფესიონალის დაქირავებაზე. მსოფლიოს ზოგიერთ ქალაქში Airbnb‑ს მეშვეობით შესაძლებელია პროფესიონალური ფოტოგადაღების მოთხოვნა.

საინტერესო ფოტოების გადაღება შესაძლებელია ნებისმიერი კამერით, მათ შორის, თქვენი სმარტფონით. გაეცანით ქვემოთ მოცემულ რჩევებს, Airbnb‑სთვის შესანიშნავი ფოტოები რომ გამოგივიდეთ.

• გამორთეთ ბლიცი. გახსენით ჟალუზები და სტანდარტული/საჩრდილობელი ფარდები. თუ ფოტოებს დღის მაქსიმალურ სინათლეზე იღებთ, ისინი კი მაინც ზედმეტად ბნელი გამოდის, ჩართეთ განათება.
• გადაიღეთ ჰორიზონტალური ფოტოები. ჰორიზონტალური კადრები ვერტიკალურს იმიტომ ჯობს, რომ განცხადების გვერდზე ფოტოები სწორედ ჰორიზონტალურადაა წარმოდგენილი, ძიების შედეგებში კი გამოსახულებები კვადრატული ფორმით იჭრება.
• მოაქციეთ მთავარი ობიექტი კადრის ცენტრში. საქმე რომ გაიმარტივოთ, ჩართეთ კამერაში ბადის ფუნქცია.
• გადაიღეთ კადრები სწორად. ნეიტრალური პოზიციიდან გადაღებული კადრები, ობიექტივის ზემოთ ან ქვემოთ დახრის გარეშე, სტუმრობის მსურველებს უფრო ცხადად წარმოუდგენს, როგორ გამოიყურება საცხოვრებელი სინამდვილეში.
• შეარჩიეთ ფოტოები. შეუხამეთ ერთმანეთს როგორც ფართო კუთხით, ისე საშუალო და ახლო მანძილებიდან გადაღებული კადრები, რომ ოთახებიც ჩანდეს მთლიანად და მცირე დეტალებიც.
• დაამუშავეთ ფოტოები. თითოეული ფოტოს სიკაშკაშის, კონტრასტულობისა და განათებულობის გასწორება შეგიძლიათ სხვადასხვა ხელსაწყოს მეშვეობით, მათ შორის, ტელეფონში არსებული ავტომატური დამუშავების ღილაკის საშუალებით. საჭიროებისამებრ, ხელით ჩამოჭერით, გაასწორეთ ან შეატრიალეთ კადრები.
• ატვირთეთ ფოტოები მაღალი გარჩევადობით. ყურადღება მიაქციეთ, რომ ფოტოების ზომა იყოს მინიმუმ 1200×800 პიქსელი. რაც უფრო დიდია ფაილი, მით უკეთესი (მაქსიმუმ 10 მეგაბაიტი).

ფოტოების ატვირთვის შემდეგ ისარგებლეთ „განცხადებების“ ჩანართში არსებული ხელსაწყოებით, რომლებიც საცხოვრებლის სათანადოდ წარმოჩენაში დაგეხმარებათ.

• შექმენით ფოტოტური. მისი შექმნისას ფოტოები ავტომატურად გადანაწილდება ოთახების მიხედვით, რაც დაეხმარება სტუმრობის მსურველებს, წარმოიდგინონ საცხოვრებლის განლაგება. სურვილისამებრ, ფოტოების გადაადგილებას, წაშლასა და დამატებას შეძლებთ.
• დაურთეთ დეტალური ცნობები თითოეული ოთახის შესახებ. მაგალითად, შეგიძლიათ აღნიშნოთ, რომ საძინებელში ძალიან დიდი ორადგილიანი საწოლია, ხოლო მისაღებ ოთახში მდგარი ტელევიზორი 55‑დუიმიანია. ამას გარდა, შეგიძლიათ დაურთოთ ინფორმაცია ამა თუ იმ ოთახში არსებული ადაპტირებული პირობების შესახებ.
• დაამატეთ ფოტოებს წარწერები. აღნიშნეთ ის, რაც ფოტოზე არ ჩანს, მაგრამ ზოგიერთი სტუმრისთვის მნიშვნელოვანია. მაგალითად, „სასადილო მაგიდა იშლება 10 ადამიანზე“.
• დააზუსტეთ თითოეული ოთახის მდებარეობა სართულების მიხედვით. დაურთეთ გარკვეული კონტექსტი, მაგალითად, „საძინებელი 1 მეორე სართულზეა და ცალკე სააბაზანო აქვს“.
• ხაზი გაუსვით საყოფაცხოვრებო პირობებსა და ნივთებს. მიიქციეთ სტუმრობის მსურველთა ყურადღება ისეთი ელემენტების მიმართ, რომლებიც მოთხოვნადია. მაგალითად, „საზიარო სამზარეულოში დაგხვდებათ ესპრესოს აპარატი, ელექტროჩაიდანი და მაცივარი, რომელსაც მხოლოდ სტუმრებისთვის განკუთვნილი თარო აქვს“. როცა ჩასწორებას დაასრულებთ, შეეხეთ „ჩვენების“ ღილაკს, განცხადების გადასახედ ვერსიას რომ გაეცნოთ.

როცა ჩასწორებას დაასრულებთ, შეეხეთ „ჩვენების“ ღილაკს, განცხადების გადასახედ ვერსიას რომ გაეცნოთ.

სტატიაში მოცემული ინფორმაცია, შესაძლოა, შეცვლილიყო მისი გამოქვეყნების შემდეგ.