სუპერმასპინძლის რჩევები ლგბტქ+ თემის წევრების მასპინძლობისთვის

ჩვენ ყოველთვიურად გაგიზიარებთ მრჩეველ მასპინძელთა საბჭოს სიახლეებს და გაგაცნობთ მის წევრებს.

გამარჯობა,

მე პიტერ კვანი ვარ, სუპერმასპინძელი სან‑ფრანცისკოდან და მრჩეველ მასპინძელთა საბჭოს წევრი. მასპინძლობა 10 წლის წინ დავიწყე და სწორედ იმ დროიდან ვემსახურები მასპინძლების გაერთიანებას, მათ შორის, ხანდაზმულებს, ლგბტქ+ თემის წევრებსა და სხვა ჯგუფებს, რომლებიც საზოგადოებაში ხშირად ყურადღების მიღმა რჩებიან.

პრაიდის პატივსაცემად, მიმდინარე თვის დასაწყისში, მონაწილეობა მივიღე Airbnb‑ს ღონისძიებაში „(ქვიარ‑) მასპინძლებთან ერთად ყველაფერი შესაძლებელია“. ქვიარ‑მასპინძლების ჯგუფთან ნაყოფიერი დისკუსია გაიმართა იმის შესახებ, თუ როგორ შეგვიძლია ლგბტქ+ თემის წევრ მასპინძლებს, დავეხმაროთ Airbnb‑ს შინაურობის განცდის დამკვიდრების საქმეში.

ქვემოთ გაგიზიარებთ, როგორ აგრძნობინოთ ლგბტქ+ თემის წევრ სტუმრებს თავი უფრო დაცულად, ასევე, მოგიყვებით, რა შემძინა მასპინძელთა ადგილობრივი გაერთიანების აქტიურმა წევრობამ.

მასპინძლებს ვურჩევ, ამა თუ იმ ფორმით აღწერილობაში მიუთითონ, რომ საცხოვრებელში დაცულად იგრძნობენ თავს ლგბტქ+ თემის წევრები. სან‑ფრანცისკოში ერთი და იმავე სქესის წყვილები ქუჩაში ხელიხელჩაკიდებული სეირნობენ და ეს არავის უკვირს, თუმცა სტუმრები, რომლებიც ხშირად განსხვავებული ნორმებისა თუ წესების მქონე ქვეყნებიდან ჩამოდიან, თავს უფრო კომფორტულად იგრძნობენ, თუ ამგვარ ინფორმაციას გააცნობთ.

თუ მასპინძელი სტუმრებს აცნობებს, რომ არა მხოლოდ ქალაქი, არამედ მათთვის შეთავაზებული საცხოვრებელიც უსაფრთხოა, ისინი თავს გაცილებით მშვიდად იგრძნობენ. სტუმრებმა წინასწარ უნდა იცოდნენ, რომ როცა იმავე სქესის პარტნიორთან ერთად გესტუმრებიან, სიამოვნებით მიიღებთ და თავს შინაურულად აგრძნობინებთ, Airbnb‑ს მისიის შესაბამისად.

სან‑ფრანცისკოში პირადად ვიცნობ ლგბტქ+ თემის წევრ მასპინძლებს, რომელთაც განცხადებაში დამატებული აქვთ ფოტო კუთხეში ცისარტყელას დროშით, აღწერილობაში კი საუბრობენ თავიანთ იდენტობასა და აქტივიზმზე.

ამას გარდა, შეგიძლიათ სხვადასხვა საინტერესო ხერხსაც მიმართოთ, ლგბტქ+ თემის წევრ სტუმრებს დაბინავებისას თავი უფრო კომფორტულად რომ აგრძნობინოთ. მაგალითად, კარგი იქნება, თუ შესთავაზებთ ქალაქის ქვიარ‑გზამკვლევებს და წიგნებს ლგბტქ+ თემის ისტორიის შესახებ. ეს უაღრესად მნიშვნელოვანია სტუმრებისთვის შინაურული გარემოს შესაქმნელად.

მასპინძლობის დაწყების შემდეგ გავაცნობიერე, რომ ადვილი არ იყო, მეპოვა პასუხები ჩემს ყველა შეკითხვაზე.

2012 წელს მასპინძელთა გაერთიანების მხარდაჭერის ჯგუფი შევქმენი და მას შემდეგ ყოველთვიურად ვიკრიბებით.

მასპინძლობისას შეიძლება თავი ძალიან მარტოდ იგრძნოთ, ამიტომ დამწყებებს ვურჩევ, გაწევრიანდნენ მასპინძელთა ადგილობრივ კლუბში, ან შექმნან ახალი, თუ ის ჯერ არ არსებობს. მასპინძლობაში წარმატების მისაღწევად ცდისა და შეცდომის მეთოდის გამოყენების ნაცვლად შეგიძლიათ ბევრი რამ სხვების გამოცდილებით ისწავლოთ, პარალელურად კი ახალი მეგობრებიც შეიძინოთ.

ძალიან მსიამოვნებს სხვა მასპინძლების დახმარება: მასპინძლობის საფუძვლებში (მაგალითად, პლატფორმაზე ნავიგაციის წესებში) მათი გარკვევა თუ ახალი ინფორმაციის გაზიარება. მასპინძელთა კლუბის შეხვედრებს ხშირად ესწრებიან Airbnb‑ს გუნდის წევრები, რომლებიც ახალი პროდუქტებისა და რეგულაციებში შეტანილი ცვლილებების შესახებ გვიყვებიან.

ხანდაზმულები არ არიან მაინცდამაინც წარმოდგენილი, როცა მასპინძელთა გაერთიანებაში ინკლუზიურობასა და პიროვნულ მრავალფეროვნებასთან დაკავშირებული საკითხები განიხილება, თუმცა ისინი ჩვენს ყურადღებას ნამდვილად იმსახურებენ.

აღმოვაჩინე, რომ აშშ‑ში ხანდაზმულები დამწყები Airbnb მასპინძლების ერთ‑ერთი ყველაზე სწრაფად მზარდი ჯგუფია, ხანდაზმული ქალი მასპინძლები კი მუდმივად საუკეთესო შეფასებებს იღებენ.*

მრჩეველ მასპინძელთა საბჭოში ჩემი ერთ‑ერთი მიზანი სწორედ ხანდაზმულების მიმართ საზოგადოების ყურადღების მიპყრობაა. მნიშვნელოვანია, რომ როცა Airbnb ამა თუ იმ პროდუქტს ქმნის, ჩვენი ინტერესებიც გათვალისწინებული იყოს.

ბოლო დროს ყველაზე მეტად მახარებს ქვეჯგუფი, რომელიც ხანდაზმული მასპინძლებისთვის შევქმენი. მას „ოქროს მასპინძლები“ (Golden Hosts) დავარქვი. მე ამერიკის პენსიონერთა ასოციაციის (AARP) ბარათის მატარებელი წევრი ვარ. თუ ამ ასოციაციის წევრობის უფლება გაქვთ, შეგიძლიათ „ოქროს მასპინძლების“ ჯგუფშიც გაწევრიანდეთ.

„ოქროს მასპინძლების“ ჯგუფი თანდათან იზრდება და ჩემთვის ყველაზე საყვარელი მასპინძლებიც ამჟამად სწორედ ამ ჯგუფში არიან. COVID‑19‑ის პანდემიამდე ერთმანეთს ყოველთვიურად სახლებშიც ვსტუმრობდით, ჩვენ‑ჩვენი კერძები მიგვქონდა და ერთად ვსადილობდით. კარგი დრო იყო.

კლუბში ხანდაზმულები ერთმანეთს მასპინძლობასთან დაკავშირებულ ინფორმაციას ვაწვდით. სხვა ჯგუფების მსგავსად, ჩვენც გვყავს წევრები, რომლებიც სწრაფად ითვისებენ ტექნოლოგიებსა თუ ციფრული სამყაროს მიღწევებს, და წევრები, რომლებსაც სპეციალური მომზადება ან მხარდაჭერა სჭირდებათ.

• მაისში მონაწილეობა მივიღეთ საერთაშორისო შეხვედრებში Airbnb მასპინძლებთან და ადგილობრივებს უკეთ გავაცანით საზოგადოებრივი ფონდის გრანტების ბენეფიციარი ორგანიზაციები
• გავმართეთ კონსულტაციები პიროვნული მრავალფეროვნებისა და შინაურობის განცდის ინიციატივებთან (მაგალითად, ადაპტირებულობის წესებთან) დაკავშირებით
• გავეცით რჩევები გაერთიანების მხარდაჭერასთან დაკავშირებით, მაგალითად, Airbnb‑ს დახმარების ცენტრის გაუმჯობესების თაობაზე

შეიტყვეთ ვრცლად მრჩეველ მასპინძელთა საბჭოს საქმიანობის შესახებ და დაელოდეთ ყოველთვიურ სიახლეებსა თუ რჩევებს საბჭოს წევრებისგან.

*ეფუძნება Airbnb‑ს ანგარიშს „60 წელზე უფროსი ასაკის ქალების მზარდი რაოდენობა Airbnb მასპინძელთა გაერთიანების რიგებში“