ფასების დაწესების ხელსაწყოები Airbnb‑ზე

Airbnb‑ზე არსებული ხელსაწყოების გამოყენებით ფასების დაწესება და კორექტირება მარტივია. ისინი ხელმისაწვდომია კალენდარში.

ფასების დაწესების ხელსაწყოები და ხელმისაწვდომობის პარამეტრები ხშირად ერთობლივად მუშაობს. თუ, ვთქვათ, ერთ თვეზე ფასდაკლების დაწესება გსურთ, შესაძლოა, დაგჭირდეთ დასაჯავშნად ხელმისაწვდომობის შეცვლა (ამ შემთხვევაში — შედარებით ხანგრძლივი სტუმრობების დაშვება).

ფასის რეგულარული გადახედვა და კორექტირება მასპინძლობის კუთხით დასახული მიზნების მიღწევაში შეგიწყობთ ხელს.

საბაზისო ფასის ჩასწორებას ნებისმიერ დროს შეძლებთ თქვენი განცხადების კალენდრიდან. ფასის შესაცვლელად რიცხვზე შეხებისას მითითებული იქნება როგორც სტუმრის მიერ გადასახდელი ფასი (უმოსაკრებლებოდ), ისე თქვენი კუთვნილი თანხა (მასპინძელთა მომსახურების გადასახადის ჩამოჭრის შემდეგ).

საბაზისო ფასის დარეგულირების კიდევ ორი ხერხი არსებობს.

• შაბათ‑კვირების ინდივიდუალური ფასი: პარასკევისა და შაბათის ღამეებისთვის შეგიძლიათ განსხვავებული ფასი განსაზღვროთ. ღამეების მიხედვით ფასის ცვლა მაქსიმალურად მეტი ჯავშნის მიღებაში შეგიწყობთ ხელს.
• გონივრული ფასწარმოქმნა: ეს ხელსაწყო, რომლის გააქტიურებაც ნებისმიერ დროს შეგიძლიათ, ავტომატურად განსაზღვრავს ფასებს ადგილობრივ დონეზე არსებული მოთხოვნის მიხედვით. ხელსაწყო ითვალისწინებს საცხოვრებელთან, რეგიონთან და სტუმრების ქცევასთან დაკავშირებულ ასობით სხვადასხვა ფაქტორს. სურვილისამებრ, შეძლებთ ერთ ღამეზე მინიმალური და მაქსიმალური ფასების დადგენასაც.

სტუმრობის მსურველთა დაინტერესების კიდევ ერთი ხერხია საბაზისო ფასზე პროცენტული ფასდაკლების დაწესება კონკრეტული ტიპის ჯავშნებისთვის. განცხადების კალენდარში ხელმისაწვდომია ქვემოთ აღნიშნული ოთხი ფასდაკლება.

• ერთ კვირაზე: მინიმუმ 7 ღამის ხანგრძლივობის ჯავშნებზე დაწესებული ფასდაკლებები, შესაძლოა, დაგეხმაროთ ძიების შედეგებში განცხადების პოზიციის გაუმჯობესებაში, კალენდრის შევსებასა და სტუმრების ხშირი ცვლით გამოწვეული საზრუნავის შემცირებაში. ერთ კვირაზე მინიმუმ 10%‑იანი ფასდაკლებები საგანგებოდ აღინიშნება. ფასდაკლებული ფასი მითითებული იქნება გადახაზული თავდაპირველი ფასის გვერდით.
• ერთ თვეზე: ამ ტიპის ფასდაკლება ვრცელდება მინიმუმ 28 ღამის ხანგრძლივობის ჯავშნებზე. ის, შესაძლოა, დაგეხმაროთ თქვენ მიერ განთავსებულ საცხოვრებლებში სტუმრობის საშუალო ხანგრძლივობის გაზრდაში (რაც, თავის მხრივ, თავიდან აგაცილებთ საცხოვრებლის ხშირი მომზადების საჭიროებას). ერთ თვეზე მინიმუმ 10%‑იანი ფასდაკლებებიც ანალოგიურად აღინიშნება.
• ადრეულ დაჯავშნაზე: ფასდაკლება გავრცელდება დაგეგმილ დაბინავებამდე 1‑24 თვით ადრე გაფორმებულ ჯავშნებზე და დაგეხმარებათ სტუმრობის იმ მსურველთა დაინტერესებაში, რომლებიც ყველაფერს წინასწარ გეგმავენ. ადრეულ დაჯავშნაზე მინიმუმ 3%‑იანი ფასდაკლებების შემთხვევაში, ძიების შედეგებსა და განცხადების გვერდზე განთავსდება სპეციალური აღნიშვნა.
• ბოლო წუთის: დაგეგმილ დაბინავებამდე 1‑28 დღით ადრე გაფორმებულ ჯავშნებზე ფასდაკლებების დაწესება ხელს შეგიწყობთ კალენდრის შევსებასა და მეტი შემოსავლის მიღებაში. 60 დღის მედიანურ ფასზე მინიმუმ 10%‑იანი ფასდაკლებების შემთხვევაში, ძიების შედეგებსა და განცხადების გვერდზე განთავსდება სპეციალური აღნიშვნა.

დროებითი ფასდაკლებების დაწესება დაგეხმარებათ, მეტი ჯავშანი მიიღოთ საბაზისო ფასის ცვლილების საჭიროების გარეშე. კრიტერიუმებთან შესაბამისობის მიხედვით, თქვენთვის დასაწესებლად, შესაძლოა, ხელმისაწვდომი იყოს ერთი ან ორი ტიპის პრომოაქცია.

• პრომოაქცია „ახალი განცხადება“: ახალგანთავსებული საცხოვრებლის პირველ სამ ჯავშანზე დაწესდება 20%‑იანი ფასდაკლება, პირველი ჯავშნები და მიმოხილვები უფრო სწრაფად რომ მიიღოთ.
• ინდივიდუალური პრომოაქცია: თავად აირჩიეთ თარიღები და ფასდაკლება, რომლის შეთავაზებაც გსურთ სტუმრების მსურველთათვის. ამ ტიპის პრომოაქციის დასაწესებლად უნდა აკმაყოფილებდეთ გარკვეულ მოთხოვნებს, მაგალითად, შესაბამისი საცხოვრებელი დაჯავშნილი უნდა იყოს, სულ მცირე, სამჯერ (მათ შორის, მინიმუმ ერთხელ გასული წლის განმავლობაში), თქვენ მიერ არჩეული თარიღები კი დასაჯავშნად ხელმისაწვდომი უნდა ყოფილიყო მინიმუმ 28 დღის განმავლობაში. მინიმუმ 15%‑იანი ფასდაკლებების შემთხვევაში, ძიების შედეგებსა და განცხადების გვერდზე განთავსდება სპეციალური აღნიშვნა.

ფასს შეგიძლიათ დაურთოთ სამი ტიპის გადასახადი. გახსოვდეთ, რომ გადასახადები ზრდის ჯამურ ფასს. თუ ჯამური ფასი ზედმეტად მაღალი აღმოჩნდება, სტუმრობის ზოგიერთმა მსურველმა, შესაძლოა, გადაიფიქროს ჯავშნის გაფორმება, რა შემთხვევაშიც ნაკლებ შემოსავალს მიიღებთ.

• დასუფთავების გადასახადი: ეს არის ერთჯერადი გადასახადი, რომელიც ზრდის ჯავშნის ჯამურ ფასს, ანგარიშსწორებისას კი ცალკე სტრიქონზე იქნება მითითებული. სურვილისამებრ, შეგიძლიათ დასუფთავების შედარებით დაბალი გადასახადი დააწესოთ 1-2 ღამით სტუმრობისთვის.
• შინაური ცხოველების გადასახადი: ამ გადასახადის დაწესება შეგიძლიათ თითო შინაურ ცხოველზე, ერთ ღამეზე ან ერთ სტუმრობაზე. დამხმარე ცხოველის შემთხვევაში სტუმრებს შინაური ცხოველების გადასახადს ვერ დააკისრებთ. ამას გარდა, მათ არ მოეთხოვებათ, ჯავშნის გაფორმებამდე შეატყობინონ მასპინძელს, რომ თან ახლდებათ დამხმარე ცხოველი. უფრო ვრცლად გაეცანით ადაპტირებულობასთან დაკავშირებით Airbnb‑ზე მოქმედ წესებს.
• დამატებითი სტუმრის გადასახადი: სურვილისამებრ, შეგიძლიათ დააწესოთ გადასახადი თითო ღამეზე ყოველი დამატებითი სტუმრისთვის, როცა მათი გარკვეული რაოდენობა უკვე მიღწეულია. მაგალითად, თუ ერთი ღამის საბაზისო ფასი ექვსი სტუმრის გათვალისწინებით გაქვთ დადგენილი, ყოველ დამატებით სტუმარზე (საცხოვრებელში მათი მაქსიმალური რაოდენობის მიღწევამდე) შეგიძლიათ პლუს 10 $ განსაზღვროთ.

ფასებსა და სხვა პარამეტრებს ყოველთვის თავად აკონტროლებთ. თქვენი შედეგები, შესაძლოა, განსხვავდებოდეს სხვა მასპინძლების შედეგებისგან.

სტატიაში მოცემული ინფორმაცია, შესაძლოა, შეცვლილიყო მისი გამოქვეყნების შემდეგ.