არასეზონისთვის მომზადების ექვსი ხერხი

მზად ხართ არასეზონისთვის? ამ სტატიაში გაგაცნობთ Airbnb‑ზე შემოთავაზებული ხელსაწყოების გამოყენების ექვს ხერხს, ჯავშნები ხელიდან რომ არ გაუშვათ მაშინაც კი, როცა სტუმრობის ცოტა მსურველია. აწონ‑დაწონეთ თითოეულის უპირატესობები და გადაწყვიტეთ, რომელი მათგანი გაამართლებს თქვენს შემთხვევაში.

სტუმრობის მინიმალური ხანგრძლივობის შემცირება მოკლე ვადით სტუმრობის მსურველთა დაინტერესებასა და კალენდრის შევსებაში დაგეხმარებათ არასეზონზე.

სტუმრობის მინიმალური ხანგრძლივობის განსაზღვრა იმის მიხედვითაც შეგიძლიათ, თუ კვირის რომელ დღეს იგეგმება დაბინავება. მაგალითად, თუ სტუმრობის მსურველების მხრიდან მოთხოვნა შაბათ‑კვირას უფრო მაღალია, შეგიძლიათ აირჩიოთ ერთი ღამით სტუმრობის დაშვება შუა კვირაში, მაგრამ არა პარასკევის ან შაბათის ღამის დაჯავშნის შემთხვევაში.

სტუმრობის მინიმალური ხანგრძლივობის შესამცირებლად:

• გადადით ხელმისაწვდომობის ჩანართზე თქვენი განცხადების კალენდარში.
• სტუმრობის ხანგრძლივობის სექციიდან შეხებით აირჩიეთ სტუმრობის მინიმალური ხანგრძლივობა (ღამე).
• ჩაასწორეთ სტუმრობის მინიმალური ხანგრძლივობა ღამეების იმ რაოდენობით, რომელიც გაწყობთ.

„როცა საცხოვრებელი მიყოლებით რვა ღამის განმავლობაშია ხელმისაწვდომი დასაჯავშნად, ამ პერიოდში შვიდღამიანი ჯავშნის მიღების ალბათობა დაბალია, ამიტომ სტუმრობის მინიმალურ ხანგრძლივობას ვამცირებ, რომ მეტმა მსურველმა იპოვოს ჩემი განცხადება“, — გვიზიარებს ფელისიტი, მრჩეველ მასპინძელთა საბჭოს წევრი და სუპერმასპინძელი ახალი სამხრეთ უელსიდან (ავსტრალია).

არასეზონზე შედარებით მეტი ჯავშანი რომ მიიღოთ, გირჩევთ, მაქსიმალურად შეამციროთ დრო, რომელიც გჭირდებათ ჯავშნის გაფორმებიდან სტუმრის დაბინავებამდე. სტუმრობის მსურველებს შეგიძლიათ ჯავშნის გაფორმების დღესვე დაბინავების საშუალებაც კი მისცეთ.

დაბინავებამდე განსაზღვრული დროის შესაცვლელად:

• გადადით ხელმისაწვდომობის ჩანართზე თქვენი განცხადების კალენდარში.
• გახსენით დრო დაბინავებამდე.
• აირჩიეთ დღეების საჭირო რაოდენობა.

სურვილისამებრ, შეგიძლიათ განსაზღვრულზე უფრო მოკლე დროში დაბინავების მოთხოვნების დაშვებაც. აღნიშნულ მოთხოვნებს ინდივიდუალურად გაეცნობით და შეძლებისდაგვარად დააკმაყოფილებთ.

„როცა სხვებს მსგავსი რამ დაშვებული არ აქვთ, ჩემი განცხადება მათ ფონზე გამოირჩევა“, — აღნიშნავს კარენი, სუპერმასპინძელი ნელსონიდან (ბრიტანეთის კოლუმბია, კანადა), და დასძენს: „სტუმრებს დამოუკიდებლად დაბინავების შესაძლებლობასაც ვთავაზობ, საცხოვრებლამდე მისასვლელი გზის შესახებ ინფორმაციას კი დაგეგმილი შეტყობინებების საშუალებით ვუზიარებ. ამგვარად, მზად ვარ იმ სტუმრების მისაღებად, რომლებიც დაბინავებამდე მოკლე დროში აფორმებენ ჯავშნებს“.

დაბინავების შესაძლო თარიღის მოახლოების პარალელურად ერთ ღამეზე ფასის შემცირებით უფრო დიდი ალბათობით დააინტერესებთ მათ, ვინც ბოლო წუთს დააპირებს სტუმრობას. ამისთვის დააწესეთ ფასდაკლება დაბინავებამდე 1‑28 დღით ადრე გაფორმებულ ჯავშნებზე, რაც, თავის მხრივ, კალენდრის შევსებასა და მეტი შემოსავალი მიღებაში შეგიწყობთ ხელს.

60 დღის მედიანურ ფასზე მინიმუმ 10%‑იანი ფასდაკლებების შემთხვევაში განცხადების გვერდსა და ძიების შედეგებში განთავსდება სპეციალური აღნიშვნა. ფასდაკლებული ფასი მითითებული იქნება გადახაზული თავდაპირველი ფასის გვერდით.

ბოლო წუთის ფასდაკლების დასაწესებლად:

• გადადით ფასების ჩანართზე თქვენი განცხადების კალენდარში.
• სექციაში ფასდაკლების სხვა ვარიანტები გახსენით ბოლო წუთის ფასდაკლებები.
• მიუთითეთ დღეების რაოდენობა დაბინავებამდე (1‑დან 28‑მდე).
• მიუთითეთ სასურველი პროცენტული ფასდაკლება.

„ფასი მაქსიმუმ 15%‑ით შეიძლება შევამცირო“, — ამბობს ჯიმი, სუპერმასპინძელი პალმ‑სპრინგზიდან (კალიფორნია, აშშ), და დასძენს: „ერთი კონკრეტული მინიმალური ფასი მაქვს, რომელზე დაბლაც არასოდეს ჩამოვდივარ. ამ შაბათ‑კვირას ჯავშანი მჭირდება, ამიტომ მზად ვარ, ფასი მინიმუმამდე დავიყვანო“.

გრძელვადიან სტუმრობებზე ფასდაკლებების დაწესება დაგეხმარებათ ძიების შედეგებში განცხადების პოზიციის გაუმჯობესებაში, კალენდრის შევსებასა და სტუმრების ხშირი ცვლით გამოწვეული საზრუნავის შემცირებაში. გირჩევთ, მინიმუმ 7 ღამის ხანგრძლივობის სტუმრობებზე დააწესოთ ფასდაკლებები ერთ კვირაზე, მინიმუმ 28 ღამის ხანგრძლივობის სტუმრობებზე კი — ფასდაკლებები ერთ თვეზე.

ერთ კვირაზე ან თვეზე მინიმუმ 10%‑იანი ფასდაკლებების შემთხვევაში განცხადების გვერდსა და ძიების შედეგებში განთავსდება სპეციალური აღნიშვნა. გრძელვადიან ჯავშნებზე დაწესებული ყველა ფასდაკლება, ასევე, გამოყოფილი იქნება ფასის დეტალიზაციაში, თავდაპირველი ფასის გვერდით.

ერთ კვირაზე ან თვეზე ფასდაკლების დასაწესებლად:

• სტუმრობის მინიმალური და მაქსიმალური ხანგრძლივობები ადგილობრივი წესებისა და რეგულაციების შესაბამისად უნდა განსაზღვროთ.
• თუ ერთ კვირაზე ან თვეზე ხანგრძლივი ჯავშნების მიღების უფლება გაქვთ, გადადით ფასების ჩანართზე თქვენი განცხადების კალენდარში.
• ერთ კვირაზე ან თვეზე ფასდაკლებების სექციაში განსაზღვრეთ პროცენტული ფასდაკლება და შეხებით აირჩიეთ შენახვა.

„ერთ კვირაზე ან თვეზე ფასდაკლების შეთავაზებით ნამდვილად მიიქცევთ სტუმრობის მეტი მსურველის ყურადღებას“, — აღნიშნავს ომარი, სუპერმასპინძელი მეხიკოდან (მექსიკა), და დასძენს: „ვამჩნევ, რომ სულ უფრო მეტი ადამიანი მსტუმრობს გრძელი ვადით, განსაკუთრებით, ციფრული მომთაბარეები“.

არასეზონზე პრომოაქციის ამოქმედება თქვენს განცხადებას უფრო შესამჩნევს გახდის ძიების შედეგებში და მეტი ჯავშნის მიღებაში შეგიწყობთ ხელს. მინიმუმ 15%‑იანი ფასდაკლებების შემთხვევაში განცხადების გვერდსა და ძიების შედეგებში განთავსდება სპეციალური აღნიშვნა.

ინდივიდუალური პრომოაქციის დასაწესებლად:

• გადადით ფასების ჩანართზე თქვენი განცხადების კალენდარში.
• აირჩიეთ თარიღები კალენდარში.
• დააწესეთ პროცენტული ფასდაკლება.

ინდივიდუალური პრომოაქციები მიუწვდომელია ზოგიერთი განცხადებისთვის. მის დასაწესებლად საჭიროა გარკვეული მოთხოვნების დაკმაყოფილება — კერძოდ, შესაბამისი საცხოვრებელი დაჯავშნილი უნდა იყოს, სულ მცირე, სამჯერ (მათ შორის, მინიმუმ ერთხელ გასული წლის განმავლობაში), თქვენ მიერ არჩეული თარიღები კი დასაჯავშნად ხელმისაწვდომი უნდა ყოფილიყო მინიმუმ 28 დღის განმავლობაში.

„პრომოაქციები საშუალებას მაძლევს, წინასწარ დავაწესო ფასი მომდევნო რამდენიმე თვეზე და ფასდაკლების შეთავაზების ვარიანტიც მქონდეს, თუ სტუმრობის მსურველები არ გამოჩნდებიან“, — ამბობს დანიელი, მრჩეველ მასპინძელთა საბჭოს წევრი ტენერიფედან (კანარის კუნძულები, ესპანეთი), და დასძენს: „ეს ხელსაწყო განსაკუთრებით მომწონს, რადგან თან მოთხოვნის დინამიკას ვაკვირდები, თან შესაძლებლობა მაქვს, შესაბამისად ვიმოქმედო“.

მსგავსი ახლომდებარე საცხოვრებლების ფასების შედარება კონკურენტუნარიანი ფასზე შეჯერებასა და შედარებით მეტი ჯავშნის მიღებაში დაგეხმარებათ არასეზონზე. თუ მათი ფასი თქვენ მიერ დაწესებულზე დაბალი აღმოჩნდება, შესაძლოა, ფასის შემცირებით მეტი სტუმარი დააინტერესოთ და ძიების შედეგებშიც გაუმჯობესდეს განცხადების პოზიცია.

თუ ყოველ ღამეზე ერთი და იგივე ფასი გაქვთ დაწესებული, შეგიძლიათ განასხვაოთ სამუშაო დღეებისა და შაბათ‑კვირების ფასები. ღამეების მიხედვით ფასის ცვლა მაქსიმალურად მეტი ჯავშნის მიღებაშიც შეგიწყობთ ხელს.

მსგავსი საცხოვრებლების შესადარებლად:

• გადადით ფასების ჩანართზე თქვენი განცხადების კალენდარში.
• აირჩიეთ 31 დღემდე დიაპაზონი.
• შეხებით აირჩიეთ მსგავსი საცხოვრებლების ჩვენება.

ამის შემდეგ გამოჩნდება თქვენი რეგიონის რუკა, რომელზეც მითითებული იქნება მსგავსი ახლომდებარე საცხოვრებლების საშუალო ფასები. რუკაზე არსებული ღილაკების მეშვეობით საშუალება გექნებათ, აირჩიოთ, რომელი საცხოვრებლები იყოს გათვალისწინებული — უკვე დაჯავშნილი თუ ჯერ კიდევ დაუჯავშნელი. საცხოვრებლების მსგავსებას განაპირობებს სხვადასხვა ფაქტორი — მაგალითად, მდებარეობა, ფართობი, თავისებურებები, საყოფაცხოვრებო პირობები, შეფასებები, მიმოხილვები და ის, თუ სხვა რომელ ვარიანტებს ეცნობიან სტუმრობის მსურველები თქვენი განცხადების პარალელურად.

„ჩემ მიერ განთავსებულის მსგავს საცხოვრებლებს ყოველთვის ვაკვირდები, ფასის კონკურენტუნარიანობაში დარწმუნებული რომ ვიყო“, — გვიზიარებს კეიტი კეი, მრჩეველ მასპინძელთა საბჭოს წევრი ლეიკ‑ეროუჰედიდან (კალიფორნია, აშშ), და დასძენს: „არასეზონზე განსაკუთრებით მნიშვნელოვანია მოქნილი პირობები, თუ ნამდვილად გსურთ სტუმრობის მსურველთა დაინტერესება“.

ფასებსა და სხვა პარამეტრებს ყოველთვის თავად აკონტროლებთ. თქვენი შედეგები, შესაძლოა, განსხვავდებოდეს სხვა მასპინძლების შედეგებისგან. 

ინტერვიუებში მონაწილეობისთვის მასპინძლებმა კომპენსაცია მიიღეს.

სტატიაში მოცემული ინფორმაცია, შესაძლოა, შეცვლილიყო მისი გამოქვეყნების შემდეგ.