Airbnb‑ს მომსახურების გადასახადების გამარტივება

ჩვენ ვამარტივებთ გადასახადის სტრუქტურას, რომ მასპინძლებს გაუადვილდეთ ფასების დაწესება. შეიტყვეთ, რა იცვლება და როგორ შეინარჩუნოთ ანაზღაურება უცვლელი სახით.

დღეს, ხშირ შემთხვევაში, მასპინძლებსაც და სტუმრებსაც ეკისრებათ მომსახურების გარკვეული გადასახადი. მართალია, ფასს თავად აწესებთ, მაგრამ სტუმრები მეტ თანხას იხდიან მომსახურების გადასახადის გამო.

27 ოქტომბრიდან მასპინძლები, რომლებიც ფასებს ობიექტების ან არხების მართვის პროგრამული უზრუნველყოფის გამოყენებით არეგულირებენ, გადავლენ ერთიანი გადასახადის სტრუქტურაზე, რომლის შემთხვევაშიც დაწესებული ფასი იქნება ზუსტად ის თანხა, რომელსაც სტუმრები დაინახავენ და გადაიხდიან. სტუმრების მიერ გადასახდელი თანხის ცოდნა კონკურენტუნარიანი ფასის დაწესებას გაგიმარტივებთ.

• გაყოფილი გადასახადი: დღესდღეობით, თქვენი კუთვნილი ანაზღაურების გამოსათვლელად, თქვენ მიერ დაწესებული ფასიდან იქვითება მასპინძელთა მომსახურების 3%‑იანი გადასახადი.* ამას გარდა, თქვენ მიერ განსაზღვრულ თანხასთან ერთად, სტუმრები იხდიან მომსახურების გადასახადსაც, რომელიც 14,1%‑დან 16,5%‑მდე მერყეობს. მაგალითად, თუ ფასად 100 აშშ დოლარს დააწესებთ, 97 აშშ დოლარი თქვენ გერგებათ, სტუმრებს კი დაახლოებით 115 აშშ დოლარის გადახდა მოუწევთ.
• ერთიანი გადასახადი: 27 ოქტომბრიდან თქვენი კუთვნილი ანაზღაურება გამოითვლება თქვენ მიერ დაწესებული ფასიდან მომსახურების 15,5%‑იანი გადასახადის გამოქვითვის საფუძველზე. ერთიანი გადასახადი წარმოადგენს საერთაშორისო მასშტაბით მოქმედი Airbnb‑ს მომსახურების გადასახადების საშუალო ოდენობას, რომელიც ამჟამად მასპინძლებსა და სტუმრებს შორის იყოფა. მაგალითად, ერთიანი გადასახადის შემთხვევაში, თუ ფასს ჩაასწორებთ და 115 აშშ დოლარს დააწესებთ, თქვენ 97,18 აშშ დოლარი გერგებათ, სტუმრებს კი ზუსტად 115 აშშ დოლარის გადახდა მოუწევთ.

ორივე შემთხვევაში ერთნაირია როგორც თქვენი კუთვნილი, ისე სტუმრების მიერ გადასახდელი თანხა.

დაფიქრდით, გსურთ თუ არა ფასებში რაიმე ცვლილების შეტანა გადასახადის ახალი სტრუქტურის გათვალისწინებით.

• ჩაასწორეთ ფასები: ამგვარად შეძლებთ, უწინდელ დონეზე შეინარჩუნოთ კუთვნილი ანაზღაურებისა და სტუმრების მიერ გადასახდელი თანხის ოდენობა. როგორც ზემოთ აღვნიშნეთ, თუ ფასს ჩაასწორებთ და 100 აშშ დოლარიდან 115 აშშ დოლარამდე გაზრდით, თქვენ 97,18 აშშ დოლარი გერგებათ, სტუმრებს კი ზუსტად 115 აშშ დოლარის გადახდა მოუწევთ.
• დატოვეთ ფასები უცვლელად: ამ შემთხვევაში ერთ ღამეზე ნაკლებ თანხას გამოიმუშავებთ და თქვენი სტუმრებიც ნაკლებს გადაიხდიან. მაგალითად, თუ თქვენ მიერ დაწესებული ფასი კვლავაც 100 აშშ დოლარი იქნება, თქვენ 84,50 აშშ დოლარი გერგებათ 15,5%‑იანი გადასახადის გამოქვითვის შემდეგ, სტუმრები კი ზუსტად 100 აშშ დოლარს გადაიხდიან.

თუ ფასების ჩასწორებას გადაწყვეტთ, ამის საშუალება 27 ოქტომბრიდან გექნებათ ობიექტების მართვის პროგრამული უზრუნველყოფის მეშვეობით. შემდეგ შეამოწმეთ როგორც პროგრამული უზრუნველყოფა, ისე თქვენ მიერ გამოყენებული პლატფორმები, რომ ფასები (ფასდაკლებებისა და პრომოაქციების გათვალისწინებით) ზუსტად იყოს ასახული ყველგან.

თუ ცვლილებების შეტანას 27 ოქტომბრამდე მოისურვებთ, ერთიან გადასახადზე გადასასვლელად ხელით უნდა შეცვალოთ გადასახადის სტრუქტურა Airbnb‑ზე თქვენი ანგარიშის „საგადახდო ოპერაციების“ სექციიდან.

მომსახურების გადასახადები საშუალებას აძლევს Airbnb‑ს, შემოგთავაზოთ სხვადასხვა პროდუქტი თუ მომსახურება, მაგალითად, საგადახდო ოპერაციების დამუშავების სისტემა, მარკეტინგული გადაწყვეტილებები და მომხმარებელთა მხარდაჭერის სამსახური. Airbnb‑ს მიერ ერთიანი გადასახადის სტრუქტურის შემოღება ფასების გამჭვირვალობის გაუმჯობესებას ემსახურება.

შეიტყვეთ ვრცლად Airbnb‑ს მომსახურების გადასახადების შესახებ.

* ზოგიერთს მეტის გადახდა უწევს, მათ შორის, მასპინძლებს, რომლებსაც იტალიასა და ბრაზილიაში აქვთ განთავსებული განცხადებები.

მომსახურების გადასახადი თქვენ მიერ ერთ ღამეზე დაწესებული ფასისა და სხვა გადასახადების (მაგალითად, დასუფთავების) პროცენტული წილია.

ზოგიერთ ქვეყანასა და რეგიონში ისედაც სავალდებულოა ჯამური ფასების ჩვენება ოფიციალური მოსაკრებლების გათვალისწინებით. ჯამური ფასი (ოფიციალური მოსაკრებლების ჩათვლით) ყოველთვის აისახება ანგარიშსწორებამდე.

სტატიაში მოცემული ინფორმაცია, შესაძლოა, შეცვლილიყო მისი გამოქვეყნების შემდეგ.