„შეტყობინებების“ ჩანართის მაქსიმალურად გამოყენება

„შეტყობინებების“ ჩანართი არის სივრცე, რომელშიც თავმოყრილია მასპინძლობასთან, სტუმრობასა თუ მხარდაჭერასთან დაკავშირებით Airbnb‑ს მეშვეობით მიღებული თქვენი ყველა შეტყობინება. „შეტყობინებების“ ჩანართში წარმოდგენილი ფუნქციების მეშვეობით შეგიძლიათ:

• შეტყობინებების გაფილტვრა და ძიება.
• შეტყობინებების (მათ შორის, წინასწარ შედგენილი შაბლონების, რომელთაც „მზა პასუხები“ ეწოდება) გაგზავნა და გაგზავნის დაგეგმვა.
• ჯავშანში დაფიქსირებულ ყველა სტუმართან ერთი მიმოწერის ფარგლებში კომუნიკაცია.
• პასუხების ჯაჭვის შექმნა, რომ მიმოწერები უფრო ორგანიზებულად გამოიყურებოდეს.
• გაგზავნილი შეტყობინებების ჩასწორება და გაუქმება.
• შეტყობინებათა წაკითხვის დადასტურების გააქტიურება, რომ გაარკვიოთ, წაიკითხეს თუ არა სტუმრებმა თქვენი შეტყობინებები.
• შეტყობინებებზე რეაქციის გამოხატვა სხვადასხვა ემოჯის გამოყენებით.

ნაგულისხმევად ნაჩვენები იქნება თქვენი ყველა შეტყობინება Airbnb‑ზე. შეტყობინებები ტიპის მიხედვით რომ გაფილტროთ, აირჩიეთ მასპინძლობა, სტუმრობა ან მხარდაჭერა.

მასპინძლობის არჩევისას საშუალება გექნებათ, გამოიყენოთ შემდეგი დამატებითი ფილტრები:

• წაუკითხავი გაჩვენებთ მხოლოდ გაუხსნელ შეტყობინებებს.
• სტუმრობის ეტაპი დაახარისხებს შეტყობინებებს დაჯავშნის მოთხოვნების, მომავალი ჯავშნების, მიმდინარე სტუმრობებისა თუ წარსული ჯავშნების მიხედვით.
• განცხადებები დაალაგებს შეტყობინებებს განცხადებების მიხედვით, თუ ერთზე მეტი განცხადება გაქვთ.
• ვარსკვლავით მონიშნული გამოიტანს მხოლოდ იმ შეტყობინებებს, რომლებიც ვარსკვლავით მონიშნეთ.

თუ თანამასპინძელი გყავთ, ბრენდის ელჩი სუპერმასპინძელი ხართ ან სტუმრებს Airbnb‑ს მეშვეობით შთაბეჭდილებას სთავაზობთ, „შეტყობინებების“ ჩანართში დაგხვდებათ შემდეგი ფილტრები:

• თანამასპინძელი გაჩვენებთ მიმოწერას თქვენსა და განცხადებაში მითითებულ ყველა თანამასპინძელს შორის.
• ბრენდის ელჩი სუპერმასპინძელი გამოიტანს თქვენსა და თქვენზე მომაგრებულ მასპინძლებს შორის დაგზავნილ შეტყობინებებს.
• შთაბეჭდილებები საშუალებას მოგცემთ, გაეცნოთ შესაბამის ჯავშნებთან დაკავშირებულ შეტყობინებებს.

სტუმრობის ფილტრი გამოიყენება იმ შეტყობინებების სანახავად, რომლებსაც სტუმრის სტატუსით გზავნით და იღებთ. მხარდაჭერის ფილტრის გამოყენებით იხილავთ თქვენს მიმოწერებს Airbnb‑ს მხარდაჭერის გუნდთან.

თუ კონკრეტული მიმოწერა გაინტერესებთ, შეტყობინებებში ძიება შეგიძლიათ სახელების, სიტყვებისა თუ ცალკეული ფრაზების მითითებით. შედეგებს თქვენ მიერ გამოყენებული ფილტრების გათვალისწინებით მიიღებთ, რაც მიმოწერების უფრო სწრაფად პოვნაში შეგიწყობთ ხელს.

დროული და მკაფიო კომუნიკაცია მასპინძლობის წარმატებული მასპინძლობის ერთ‑ერთი ძირითადი კომპონენტია. „შეტყობინებების“ ჩანართი საშუალებას გაძლევთ, მარტივად წამოიწყოთ საუბრები, გააზიაროთ მნიშვნელოვანი ინფორმაცია და გასცეთ პასუხები სტუმრების შეკითხვებს.

დრო რომ დაზოგოთ, ისარგებლეთ მზა პასუხების ფუნქციით. მზა პასუხები გულისხმობს შეტყობინებების შაბლონებს სტანდარტული ინფორმაციის მიმოცვლისთვის, რომ ერთი და იმავე ტექსტის ყოველ ჯერზე ნულიდან აკრეფა არ გიწევდეთ. „შეტყობინებების“ ჩანართში მოცემული იქნება წინასწარ შედგენილი რამდენიმე ასეთი შაბლონი, რომლებიც გამოადგებათ სტუმრებს ყველაზე მნიშვნელოვან ეტაპებზე (მაგალითად, ჯავშნის გაფორმებისთანავე). სურვილისამებრ, შეგიძლიათ როგორც მზა პასუხების უცვლელად გამოყენება, ისე მათი ჩასწორება ანდა საკუთარი შაბლონების შედგენა.

„შეტყობინებების“ ჩანართი იყენებს ხელოვნურ ინტელექტს სტუმრების შეკითხვების შინაარსის გასაგებად, რის საფუძველზეც ის შემდეგ ავტომატურად შემოგთავაზებთ ერთ-ერთ მზა პასუხს. შემოთავაზებული პასუხი აისახება სტუმართან მიმოწერაში და მას მხოლოდ თქვენ დაინახავთ.

თქვენ საშუალება გექნებათ, გაეცნოთ შემოთავაზებულ მზა პასუხს, შეიტანოთ მასში საჭირო ცვლილებები, შემდეგ კი გაგზავნოთ ის დაუყოვნებლივ, ან მისი გაგზავნა კონკრეტული დროისთვის დაგეგმოთ. ზოგიერთი შაბლონი შეიცავს ცვლადებს, რომლებიც შეტყობინების გაგზავნისას ავტომატურად ჩანაცვლდება, მაგალითად, სტუმრის სახელით ან გარკვეული სხვა ინფორმაციით ჯავშნისა თუ საცხოვრებლის შესახებ. იზრუნეთ, რომ განცხადებაში ყველა ცნობა სრული და განახლებული იყოს, რადგან ცარიელი ცვლადების შემცველი შეტყობინებები, შესაძლოა, სწორად არ გაიგზავნოს.

როცა შეტყობინების გაგზავნის თქვენ მიერ მითითებული დრო მოახლოვდება, სტუმართან მიმოწერაში შეხსენება გამოჩნდება. თქვენ საშუალება გექნებათ, ჩაასწოროთ შეტყობინება, ან გამოტოვოთ მისი გაგზავნა, თუ ის იმეორებს ინფორმაციას, რომელიც უკვე გაუზიარეთ სტუმარს.

ვრცლად დროის დაზოგვის მიზნით მზა პასუხების გამოყენების შესახებ

ყოველი ჯავშნისთვის იქმნება ახალი მიმოწერა „შეტყობინებების“ ჩანართში.

სტუმარს, რომელმაც გააფორმა ჯავშანი, შეუძლია მისი თანმხლები სხვა ზრდასრულების მოწვევა ჯავშანში დასაფიქსირებლად. სტუმრები, რომლებიც აღნიშნულ მოწვევაზე თანხმობას განაცხადებენ, ავტომატურად დაემატებიან მიმოწერას, რა შემთხვევაშიც თქვენს შეტყობინებებს მთელი ჯგუფი დაინახავს. სტუმრები ყველა შეტყობინების წაკითხვას შეძლებენ (იმ შემთხვევაშიც კი, თუ ისინი მიმოწერას გვიან შემოუერთდნენ), ამიტომ ინფორმაციის გამეორება აღარ მოგიწევთ.

შეეხეთ ღილაკს დეტალურად, რომ გაეცნოთ დამატებით ინფორმაციას ჯავშნისა და მიმოწერის შესახებ (ყველა დამატებული სტუმრის სიის ჩათვლით). სტუმრის პროფილზე გადასასვლელად და მის უკეთ გასაცნობად აირჩიეთ მისი ფოტო.

„შეტყობინებების“ ჩანართში იპოვით მიმოწერების სამართავად შემუშავებულ დამატებით ფუნქციებს, რომელთა შორისაა ჯაჭვური პასუხები, ჩასწორების ხელსაწყოები, შეტყობინებათა წაკითხვის დადასტურება და ემოჯიები.

• ჯაჭვური პასუხების ფუნქცია საშუალებას გაძლევთ, კონკრეტულ შეტყობინებაზე პასუხის გაცემისას შექმნათ პასუხების ჯაჭვი, რომელიც უშუალოდ თავდაპირველი შეტყობინების ქვეშ გამოჩნდება.
• ჩასწორების ხელსაწყოების დახმარებით შეტყობინების ჩასწორებას მისი გაგზავნიდან 15 წუთის განმავლობაში შეძლებთ, ხოლო გაგზავნილი შეტყობინების გაუქმებისთვის 24 საათი გექნებათ.
• შეტყობინებათა წაკითხვის დადასტურების ფუნქცია გაჩვენებთ, ნახეს თუ არა თქვენი შეტყობინებები სტუმრებმა თუ მიმოწერის სხვა მონაწილეებმა (თუ მათ გამორთული არ ექნებათ აღნიშნული ფუნქცია თავიანთი ანგარიშების პარამეტრებიდან).
• ემოჯიების გამოყენებით შესაძლებელია ცალკეულ შეტყობინებაზე რეაქციის გამოხატვა ღიმილით, გულით, მაღლა აწეული ცერა თითით, ტაშით ან სიცილით.

სტატიაში მოცემული ინფორმაცია, შესაძლოა, შეცვლილიყო მისი გამოქვეყნების შემდეგ.