Airbnb და ადგილობრივი მასპინძლები ხელს უწყობენ ბუნების დაცვას კენიაში

კენიის სანაპირო ზოლზე, შესაძლოა, Airbnb‑ზე რეგისტრირებული მასპინძლების ჯგუფი შენიშნოთ, თუმცა ისინი კი არ სეირნობენ, არამედ პლასტმასის ბოთლებსა და სხვა ნაგავს აგროვებენ, რომ ნარჩენები ინდოეთის ოკეანეში არ მოხვდეს.

პამელას, მასპინძელსა და კენიის სანაპირო რეგიონის მასპინძელთა კლუბის გაერთიანების ლიდერს, ძალიან უყვარს თავისი მხარე და სურს, გადაარჩინოს ის. სწორედ ამიტომ, პამელა გეგმავს, შეუერთდეს პლაჟების დასუფთავებისკენ მიმართულ ღონისძიებებს, რომლებსაც ადგილობრივი არაკომერციული ორგანიზაცია, „A Rocha Kenya“, უწევს ორგანიზებას. „მასპინძელთა გაერთიანების წევრების მობილიზებას ვახდენთ, რომ ერთად შევიკრათ საყოველთაოდ მნიშვნელოვანი საქმისთვის“, — ამბობს ის და დასძენს: „ერთმანეთის იმედად ვართ, რადგან ცალ‑ცალკე ვერაფერს გავხდებით“.

„A Rocha Kenya“ მუშაობს იმ ბუნებრივი საარსებო გარემოების შესწავლასა და აღდგენაზე, რომელთაც გაქრობის საფრთხე ემუქრება. არაკომერციული ორგანიზაცია გადაშენების პირას მდგარი სახეობების დაცვაზეც ზრუნავს. სწორედ ამ მონდომებამ უბიძგა პამელას, წარედგინა ორგანიზაციის კანდიდატურა Airbnb‑ს საზოგადოებრივი ფონდიდან დაფინანსების მისაღებად. მასპინძელთა კლუბების წევრებს ყოველწლიურად ეძლევათ საშუალება, დაეხმარონ ადგილობრივებს საზოგადოებრივი ფონდის მეშვეობით.

არაკომერციული ორგანიზაცია შედის უფრო ფართო გარემოსდაცვით ქსელში, „A Rocha“‑ში, რომელიც მსოფლიოს 20‑ზე მეტ ქვეყანაშია წარმოდგენილი. „A Rocha Kenya“ ცდილობს, ადგილობრივთა ხელშეწყობით დაიცვას გარემო, მათ შორის, მოახდინოს ფრინველთა მარკირება, დარგოს მანგროს ხეები და უფასოდ დაარიგოს ნერგები. კვლევების ჩასატარებლად და გარემოს დაცვის კუთხით ცნობიერების ასამაღლებლად ის თანამშრომლობს მკვიდრ მოსახლეობასთან, ადგილობრივ ფერმერებთან, ქალთა ჯგუფებთან, მეცნიერებთან და სხვა პირებთან.

„A Rocha Kenya“‑ს დამფუძნებელი, კოლინი, Airbnb‑ზე რეგისტრირებული მასპინძელიცაა. ის პამელასთან ერთად აწვდიდა ინფორმაციას ადგილობრივებს გარემოს დაცვის მნიშვნელობის შესახებ. „პრობლემის გადაჭრაში ადამიანების ჩართვა მნიშვნელოვანია იმის მიუხედავად, რომ მათ, შესაძლოა, გარკვეული წვლილი მიუძღოდეთ ამ პრობლემის წარმოქმნაში“, — ამბობს კოლინი და დასძენს: „პრაქტიკა აჩვენებს, რომ წარმატების მისაღწევად აუცილებელია საზოგადოების ყველა ფენის წარმომადგენლის ჩართვა“.

უკვე წლებია, რაც კოლინი მასპინძლობს მკვლევრებსა და Airbnb‑ზე რეგისტრირებულ სტუმრებს ეკოსახლში, რომელიც ვატამუში, „A Rocha Kenya“‑ს საკონსერვაციო ცენტრის ტერიტორიაზე მდებარეობს. კოლინის თქმით, მასპინძლობიდან მიღებული შემოსავალი არაკომერციული ორგანიზაციის სხვადასხვა ინიციატივის განხორციელებას ხმარდება. გარემოს დაცვისკენ მიმართულ სხვადასხვა აქტივობაში მონაწილეობის შემდეგ კოლინის სტუმრები ხშირად ხდებიან მისი ინიციატივების მხარდამჭერები.

კენიის მასპინძელთა კლუბის მიერ კანდიდატად წარდგენის წყალობით, „A Rocha Kenya“‑მ მიიღო 50 000 აშშ დოლარის ოდენობის დაფინანსება Airbnb‑ს საზოგადოებრივი ფონდიდან. ამ თანხით არაკომერციული ორგანიზაცია გეგმავს ახალი ბუნებრივი ნაკრძალის განვითარებასა და არსებულის კეთილმოწყობას კიდევ ერთი დაკიდებული ხიდის გადების გზით.

ამას გარდა, მიღებული თანხა დაეხმარება არაკომერციულ ორგანიზაციას, გააგრძელოს ეკოტურიზმისკენ მიმართული პროგრამები და შესთავაზოს მოსახლეობას მეტი საგანმანათლებლო პროგრამა, მაგალითად, ხის ნერგების გასავრცელებლად.

2023 წელს Airbnb‑ს საზოგადოებრივი ფონდიდან დაფინანსების მისაღებად არაკომერციული ორგანიზაციების კანდიდატურები მასპინძელთა 50‑ზე მეტმა კლუბმა წარადგინა მსოფლიო მასშტაბით. 2024 წლისთვის განაცხადების მიღება უკვე დაწყებულია. დამატებითი ინფორმაციისთვის მიმართეთ მასპინძელთა ადგილობრივ კლუბს.

Information contained in this article may have changed since publication.