ახალი ხელსაწყოები განცხადებებისთვის მომსახურებების შესახებ

ამიერიდან თქვენს მომსახურებას Airbnb‑თი მოსარგებლე მილიონობით ადამიანი იპოვის. თქვენთვის ხელმისაწვდომი სამასპინძლო ხელსაწყოების გამოყენებით უფრო მარტივად შეძლებთ ყველაფრის დაგეგმვას, სტუმრობის მსურველების დაინტერესებასა და მიმოწერას. ამას გარდა, გექნებათ ანალიტიკური ინფორმაცია თქვენ მიერ მიღებულ შეფასებებსა და მიმოხილვებთან დაკავშირებით.

როცა სისტემაში მასპინძლის სტატუსით იქნებით შესული, სამასპინძლო ხელსაწყოები წარმოდგენილი იქნება ქვემოთ ჩამოთვლილ 5 სხვადასხვა ჩანართში.

ჩანართი „დღეს“ აისახება აპის გახსნისთანავე. ჩანართიდან სწრაფად შეიტყობთ ცნობებს თითოეული ჯავშნის შესახებ, რაც დღის დაგეგმვასა და სათანადო მასპინძლობის გაწევაში დაგეხმარებათ.

• მარტივად გადაერთეთ მიმდინარე და მომავალი ჯავშნების ხედებს შორის, ასევე, გაფილტრეთ ნაჩვენები შედეგები შეთავაზებების მიხედვით.
• დაამატეთ ჯავშნებს პირადი მინაწერები, რომ მოგვიანებით გაიხსენოთ განსაკუთრებული თარიღები ან კონკრეტული თხოვნები.
• მიიღეთ სამოქმედო რჩევები თითოეულ ჯავშანთან დაკავშირებით — მაგალითად, როცა მიმოხილვის წაკითხვის ან სტუმრებისთვის მადლობის გადახდის დრო მოვა.

კალენდრიდან მარტივად გაეცნობით თქვენს განრიგს საათების მიხედვით, საჭიროების შემთხვევაში კი შეიტანთ მასში ცვლილებებს.

• იხილეთ დადასტურებული ჯავშნები და დაუჯავშნელი ადგილების რაოდენობა.
• დაარეგულირეთ დასაჯავშნად ხელმისაწვდომობა. სურვილისამებრ, შეგიძლიათ მიუთითოთ, როდის გცალიათ სტანდარტულ სამუშაო საათებს გარდა, ან დაბლოკოთ კონკრეტული დროები, როცა არ გცალიათ სტანდარტული სამუშაო საათების განმავლობაში. კალენდარში დაბლოკილი დრო აისახება თქვენს ყველა შეთავაზებაზე.
• შეასრულეთ Airbnb‑სა და Google‑ის კალენდრების სინქრონიზაცია, რომ ყველაფერი ერთი სივრციდან აკონტროლოთ.

სტუმრობის მსურველები მომენტალურად შეძლებენ მომსახურების დაჯავშნას თქვენს კალენდარში ხელმისაწვდომად მონიშნული ნებისმიერი საათისთვის, ამიტომ მნიშვნელოვანია, რეგულარულად შეიტანოთ საჭირო ცვლილებები ხელმისაწვდომობის კუთხით.

„განცხადებების“ ჩანართი გეხმარებათ თქვენს განცხადებასთან დაკავშირებული სხვადასხვა მონაცემის მართვაში. სწორედ ამ ჩანართიდანაა შესაძლებელი დასაჯავშნად ხელმისაწვდომობის განსაზღვრა და ფასების დაწესება, ასევე, თქვენი მომსახურების უკეთ წარმოჩენა.

• მოამზადეთ შეთავაზებები სხვადასხვა (საწყის, სტანდარტულ და პრემიუმ) ფასად, რომ მეტი არჩევანი მისცეთ სტუმრობის მსურველებს და უფრო სწრაფად მიაღწიოთ შემოსავლის კუთხით დასახულ მიზნებს.
• განსაზღვრეთ სტანდარტულად ხელმისაწვდომი საათები თითოეული შეთავაზებისთვის. სურვილისამებრ, შეგიძლიათ მიუთითოთ ერთი და იგივე საათები ყველა შეთავაზებისთვის ან თითოეულისთვის სხვადასხვა. სტუმრობის მსურველები ვერ იპოვიან და ვერც დაჯავშნიან თქვენს იმ შეთავაზებებს, რომლებისთვისაც არ გაქვთ განსაზღვრული ხელმისაწვდომი საათები.
• სტუმრობის მსურველები რომ დააინტერესოთ, დააწესეთ ფასდაკლებები კონკრეტულ პერიოდზე, ასევე, ადრეულ დაჯავშნაზე და დიდი ჯგუფებისთვის.
• დაამატეთ მაღალხარისხიანი ფოტოები, რომ სტუმრობის მსურველებს თქვენს მომსახურებაზე უფრო მკაფიო წარმოდგენა შეუქმნათ და ჯავშნის გაფორმების სურვილი გაუჩინოთ.

ყველა მასპინძელი, ფოტო და განცხადებაში მითითებული ცნობა უნდა პასუხობდეს Airbnb‑ზე წარმოდგენილი მომსახურებების მიმართ მოქმედ სტანდარტებსა და მოთხოვნებს.

„შეტყობინებების“ ჩანართი დაგეხმარებათ სტუმრებთან კომუნიკაციაში როგორც მომსახურების გაწევამდე, ისე მისი მსვლელობისას და დასრულების შემდეგ. შეტყობინებების მიმოცვლა ხდება როგორც ჯავშნის გამფორმებელ სტუმართან, ისე დანარჩენ სტუმრებთან, რომლებსაც ის ჯავშანში დასაფიქსირებლად მოიწვევს.

• წინასწარ გაარკვიეთ სტუმრების სურვილები და მოლოდინი, რომ თქვენი მომსახურება მათ საჭიროებებს მოარგოთ.
• მოამზადეთ პერსონალური შეთავაზება ინდივიდუალურ ფასად.
• გააზიარეთ ვიდეოები ან ფოტოები, რომ წარუდგინოთ სხვებს თავი ან უფრო მკაფიო წარმოდგენა შეუქმნათ სტუმრებს იმის შესახებ, თუ რას შესთავაზებთ.
• უპასუხეთ გავრცელებულ შეკითხვებს წინასწარ შედგენილი, ჩასწორებადი მზა პასუხების მეშვეობით, ან შექმენით ამ მიზნით საკუთარი შაბლონები.
• წინასწარ დაგეგმეთ მზა პასუხების მნიშვნელოვან ეტაპებზე (მაგალითად, ჯავშნის გაფორმების მომენტში ან მომსახურებამდე ერთი დღით ადრე) ავტომატურად გაგზავნა.
• დაუკავშირდით Airbnb‑ს მხარდაჭერის გუნდს, ან მიწერეთ მასპინძელს, როცა აპს სტუმრის სტატუსით იყენებთ.

„მენიუ“ წვდომას განიჭებთ თქვენს შემოსავალზე, ანალიტიკასა და სხვადასხვა პარამეტრზე. ჩვენ შემოგთავაზებთ პერსონალურ რჩევებსა და საინფორმაციო რესურსებს, რომლებიც მასპინძლობის ბიზნესის განვითარებაში დაგეხმარებათ.

• გაარკვიეთ თქვენი შემოსავალი და მოამზადეთ ინდივიდუალური ანგარიშები შემოსავლის მართვის პანელიდან.
• გაეცანით სტუმრებისგან მიღებულ ყველა მიმოხილვასა და დეტალურ შეფასებებს „ანალიტიკის“ სექციაში.
• მართეთ თქვენი ანგარიში და იპოვეთ სხვადასხვა სამასპინძლო რესურსი.

სტატიაში მოცემული ინფორმაცია, შესაძლოა, შეცვლილიყო მისი გამოქვეყნების შემდეგ.