შემოთავაზებულ შედეგებზე წვდომისთვის გადადით წინ
    ეს კონტენტი თქვენ მიერ არჩეულ ენაზე მიუწვდომელია, ამიტომაც ამჟამად იმ ენაზე გთავაზობთ, რომელიც მასთან ყველაზე ახლოსაა.

    საცხოვრებლის ეფექტური აღწერილობის მომზადება

    მიუთითეთ მკაფიო, ზუსტი ინფორმაცია და დაეხმარეთ სტუმრებს, თქვენს საცხოვრებელში წარმოიდგინონ თავი.
    ავტორი: Airbnb (18 ნოე, 2020)
    7-წუთიანი საკითხავი
    განახლების თარიღი: 11 ოქტ, 2022

    ყველაზე მნიშვნელოვანი

    • გაამახვილეთ ყურადღება იმაზე, რაც სტუმრებისთვის შეთავაზებულ საცხოვრებელს გამოარჩევს

    • გულწრფელად აღწერეთ საცხოვრებელი, რომ სტუმრებს თავიდანვე სათანადო მოლოდინი შეუქმნათ

    • გააახლეთ განცხადების აღწერილობა

    სუპერმასპინძლების თქმით, საცხოვრებელი პოპულარობით რომ სარგებლობდეს, არ არის აუცილებელი, იდეალური იყოს. მთავარია, სტუმრებს მის შესახებ მკაფიო წარმოდგენა ჰქონდეთ.

    საცხოვრებლის შესანიშნავი აღწერილობის შედგენა სტუმრებისთვის სათანადო მოლოდინის შექმნისა და მეტი ჯავშნის მიღების ერთ‑ერთი საუკეთესო საშუალებაა. ამ სტატიიდან შეიტყობთ, როგორ დააინტერესოთ პოტენციური სტუმრები.

    მოიფიქრეთ დასამახსოვრებელი სათაური

    განცხადების სათაური ერთ‑ერთი პირველია, გარეკანის ფოტოსთან ერთად, რასაც სტუმრები ძიების შედეგებში ყურადღებას აქცევენ, სანამ განცხადების გვერდზე გადავლენ. წარმოაჩინეთ მასში საცხოვრებლის ყველაზე მნიშვნელოვანი თავისებურებები.

    გთავაზობთ კარგად მოფიქრებული სათაურების რამდენიმე მაგალითს:

    • ხის მყუდრო სახლი დიდი სამზარეულოთი
    • ძაღლებისთვის შესაფერისი სტუდიო LAX‑თან
    • ვილა პლაჟთან კაიაკებით

    სტუმრობის მსურველები თქვენ მიერ შეთავაზებული საცხოვრებლით რომ დააინტერესოთ, სულ 32 სიმბოლო გაქვთ (შორისების ჩათვლით). რატომ ასე ცოტა? მოკლე სათაურები ყველაზე კარგად ჩანს სმარტფონებისა და პლანშეტების ეკრანებზე, საძიებო მოთხოვნების 75% კი Airbnb‑ზე სწორედ ამ მოწყობილობებიდან იგზავნება.

    მოერიდეთ ემოჯიების და სპეციალური სიმბოლოების გამოყენებას, მთავრული ასოების შემცველი დამწერლობის გამოყენების შემთხვევაში კი მთავრულად დაწერეთ მხოლოდ საკუთარი სახელების პირველი ასო (მაგ., „Yellowstone“) და სტანდარტული აბრევიატურები (მაგ., „LAX“).

    გაეცანით მითითებებს განცხადების დასათაურებასთან დაკავშირებით

    ხაზი გაუსვით განსაკუთრებულ თავისებურებებს

    Airbnb‑ზე მილიონობით საცხოვრებელია წარმოდგენილი. გამოყავით რამდენიმე წუთი და დაფიქრდით, რა უნიკალური თავისებურებებით გამოირჩევა თქვენ მიერ სტუმრებისთვის შეთავაზებული ვარიანტი (მაგალითად, მდებარეობა ან საყოფაცხოვრებო პირობები).

    თქვენი კონკრეტული შემთხვევის მიხედვით, შეგიძლიათ აღნიშნოთ:

    • „საცხოვრებელი ქალაქში ორი საუკეთესო ლუდსახარშიდან 10 წუთის სავალზე მდებარეობს“.
    • „ლეგენდარულ ველომარშრუტებამდე ველოსიპედით 15 წუთში მიხვალთ, მანქანით კი 5 წუთიც არ უნდა“.

    იდეებისთვის გაეცანით სხვა მასპინძლების მიერ შედგენილ აღწერილობებს და შესაბამისი საცხოვრებლების მიმოხილვებს. ამგვარად, შეიტყობთ, რა ტიპის ინფორმაცია და საყოფაცხოვრებო პირობები მოსწონთ სტუმრებს განსაკუთრებულად.

    გადმოეცით საცხოვრებლის ამბავი

    აღწერილობა სტუმრებისთვის შეთავაზებული საცხოვრებლის პოპულარიზაციის ძირითადი საშუალებაა, რომლის მნიშვნელოვანი ელემენტიც ამბის თხრობაა. საცხოვრებლის საინტერესო აღწერილობის შესადგენად სულაც არ არის აუცილებელი, მწერალი იყოთ. უბრალოდ, შეეცადეთ, მკაფიოდ და დამაჯერებლად წეროთ.

    თუ ზუსტად არ იცით, საიდან დაიწყოთ, მოუყევით მეგობარს, როგორი იქნება თქვენ მიერ სტუმრებისთვის შეთავაზებულ საცხოვრებელში გაჩერება. როგორც წესი, ყველაზე მნიშვნელოვანი დეტალები ეგრევე იკვეთება, თანაც ბუნებრივად და არაფორმალურად — ეს სტილი ძალიან უხდება საცხოვრებლის აღწერილობას განცხადებაში.

    მაგალითად, გაანდეთ სტუმრებს, რა ელით წინ — ბინა ზედა სართულზეა, ხეების ჩრდილში? მაშინ დაწერეთ, რომ სტუმრებს თავი ხეზე აშენებულ სახლში ეგონებათ. ცენტრში მდებარე ყველაზე პატარა, სადა ოთახიც კი შეიძლება იყოს „იდეალური საწყისი წერტილი ქალაქის შესასწავლად“.

    ტერეზა და დევიდი, სუპერმასპინძლები ელკჰორნიდან (ვისკონსინი), აღნიშნავენ, რომ მათ მიერ შეთავაზებული საცხოვრებლის ისტორია სტუმრების „გულს შეეხო“. ისინი გირჩევენ, რომ სანამ თქვენს ამბავს გადმოსცემთ, ადგილობრივ გარემოს გაეცნოთ და მოიძიოთ საინტერესო ფაქტები საცხოვრებლისა თუ ქალაქის შესახებ.

    წერეთ მოკლედ

    საცხოვრებლის მაძიებელი სტუმრები ხშირად მხოლოდ განცხადების ძირითად დეტალებს ეცნობიან, აღწერილობის თავიდან ბოლომდე წაკითხვის გარეშე. აღწერეთ საცხოვრებელი მეტ-ნაკლებად მოკლედ, მნიშვნელოვანი ინფორმაცია კი მიუთითეთ დასაწყისში, პოტენციურმა სტუმრებმა მარტივად რომ იპოვონ.

    შეეცადეთ, არ გაიმეოროთ ინფორმაცია. მაგალითად, სტუმრებისთვის შეთავაზებული პირობები, როგორიცაა Wi-Fi, პარკირების ადგილი და კონდიციონერი, შეგიძლიათ მიუთითოთ საყოფაცხოვრებო პირობების სიაში. ამგვარად, აღწერილობა მოკლე იქნება, სტუმრებს კი ფილტრების დახმარებით შეეძლებათ თქვენი განცხადების პოვნა.

    იყავით გულწრფელი

    საცხოვრებელთან დაკავშირებით გადაჭარბებული მოლოდინის შექმნა სტუმრებში იმედგაცრუებას იწვევს, რაც უარყოფით მიმოხილვებში აისახება, რეალისტური აღწერილობის მეშვეობით კი სტუმრობის მსურველები ჯავშნის გაფორმებამდე გადაწყვეტენ, შეესაბამება თუ არა საცხოვრებელი მათ საჭიროებებს.

    „თუ საცხოვრებელში რაიმე უჩვეულოა, აუცილებლად აღნიშნეთ აღწერილობაში“, — ამბობს ნიკი, სუპერმასპინძელი სან‑ფრანცისკოდან და დასძენს: „შეეცადეთ, სათქმელი გულწრფელად და მკაფიოდ გადმოსცეთ, თუმცა მაინცდამაინც ნუ დააშინებთ სტუმრებს. აღწერილობა საკმარისად გამჭვირვალე უნდა იყოს, რომ სტუმრებმა სწორი არჩევანი გააკეთონ“.

    განსაკუთრებით მნიშვნელოვანია ადაპტირებული პირობების მითითება და იმ ასპექტების აღნიშვნა, რომლებიც, შესაძლოა, სირთულეს წარმოადგენდეს ზოგიერთი სტუმრისთვის (მათ შორის, გადაადგილების შეზღუდვის მქონე პირებისთვის, ბავშვებისთვის ან შინაური ცხოველებისთვის). ეს ინფორმაცია შეგიძლიათ დაურთოთ საცხოვრებლის აღწერილობის სექციებში „სხვა გასათვალისწინებელი“ და „საცხოვრებელი სივრცე“.

    ისარგებლეთ ფოტოებისთვის წარწერების დამატების ფუნქციით

    როცა სტუმრები საცხოვრებლის დაჯავშნის შესახებ გადაწყვეტილებას იღებენ, ფოტოები ერთ‑ერთი მნიშვნელოვანი ფაქტორია, ამიტომ ისარგებლეთ ფოტოებისთვის წარწერების დამატების ფუნქციით, რომ ვიზუალურ მასალასთან ერთად შესაბამისი ინფორმაციაც მიაწოდოთ დაინტერესებულ პირებს. თუ ზუსტად არ იცით, რა წარწერა დაურთოთ ამა თუ იმ ფოტოს, დაფიქრდით, სტუმრებისთვის მნიშვნელოვანი რა ნიუანსების აღბეჭდვა არ შეუძლია კამერას.

    თუ ფოტოზე საძინებელია, შეატყობინეთ სტუმრებს საწოლის ზომა და მატრასის ტიპი (საჭიროებისამებრ). მყუდრო საკითხავი კუთხეა აღბეჭდილი? მაშინ აღნიშნეთ, როგორი კარგია იქ საღამოს გატარება წიგნით ხელში.

    დაიხმარეთ ჩვენი გზამკვლევი ეფექტური განცხადების შესაქმნელად

    სტატიაში მოცემული ინფორმაცია, შესაძლოა, შეცვლილიყო მისი გამოქვეყნების შემდეგ.

    ყველაზე მნიშვნელოვანი

    • გაამახვილეთ ყურადღება იმაზე, რაც სტუმრებისთვის შეთავაზებულ საცხოვრებელს გამოარჩევს

    • გულწრფელად აღწერეთ საცხოვრებელი, რომ სტუმრებს თავიდანვე სათანადო მოლოდინი შეუქმნათ

    • გააახლეთ განცხადების აღწერილობა
    Airbnb
    18 ნოე, 2020
    სასარგებლო იყო?

    სხვა საინტერესო

    სხვა საინტერესო

    გაეცანით სხვა თემებს