მზა პასუხების გამოყენება დროის დაზოგვის მიზნით

მასპინძლებს ხშირად ეკითხებიან ერთსა და იმავეს: საცხოვრებელი ივნისში ხელმისაწვდომი იქნება? მისასვლელ გზას ხომ ვერ ამიხსნიდით? რა არის Wi‑Fi‑ს პაროლი?

მზა პასუხების ფუნქცია, რომელიც „შეტყობინებების“ ჩანართშია წარმოდგენილი, საშუალებას გაძლევთ, გამოიყენოთ წინასწარ შედგენილი პასუხები, რომ ყოველთვის ოპერატიულად გამოეხმაუროთ დაინტერესებულ პირებს.

მზა პასუხი გულისხმობს მოკლე, წინასწარ შედგენილ შეტყობინებას, რომელიც შაბლონის სახითაა შენახული თქვენს მიმოწერის პარამეტრებში.

ხელმისაწვდომია სხვადასხვა მონაცემის — მაგალითად, სტუმრის სახელის — შესავსებად განკუთვნილი ცვლადებიც, რომლებიც პერსონალურ ელფერს შესძენს თითოეულ შეტყობინებას. აღნიშნული მონაცემები მიიღება განცხადებაში ან ჯავშანში დაფიქსირებული ინფორმაციიდან.

შესაძლებელია როგორც საკუთარი მზა პასუხების შექმნა, ისე Airbnb‑ს მიერ მომზადებული შაბლონების ჩასწორება. მაგალითად, თუ სტუმრობის მსურველებს ხშირად სცემთ პასუხს გარე გრილთან დაკავშირებით, შეინახეთ თქვენი სტანდარტული პასუხი მზა პასუხის სახით.

მზა პასუხების გაგზავნა შესაძლებელია როგორც დაუყოვნებლივ, ისე კონკრეტული განრიგის მიხედვით.

სტუმრისთვის მზა პასუხის მყისიერად გასაგზავნად:

• გადადით „შეტყობინებების“ ჩანართზე.
• აირჩიეთ მიმოწერა, რომელშიც გსურთ პასუხის გაცემა.
• შეტყობინების აკრეფის პუნქტთან აირჩიეთ პლუსის ნიშანი (+).
• აირჩიეთ მზა პასუხის გაგზავნა.
• აირჩიეთ მზა პასუხი, რომელიც მიმოწერაში გამოჩნდება.
• ჩაასწორეთ შეტყობინება, ან დატოვეთ ის უცვლელი სახით.
• შეტყობინების გასაგზავნად აირჩიეთ ისარი (↑).

„შეტყობინებების“ ჩანართში ხელმისაწვდომია შემოთავაზებული პასუხებიც. კერძოდ, ხელოვნური ინტელექტი ამოიცნობს სტუმრის შეკითხვას და შემოგთავაზებთ ერთ‑ერთ მზა პასუხს. შემოთავაზება აისახება მიმოწერაში და მას მხოლოდ თქვენ დაინახავთ. გაგზავნამდე შეძლებთ როგორც შემოთავაზებული პასუხის ჩასწორებას, ისე განსხვავებული შეტყობინების აკრეფას.

მზა პასუხი ავტომატურად რომ გაეგზავნოს ყველა სტუმარს:

• გადადით „შეტყობინებების“ ჩანართზე.
• აირჩიეთ პარამეტრების ხატულა ეკრანის ზედა ნაწილში.
• აირჩიეთ მზა პასუხების მართვა.
• აირჩიეთ მზა პასუხი, რომლის გაგზავნის დაგეგმვაც გსურთ, და — შემდეგი.
• აირჩიეთ დაგეგმვა შემდეგი დროისთვის: და ის, თუ როდის გსურთ, სტუმრებმა მიიღონ ეს კონკრეტული შეტყობინება (მაგალითად, ჯავშნის გაფორმებიდან 5 წუთში ან 10:00‑ზე დაგეგმილ დაბინავებამდე 1 დღით ადრე).

როცა მზა პასუხის გაგზავნის დაგეგმილი დრო მოახლოვდება, სტუმართან მიმოწერაში შეხსენებას მიიღებთ. თქვენ საშუალება გექნებათ, ჩაასწოროთ შეტყობინება, ან გამოტოვოთ მისი გაგზავნა, თუ ის იმეორებს ინფორმაციას, რომელიც უკვე გაუზიარეთ სტუმარს.

უმჯობესია, თუ მზა პასუხები იქნება მოკლე და მხოლოდ ერთ საკითხზე კონცენტრირებული. „შეტყობინებების“ ჩანართში მოცემული იქნება წინასწარ შედგენილი რამდენიმე შაბლონი ქვემოთ ჩამოთვლილ გავრცელებულ საკითხებთან დაკავშირებით.

• საცხოვრებლის ხელმისაწვდომობა: აცნობეთ სტუმრობის მსურველებს, რომ მათ თავისუფლად შეუძლიათ დაჯავშნონ ნებისმიერი თარიღი, რომელიც განბლოკილია კალენდარში.
• საძილე პირობები: დაადასტურეთ საცხოვრებელში არსებული საძინებლების, საწოლებისა და სააბაზანოების რაოდენობა.
• დაგეგმილზე ადრე დაბინავება: შეადგინეთ ტექსტი იმ შემთხვევისთვის, როცა საშუალება გექნებათ, დააბინაოთ სტუმარი სტანდარტულ დროზე ადრე.
• მისასვლელი გზა ან ტრანსპორტი: დაადასტურეთ საცხოვრებლის მისამართი და დაურთეთ შეტყობინებას მითითებები იმასთან დაკავშირებით, თუ როგორ მივიდნენ სტუმრები მისამართზე.
• Wi‑Fi ქსელი: მიუთითეთ საცხოვრებელსა თუ კონკრეტულ ადგილას ხელმისაწვდომი Wi‑Fi ქსელის სახელი და მისი პაროლი.
• დაგეგმილზე გვიან გასვლა: შეადგინეთ ტექსტი იმ შემთხვევისთვის, როცა საშუალება გექნებათ, სტუმარს საცხოვრებლიდან სტანდარტულ დროზე გვიან გასვლის უფლება მისცეთ.

სურვილისამებრ, შეგიძლიათ როგორც წინასწარ შედგენილი შაბლონების გაგზავნამდე ჩასწორება, ისე საკუთარი შაბლონების შექმნა. სცადეთ მზა პასუხების გაგზავნის დაგეგმვა ქვემოთ ჩამოთვლილი მნიშვნელოვანი ეტაპებისთვის.

• ჯავშნის დადასტურება: გაუგზავნეთ სტუმარს მისასალმებელი ტექსტი, როცა მისი ჯავშანი დადასტურდება.
• დაბინავებამდე: შეეხმიანეთ სტუმარს დაბინავებამდე 24‑48 საათით ადრე, როცა მისთვის უკვე ხელმისაწვდომი იქნება სტუმრობასთან დაკავშირებული ყველა დეტალი.
• სტუმრობის პირველი ღამის შემდეგ: მოიკითხეთ სტუმარი და ჰკითხეთ, რამე ხომ არ სჭირდება დამატებითი კომფორტისთვის.
• საცხოვრებლიდან გასვლამდე: სტუმრობის დასრულების წინა საღამოს შეახსენეთ სტუმარს საცხოვრებლიდან გასვლის დრო და შესაბამისი მითითებები.
• სტუმრობის დასრულების შემდეგ: საცხოვრებლიდან გასვლის შემდეგ 24‑დან 48 საათამდე პერიოდში გადაუხადეთ სტუმრებს მადლობა სტუმრობისთვის და შეახსენეთ, მიმოიხილონ, როგორ მოეწონათ ყველაფერი.

მზა პასუხებისთვის ფოტოებისა თუ ვიდეოების დართვა დაგეხმარებათ სტუმრებისთვის თქვენი თავის წარდგენაში, ასევე, საცხოვრებელთან დაკავშირებული მნიშვნელოვანი დეტალების გაზიარებაში. მაგალითად, ვიზუალური ინსტრუქცია გაუმარტივებს სტუმრებს საცხოვრებელში მოხვედრას, კონდიციონერის ან გამათბობლის დარეგულირებას ან, ვთქვათ, ჰიდრომასაჟის აუზის ჩართვასა და გამორთვას.

შეტყობინებისთვის ფაილების მიმაგრება ჯავშნის დადასტურების შემდეგ ნებისმიერ დროსაა შესაძლებელი. ფოტოები უნდა იყოს PNG‑ ან JPG‑ფორმატში (50 მეგაბაიტამდე ზომის), ხოლო ვიდეოები — MP4‑ ან MOV‑ფორმატში (100 მეგაბაიტამდე ზომის და 60 წამამდე ხანგრძლივობის).

ხელსაწყოები და ფუნქციები, შესაძლოა, განსხვავდებოდეს მდებარეობის მიხედვით. სტატიაში მოცემული ინფორმაცია, შესაძლოა, შეცვლილიყო მისი გამოქვეყნების შემდეგ.