მასპინძლობის საუკეთესო სტრატეგიები

Airbnb‑ს მეშვეობით მასპინძლობისას არა მხოლოდ შემოსავალს მიიღებთ, არამედ ბევრ საინტერესო ადამიანსაც გაიცნობთ მთელი მსოფლიოდან. „სტუმრად გვყავდა დრონების შემქმნელი, პროფესიონალი მომღერალი და კომპოზიტორი, ასევე, ცირკის მსახიობი“, — ამბობენ ბევერლი და სიუზი, მასპინძლები ოკლენდიდან (კალიფორნია) და დასძენენ: „ამან ნამდვილად შემატა ხალისი ჩვენს ცხოვრებას“. Airbnb მასპინძლობა შეუძლია ყველას, ვისაც სტუმრებისთვის საცხოვრებლის შეთავაზება შეუძლია — უბრალოდ, საჭიროა ჩვენს ძირითად სტანდარტებთან შესაბამისობა, ყოველი სტუმრობა კომფორტული და საიმედო რომ იყოს. მაგალითად:

სტუმრების მხრიდან მომართვებზე სწრაფი გამოხმაურება თქვენს ყურადღებიანობაზე მიუთითებს. შეეცადეთ, დაჯავშნასთან დაკავშირებულ შეტყობინებებს 24 საათის განმავლობაში უპასუხოთ. გამოხმაურების მაღალი სიხშირე არა მხოლოდ შესანიშნავი სტუმართმოყვარეობის მანიშნებელია, ის სუპერმასპინძლის სტატუსის მიღების კრიტერიუმებიდან ერთ‑ერთია.

ჩამოტვირთეთ Airbnb აპი, რომ ნებისმიერი ადგილიდან შეძლოთ სტუმრების შეტყობინებებზე პასუხი. რა თქმა უნდა, უმჯობესი იქნება, თუ სტუმრების ყველა შეტყობინებას ოპერატიულად უპასუხებთ, თუმცა გამოხმაურების სიხშირე გამოითვლება კონკრეტულად დაჯავშნასთან დაკავშირებით მიღებულ მომართვებზე თქვენი გამოხმაურების მიხედვით.

Airbnb‑ს მონაცემების მიხედვით, მასპინძლები დაჯავშნის მოთხოვნათა უმეტესობას აკმაყოფილებენ, როცა მოთხოვნილი თარიღები დასაჯავშნად ხელმისაწვდომია. თუ ზუსტად არ იცით, მოახერხებთ თუ არა მასპინძლობას ამა თუ იმ თარიღებში, დაბლოკეთ შესაბამისი დღეები კალენდრიდან.

თუ დაჯავშნის ზედმეტად ბევრ მოთხოვნას უარყოფთ, Airbnb‑მ, შესაძლოა, ჩათვალოს, რომ მასპინძლობისთვის არ გცალიათ და მოგიხსნათ განცხადება, სანამ დრო გამოგიჩნდებათ. მაქსიმალურად ბევრ მოთხოვნას რომ დაეთანხმოთ (ისე, რომ დისკომფორტი არ შეგექმნათ), შეგიძლიათ:

• მოითხოვოთ, რომ დაჯავშნამდე სტუმარს დადასტურებული ჰქონდეს ვინაობა
• შეადგინოთ სახლის წესები, რომ სტუმრებს სათანადო მოლოდინი შეუქმნათ
• მოითხოვოთ, რომ დაჯავშნამდე სტუმარს მიღებული ჰქონდეს დადებითი მიმოხილვები (თუ მომენტალური დაჯავშნა გაქვთ გააქტიურებული)

Airbnb ძალზე სერიოზულად ეკიდება ჯავშნების გაუქმების შემთხვევებს, რადგან ისინი არა მხოლოდ სტუმრების დაწყობილ გეგმებს შლის, არამედ უარყოფითად აისახება ნდობაზე მთლიანად ჩვენი გაერთიანების წევრებს შორის. აქედან გამომდინარე, მაქსიმალურად უნდა შეეცადოთ, თავიდან აიცილოთ ჯავშნების გაუქმების შემთხვევები არასაპატიო მიზეზით. ჯავშნის გაუქმების საჭიროების მინიმუმამდე დასაყვანად:

• რეგულარულად განაახლეთ დასაჯავშნად ხელმისაწვდომობა და ფასები
• წინასწარ ჩაინიშნეთ საინტერესო ღონისძიებები და დღესასწაულები, რომ საცხოვრებელი პირადი საჭიროებებისთვის გამოიყენოთ, ან ერთი ღამის ფასი გაზარდოთ
• თუ კალენდარი განახლებული არ გაქვთ, ან დაჯავშნის თითოეული მოთხოვნის ინდივიდუალურად განხილვა გირჩევნიათ, გამორთეთ მომენტალურად დაჯავშნის ფუნქცია
• თუ ერთი და იგივე საცხოვრებლის შესახებ განცხადება სხვადასხვა ვებსაიტზე გაქვთ გამოქვეყნებული, გაააქტიურეთ კალენდრების სინქრონიზაციის ფუნქცია, რომ თავიდან აიცილოთ ორმაგი ჯავშნები

ყოველი სტუმრობა ფასდება მისი დასრულების შემდეგ. დადებითი მიმოხილვები არა მხოლოდ მეტი ჯავშნის მიღებაში, არამედ სუპერმასპინძლის სტატუსის მოპოვებაშიც დაგეხმარებათ. მასპინძლებთან, რომლებიც შესანიშნავ მიმოხილვებს იღებენ, სტუმრების მიერ ფასდება ხოლმე შემდეგი:

• სისუფთავე: სტუმრები ელიან, რომ ისეთივე სუფთა და მოწესრიგებული საცხოვრებელი დახვდებათ, როგორიც ფოტოებზეა განცხადებაში. სტუმრობებს შორის გამოყავით საკმარისი დრო დასუფთავებისთვის, განსაკუთრებით მაშინ, თუ ზედიზედ ბევრი ჯავშანი გაქვთ.
• პირველადი საჭიროების ნივთები: სტუმრებს მოსწონთ, როცა ძირითად საყოფაცხოვრებო ნივთებს ახვედრებენ. Airbnb გირჩევთ, მოიმარაგოთ ტუალეტის ქაღალდი, ხელის/ტანის საპონი, საწოლის თეთრეული და მინიმუმ ერთი პირსახოცი/ბალიში თითოეული სტუმრისთვის.
• ზუსტი ინფორმაცია საცხოვრებლის შესახებ: მკაფიოდ მითითებული არსებითი ინფორმაციის დახმარებით სტუმრები გადაწყვეტენ, რამდენად შეესაბამება საცხოვრებელი მათ საჭიროებებს.
• უპრობლემო დაბინავება: მარტივი და დაუბრკოლებელი დაბინავება მნიშვნელოვანია სტუმრებისთვის, რომლებსაც ხანგრძლივი მგზავრობის შემდეგ დასვენება სჭირდებათ.
• აქტიური კომუნიკაცია: სტუმრები მშვიდად არიან, როცა იციან, რომ შეუძლიათ დახმარებისთვის მოგმართონ. შეეცადეთ, ადრევე დაუკავშირდეთ, რომ დაბინავების საკითხი შეათანხმოთ.

მაღალი საერთო შეფასების შენარჩუნების შესახებ სხვა რჩევებისთვის ეწვიეთ სტუმარ-მასპინძლობის გვერდს.

Airbnb არ მოელის, რომ ყოველი სტუმრობა თავიდან ბოლომდე იდეალური იქნება. დროთა განმავლობაში, ბევრს ისწავლით და მასპინძლობისადმი მიდგომაშიც გარკვეულ ცვლილებებს შეიტანთ უკეთესობისკენ. ამ სტატიაში მოცემული რეკომენდაციების გათვალისწინება შესანიშნავი პირველი ნაბიჯი იქნება იმისთვის, რომ სტუმრები კმაყოფილი დარჩნენ, დადებითი მიმოხილვები მიიღოთ და მასპინძლობის სურვილი რეალობად აქციოთ.