შემოთავაზებულ შედეგებზე წვდომისთვის გადადით წინ
    ეს კონტენტი თქვენ მიერ არჩეულ ენაზე მიუწვდომელია, ამიტომაც ამჟამად იმ ენაზე გთავაზობთ, რომელიც მასთან ყველაზე ახლოსაა.

    ერთი თვის ფასის დაწესება გრძელვადიანი ჯავშნებისთვის

    წარმოგიდგენთ ხელსაწყოებს, რომლებიც გაგიმარტივებთ გამოთვლებს და მეტი სტუმრის დაინტერესებაში დაგეხმარებათ.
    ავტორი: Airbnb (11 მაი, 2021)
    3-წუთიანი საკითხავი
    განახლების თარიღი: 11 მაი, 2022

    ყველაზე მნიშვნელოვანი

    • გრძელვადიან ჯავშნებზე გარკვეული ფასდაკლების დაწესებამ შეიძლება სტუმრებს საცხოვრებლის დაჯავშნისკენ უბიძგოს

    • ყოველ მომავალ კალენდარულ თვეზე ინდივიდუალური ფასების დაწესება შეგიძლიათ

    გასული წლის განმავლობაში შესამჩნევად იმატა მოთხოვნამ საცხოვრებლებზე, რომელთა დაჯავშნაც შესაძლებელია თვიურად. ამის მიზეზია ის, რომ სულ უფრო მეტი ადამიანი ითავისებს იდეას, რომ ცხოვრება შეუძლიათ ყველგან, სადაც გაუხარდებათ. Airbnb‑ს მეშვეობით გაფორმებული ხუთი ჯავშნიდან ერთი 28 ან მეტი ღამის ხანგრძლივობისაა. ამასთან, მსოფლიო მასშტაბით შეთავაზებული საცხოვრებლების ნახევარზე მეტზე დაწესებულია გარკვეული ფასდაკლებები გრძელვადიანი ჯავშნების შემთხვევაში.*

    მინიმუმ ერთთვიან ჯავშნებზე ფასდაკლებების დაწესების მეშვეობით უფრო დიდი ალბათობით გექნებათ მეტი დაჯავშნილი თარიღი კალენდარში და თქვენთვის სასურველი შემოსავალი. ჩვენ გთავაზობთ სპეციალურ ხელსაწყოებს, რომელთა მეშვეობითაც შეგიძლიათ განსაზღვროთ ფიქსირებული ფასდაკლება ყველა გრძელვადიან ჯავშანზე ან ინდივიდუალური ფასი კალენდარული თვეების მიხედვით.

    „გრძელი ვადით სტუმრობის მსურველთათვის გარკვეული ფასდაკლების შეთავაზება დაჯავშნით მათი დაინტერესების შესანიშნავი ხერხია“, — ამბობს ოლივერი, მასპინძელი ნიუ‑იორკიდან, და დასძენს: „ამას გარდა, საცხოვრებლის მომდევნო სტუმრისთვის მომზადებაც ნაკლებად მიწევს ხოლმე, როცა ის თვიურად იჯავშნება“.

    ერთ თვეზე ფასდაკლების დაწესება

    ფასდაკლებული ტარიფის განსაზღვრა საკმაოდ მარტივია, თუმცა გასავლელი ეტაპები და ხელმისაწვდომი ვარიანტები განსხვავდება იმის მიხედვით, მობილურ აპს იყენებთ თუ ვებ‑ბრაუზერს. დასაწყისისთვის გაგაცნობთ, როგორ დააწესოთ ფიქსირებული ფასდაკლება ერთ თვეზე, რომელიც მთელი წლის განმავლობაში იმოქმედებს:

    • მობილური აპი. შეხებით აირჩიეთ თქვენი განცხადება, შემდეგ კი — „დაჯავშნის პარამეტრები“. „ფასების“ სექციიდან შეხებით აირჩიეთ „ფასები სტუმრობის ხანგრძლივობის მიხედვით“, შემდეგ კი — „ფასდაკლება ერთ თვეზე“. მიუთითეთ, რამდენპროცენტიანი ფასდაკლების შეთავაზება გსურთ ერთი ღამის ფასზე. როცა დაასრულებთ, შეეხეთ ღილაკს „შენახვა“.
    • ვებ‑ბრაუზერი. დაწკაპუნებით ან შეხებით აირჩიეთ თქვენი განცხადება, შემდეგ კი — „ფასები და ხელმისაწვდომობა“ და „ფასდაკლებები“. ერთ თვეზე ფასდაკლებების გვერდით დაწკაპუნებით ან შეხებით აირჩიეთ „ჩასწორება“. მიუთითეთ, რამდენპროცენტიანი ფასდაკლების შეთავაზება გსურთ ერთი ღამის ფასზე. როცა დაასრულებთ, დააწკაპუნეთ ღილაკს „შენახვა“.

    ფასწარმოქმნის ხელსაწყო ავტომატურად გამოთვლის ფასდაკლებას ერთ თვეზე, რა დროსაც თქვენ მიერ ერთ ღამეზე დაწესებული ფასი გამრავლდება პროცენტზე, რომელიც მინიმუმ 28 ღამის ხანგრძლივობის ჯავშნის თითოეულ ღამეზე განსაზღვრეთ. ამის შემდეგ ფასდაკლება აისახება ჯამურ ღირებულებაში, რომელიც სტუმრობის მსურველმა უნდა გადაიხადოს.

    ყოველ თვეზე ინდივიდუალური ფასების დაწესების შესაძლებლობა დაგეხმარებათ, თითოეული კალენდარული თვისთვის განსაზღვროთ სხვადასხვა ფიქსირებული ფასი სეზონური მოთხოვნის გათვალისწინებით.

    თუ გსურთ, სტუმრობის მსურველებს წელიწადის სხვადასხვა დროს განსხვავებული ფასდაკლება შესთავაზოთ, ამის განსაზღვრა ვებ‑ბრაუზერის მეშვეობით შეგიძლიათ. „ერთ თვეზე ფასდაკლებების“ სექციიდან დაწკაპუნებით აირჩიეთ „კონკრეტულ თვეში ინდივიდუალური ფასის დაწესება“. გამოიყენეთ ჩამოსაშლელი მენიუ, აირჩიეთ სასურველი კალენდარული თვე მომავალში და მიუთითეთ ინდივიდუალური ფასი ფიქსირებული თანხის (და არა პროცენტის) სახით.

    ერთ თვეზე ინდივიდუალური ფასის დაწესების შესაძლებლობა დაგეხმარებათ, შესაბამისი ზომები მიიღოთ ადგილობრივ დონეზე არსებული მოთხოვნის შესაბამისად. მაგალითად, თუ სტუმრებს საცხოვრებელს სთავაზობთ პლაჟთან ან სამთო‑სათხილამურო კურორტთან ახლოს, სურვილისამებრ, შეგიძლიათ უარი თქვათ ფასდაკლების შეთავაზებაზე სეზონის დროს, ხოლო სხვა თვეებში ფასი შეამციროთ.

    გაითვალისწინეთ, რომ ერთ თვეზე ზემოაღნიშნული წესით განსაზღვრულ ტარიფებს ავტომატურად ექნება უპირატესობა თქვენ მიერ ერთ კვირასა თუ თვეზე ადრე დაწესებული ფასდაკლებების წინაშე.

    გასათვალისწინებელი ხარჯები

    შესაძლოა, უკვე იცოდეთ, დაახლოებით რა ფასის დაწესება გსურთ ერთ თვეზე. თუ, ძირითადად, მოკლევადიან ჯავშნებს იღებთ, სტუმრობებს შორის კი გარკვეული შუალედები გაქვთ, დაფიქრდით, დაგეხმარებათ თუ არა შედარებით ნაკლები — მაგრამ გრძელვადიანი — ჯავშანი შემცირებულ ფასად ხარჯების იმავენაირად დაფარვაში.

    მოკლევადიანისგან განსხვავებით, გრძელვადიანი სტუმრობები, ხშირ შემთხვევაში, ნიშნავს, რომ საცხოვრებელი უფრო დიდი ხნის განმავლობაში იქნება დაჯავშნილი და მომდევნო სტუმრისთვის მისი მომზადება ნაკლები სიხშირით მოგიწევთ. ამასთან, სტუმრებისგან ნაკლებ მოთხოვნასა თუ შეტყობინებას მიიღებთ და უფრო სტაბილური შემოსავალი გექნებათ. როგორც მოკლევადიანი, ისე გრძელვადიანი სტუმრობების შემთხვევაში, ფასში უნდა გაითვალისწინოთ ისეთი ხარჯები, როგორიცაა, მაგალითად:

    • იპოთეკა ან ქირა. ერთი თვის ფასის დაწესებისას ამომავალ წერტილად შეგიძლიათ ეს თანხა აიღოთ.
    • რეგულარული ხარჯები. ფასში შეგიძლიათ გაითვალისწინოთ ყველაფერი, რის გადახდაც გიწევთ. მაგალითად, კომუნალური გადასახადები (წყლის, ბუნებრივი აირისა თუ ელექტროენერგიის საფასური), პერიოდული მომსახურებების (დასუფთავებისა თუ ბაღში სამუშაოების) ღირებულება, ასევე, იმ ნივთებისა თუ პროდუქტების ფასი, რომლებსაც ახვედრებთ სტუმრებს (დამატებითი საპონი, საჭმლის მოსამზადებლად აუცილებელი მინიმუმი და ა.შ.).
    • ტექნიკური მომსახურების ღირებულება. ფასში შეგიძლიათ ასახოთ ის თანხა, რომელსაც ხარჯავთ იმაზე, რომ საცხოვრებელი სტუმრებისთვის უფრო კომფორტულად აქციოთ — მაგალითად, რაიმეს შეკეთების ან რემონტის შემთხვევაში.

    „კარგი იქნება, თუ გამოთვლით, ჯამში რა ოდენობის შემოსავალს იღებთ თვეში იმ შემთხვევაში, როცა სტუმრები საცხოვრებელს დღიურად ჯავშნიან“, — გვირჩევს ოლივერი, და დასძენს: „შემდეგ უკვე გეცოდინებათ, როგორ ჩაასწოროთ ერთ თვეზე დაწესებული ფასდაკლება ისე, რომ უფრო საიმედო შემოსავალი გქონდეთ“.

    *Airbnb‑ს მიერ საერთაშორისო მასშტაბით შეგროვებული შიდა მონაცემების მიხედვით, 2021 წლის განმავლობაში დაჯავშნილი ხუთი ღამიდან ერთი მოდიოდა მინიმუმ 28 ღამის ხანგრძლივობის ჯავშანზე. 2021 წლის 31 დეკემბრის მდგომარეობით, საერთაშორისო მასშტაბით შეთავაზებული საცხოვრებლების ნახევარზე მეტის დაჯავშნა შესაძლებელი იყო ფასდაკლებით მინიმუმ ერთი თვით სტუმრობის შემთხვევაში.

    სტატიაში მოცემული ინფორმაცია, შესაძლოა, შეცვლილიყო მისი გამოქვეყნების შემდეგ.

    ყველაზე მნიშვნელოვანი

    • გრძელვადიან ჯავშნებზე გარკვეული ფასდაკლების დაწესებამ შეიძლება სტუმრებს საცხოვრებლის დაჯავშნისკენ უბიძგოს

    • ყოველ მომავალ კალენდარულ თვეზე ინდივიდუალური ფასების დაწესება შეგიძლიათ

    Airbnb
    11 მაი, 2021
    სასარგებლო იყო?

    სხვა საინტერესო

    სხვა საინტერესო

    გაეცანით სხვა თემებს