მხუთავი აირის ზემოქმედების რისკის შემცირება საცხოვრებელში

მხუთავი აირის ზემოქმედებამ, შესაძლოა, გამოიწვიოს ნახშირჟანგით მოწამვლა, რომელიც ზოგჯერ ფატალურად სრულდება. მხუთავი აირის დეტექტორები შექმნილია იმისთვის, რომ გაგაფრთხილოთ, როცა სივრცეში აირების დიდი რაოდენობა გროვდება.

მასპინძლებს ვურჩევთ, კარგად გააცნობიერონ მხუთავი აირის ზემოქმედებასთან დაკავშირებული რისკები და სტუმრების უსაფრთხოებისთვის დაამონტაჟონ შესაბამისი დეტექტორები. თუ მოქმედი განცხადება გაქვთ, მხუთავი აირის დეტექტორის მოთხოვნა Airbnb‑სგანაც შეგიძლიათ.

ნახშირჟანგი უფერული, უსუნო აირია. მისი გამოყოფა შეუძლია საწვავზე მომუშავე საყოფაცხოვრებო ტექნიკას, მაგალითად, ღუმელს, ქურას, წყლის გამაცხელებელს ან პორტატიულ გენერატორს. ის ნახშირისა თუ შეშის წვის შედეგადაც გამოიყოფა.

როცა საცხოვრებელ ან სხვა მომიჯნავე სივრცეში ნახშირჟანგი გროვდება, მისი შესუნთქვა მომწამვლელი ხდება როგორც ადამიანებისთვის, ისე შინაური ცხოველებისთვის. ნახშირჟანგის მაღალი კონცენტრაცია სასიკვდილოდ საშიშია. ნახშირჟანგი, ანუ ნახშირბადის მონოოქსიდი, განსხვავდება ნახშირორჟანგისგან (CO₂‑ისგან), რომელიც გაზიან სასმელებსა და ცეცხლმაქრებში გამოიყენება.

ნახშირჟანგის დაფიქსირება მხოლოდ დეტექტორს შეუძლია. მხუთავი აირის ერთი ან რამდენიმე დეტექტორის დამონტაჟების შემთხვევაში, სტუმრები და სხვები, მათ შორის, თქვენ და თქვენი ოჯახის წევრები), შეიტყობენ, როცა ნახშირჟანგის დონე დაშვებულზე მაღალია.

კვამლის სტანდარტული დეტექტორები არ აფიქსირებს მხუთავ არს, თუმცა არსებობს კომბინირებული მოწყობილობები, რომლებიც ამ მიზნით გამოდგება. მოწყობილობის შერჩევისას ყურადღებით გაეცანით მასზე დატანილ ეტიკეტს.

ნახშირჟანგი, შესაძლოა, გროვდებოდეს, თუ საცხოვრებელში არის ერთ‑ერთი შემდეგი:

• საყოფაცხოვრებო ტექნიკა, რომელიც მუშაობს ნახშირზე, ბენზინზე, ნავთზე, მეთანზე, ბუნებრივ აირზე, მაზუთზე, პროპანზე ან შეშაზე

• მომიჯნავე ავტოფარეხი (იმ შემთხვევაშიც კი, თუ საცხოვრებელში მხოლოდ ელექტრომოწყობილობებია)

• გენერატორი, რომელიც კარებთან ან ფანჯრებთან ახლოს გამოიყენება

• გაზის ან ნახშირის გრილი, რომელიც კარებთან ან ფანჯრებთან ახლოს გამოიყენება

• ბუხარი

სახანძრო სამსახურების ხელმძღვანელთა საერთაშორისო ასოციაცია და სხვა ექსპერტები გვირჩევენ, მხუთავი აირის დეტექტორი საცხოვრებლის თითოეულ სართულზე დავამონტაჟოთ.

ნახშირჟანგის კონცენტრაციის თავიდან აცილების მიზნით, სახანძრო სამსახურების ხელმძღვანელთა საერთაშორისო ასოციაცია გარკვეული დამატებითი ზომების მიღებასაც გვირჩევს. კერძოდ:

1. ყოველთვიურად შეამოწმეთ დეტექტორების გამართული მუშაობა. ბატარეები, როგორც წესი, უნდა ჩანაცვლდეს ერთ, ხუთ ან ათ წელიწადში ერთხელ. დეტალური ინფორმაცია მოცემული იქნება დეტექტორის უკანა მხარეს ან გამოყენების ინსტრუქციაში.

2. ყველა მოწყობილობა დამონტაჟებული უნდა იყოს ადგილობრივი რეგულაციებისა და მწარმოებლის მითითებების შესაბამისად. უმეტეს შემთხვევაში, მხოლოდ სპეციალისტებს აქვთ საწვავზე მომუშავე ტექნიკის დამონტაჟების უფლება.

3. საწვავზე მომუშავე აღჭურვილობა რეგულარულად უნდა შემოწმდეს და დასუფთავდეს. ღუმელი, ქურა, საშრობი, ასევე, საკვამლე‑სავენტილაციო არხები მუდმივ მოვლას საჭიროებს, რომ ყველაფერი სათანადოდ მუშაობდეს, საკმარისად განიავებული იყოს და არ ფიქსირდებოდეს ბზარებით, დაჟანგვით ან ლაქებით გამოწვეული დაზიანებები. .

4. რეგულარულად შეამოწმეთ კვამლსადენები თუ მილსადენები, რომლებიც გამოიყენება საყოფაცხოვრებო ტექნიკის (მაგ., წყლის გამაცხელებლის, ღუმელის, საშრობის და ა.შ.) მიერ — ისინი ღია და სუფთა უნდა იყოს.

5. ბოლომდე გახსენით ხოლმე სახშობი ან სავენტილაციო ხვრელი გათბობისთვის ბუხრის ან შეშასა თუ გრანულირებულ საწვავზე მომუშავე სხვა წყაროს გამოყენების შემთხვევაში. არაფერი დახუროთ ცეცხლის ბოლომდე ჩაქრობამდე.

6. მოუმზადეთ სტუმრებს მკაფიო მითითებები — დაურთეთ სტუმრის ცნობარს დეტალური ინფორმაცია საცხოვრებელში არსებული ტექნიკისა და სხვა ნივთების უსაფრთხო გამოყენების შესახებ. დატოვეთ ცნობარის ამობეჭდილი ეგზემპლარი თვალსაჩინო ადგილას, მაგალითად, ძირითად მაგიდაზე ან სამზარეულოს სამუშაო ზედაპირზე.

7. დაახვედრეთ სტუმრებს გადაუდებელი დახმარების სამსახურების ტელეფონის ნომრები (მაგალითად, სახანძროს, პოლიციისა და ახლომდებარე საავადმყოფოების).

მხუთავი აირის დეტექტორების არსებობის შესახებ განცხადებაში მითითება ხაზს გაუსვამს იმას, რომ სტუმრების უსაფრთხოების საკითხი თქვენთვის მნიშვნელოვანია. შესაბამისი მონაცემების მითითება შეგიძლიათ განცხადების „უსაფრთხოების მოწყობილობების“ სექციიდან. აღნიშნული ინფორმაცია მოცემული იქნება როგორც განცხადების გვერდზე, ისე სტუმრებისთვის დაბინავებამდე დაგზავნილ ელწერილებში.

სტუმრობის მსურველებს Airbnb‑ზე განთავსებული საცხოვრებლების გაფილტვრა მათში მხუთავი აირის დეტექტორის არსებობის მიხედვითაც შეუძლიათ. აქედან გამომდინარე, დეტექტორების დამონტაჟება და განცხადების ჩასწორება არა მხოლოდ უსაფრთხოების გაუმჯობესებაში, არამედ მეტი ჯავშნის მიღებაშიც დაგეხმარებათ.

წინამდებარე სტატიაში მოცემულია ზოგადი მითითებები უსაფრთხოებასთან დაკავშირებით. შესაბამისად, ის არ არის ამომწურავი. აუცილებლად გაითვალისწინეთ საცხოვრებელი ობიექტის უნიკალური თავისებურებები და გაიარეთ კონსულტაცია ადგილობრივი კანონმდებლობისა თუ სახანძრო უსაფრთხოების ექსპერტებთან.

სტატიაში მოცემული ინფორმაცია, შესაძლოა, შეცვლილიყო მისი გამოქვეყნების შემდეგ.