იდეალური სისუფთავის დაცვა საცხოვრებელში

იდეალურად სუფთა საცხოვრებლის შეთავაზება ხუთვარსკვლავიანი მასპინძლობის ყველაზე მნიშვნელოვანი კომპონენტია. მასპინძლებისთვის მოქმედი ძირითადი წესების თანახმად, Airbnb‑ზე განთავსებული ყველა ვარიანტი არა მხოლოდ სუფთა უნდა იყოს დაბინავებისას, არამედ საცხოვრებელში არაფერი უნდა უქმნიდეს საფრთხეს სტუმრების ჯანმრთელობას. მასპინძლები, რომლებსაც დასუფთავების პროცედურა სანიმუშოდ აქვთ ორგანიზებული, ყველაზე დიდ წარმატებას მიაღწევენ.

მნიშვნელობა არ აქვს, დასუფთავებაზე თავად ზრუნავთ თუ ვინმე გეხმარებათ, მთავარია, სტუმრებისთვის შეთავაზებული საცხოვრებელი ყოველთვის საგულდაგულოდ დაალაგოთ, სანამ ვინმეს უმასპინძლებთ.

თუ სტუმარი სააბაზანოში თმებს იპოვის ან მას სამზარეულოში ჭუჭყიანი ჭურჭელი დახვდება, ეს უარყოფითად აისახება სტუმრობაზე, რის გამოც, შესაძლოა, არასახარბიელო მიმოხილვა მიიღოთ ან საერთოდ დაკარგოთ ჯავშანი.

თუ საცხოვრებლის დასუფთავებაში სპეციალისტი გეხმარებათ, პირველ რიგში, დამოუკიდებლად მიალაგეთ იქაურობა, რომ ზუსტად იცოდეთ, რა უნდა შესრულდეს. არ დაგავიწყდეთ, საკმარისი დრო გამოყოთ ჯავშნებს შორის საგულდაგულო დასუფთავებისთვის. იპოვეთ კიდევ ერთი დამლაგებელი ან შეიმუშავეთ სათადარიგო გეგმა იმ შემთხვევისთვის, თუ ძირითად დამლაგებელს ამა თუ იმ დღეს არ ეცლება.

დასუფთავების პროცედურის გაწერისას დაიხმარეთ სხვა მასპინძლების შემდეგი რჩევები:

• პირველ რიგში, მოხსენით თეთრეული საწოლებს და დაიწყეთ სარეცხის რეცხვა, რომ, საჭიროების შემთხვევაში, რამდენიმე პარტია გარეცხოთ.
• მოაშორეთ ჭუჭყი და მტვერი ყველა ზედაპირს. განსაკუთრებული ყურადღება მიაქციეთ ზედაპირებს, რომლებსაც ხშირად ეხებიან — მაგალითად, დისტანციური მართვის პულტებსა და კარის სახელურებს.
• გაასწორეთ საწოლები, შეცვალეთ პირსახოცები, მოაწესრიგეთ დეკორატიული საბნები და ბალიშები, საჭიროების შემთხვევაში კი გამოიყენეთ საწმენდი წებოვანი გორგოლაჭი.
• გააღეთ ფანჯრები დასუფთავებისას და შემოუშვით სუფთა ჰაერი, თუ ამინდი ამის საშუალებას იძლევა.
• დაბოლოს, მოგავეთ და მორეცხეთ იატაკი, რომ მოაშოროთ მტვერი და ნარჩენები.

• ზედაპირებს უნდა მოშორდეს მტვერი და ჭუჭყი.
• იატაკები უნდა გაიწმინდოს მტვერსასრუტით ან მოიგავოს და მოირეცხოს.
• საცხოვრებლის სივრცეებში არ უნდა იყვნენ მწერები/მავნებლები და არც აბლაბუდიანი, ობიანი თუ დალაქავებული ადგილები შეინიშნებოდეს.
• თეთრეული და პირსახოცები უნდა იყოს ახალგარეცხილი, სუფთა და ლაქების გარეშე.
• საწოლები უნდა იყოს ხელახლა გასწორებული, გაბუებული და წებოვანი გორგოლაჭით გაწმენდილი.
• უნიტაზები, ნიჟარები, საშხაპე სისტემები თუ აბაზანები უნდა გაიწმინდოს და დეზინფიცირდეს.
• შამპუნის, ტანის გელის, თხევადი საპნის ან ჭურჭლის სარეცხი გელის კონტეინერები უნდა შეივსოს.
• სხვისი პირადი ნივთები სტუმრებს თვალში არ უნდა ხვდებოდეს.
• ჭურჭელი, ქვაბები/ტაფები თუ სამზარეულოს აქსესუარები უნდა გაიწმინდოს და შესაბამის ადგილას შეინახოს.
• სამზარეულოს ტექნიკა (მათ შორის, მაცივარი, ქურა და ღუმელი) უნდა გაწმინდოს და მზად იყოს გამოყენებისთვის. მაცივარში არ უნდა იყოს ძველი საჭმელი.
• ნაგავი უნდა გადაიყაროს.
• საცხოვრებელ სივრცეში უნდა იყოს სისუფთავის სუნი.