რა მოხდება განცხადების გამოქვეყნების შემდეგ?

გილოცავთ! განცხადების გამოსაქვეყნებლად ყველაფერი მზად გაქვთ. გამოქვეყნებული განცხადების Airbnb‑ზე ძიების შედეგებში პოვნას სტუმრობის მსურველები 24 საათის განმავლობაში შეძლებენ.

ჯავშნების მისაღებად სათანადოდ მომზადებული რომ იყოთ, შეასრულეთ ქვემოთ განმარტებული ბოლო რამდენიმე მოქმედება კალენდარსა და „განცხადებების“ ჩანართში.

განცხადების გამოქვეყნებისთანავე კალენდარში ყველა თარიღი დასაჯავშნად ხელმისაწვდომი იქნება, ამიტომ, გირჩევთ, დაუყოვნებლივ შეიტანოთ მასში საჭირო ცვლილებები ხელმისაწვდომობის კუთხით. დაბლოკეთ ის თარიღები, რომლებშიც ვერ შეძლებთ მასპინძლობას. მიუთითეთ დასაჯავშნად ხელმისაწვდომი პერიოდი — მაქსიმუმ მომდევნო 2 წელი. ამას გარდა, საშუალება გაქვთ, განსაზღვროთ ის, თუ რამდენი ხნით ადრე შეეძლოთ სტუმრებს ჯავშნების გაფორმება და რა დრო გჭირდებათ ჯავშნებს შორის.

სახლის წესები სტუმრობის მსურველებს გარკვეულ მოლოდინს უქმნის და ეხმარება, გადაწყვიტონ, რამდენად შესაფერისია მათთვის თქვენ მიერ განთავსებული საცხოვრებელი. დაადგინეთ სახლის წესები — მიუთითეთ სტუმრების მაქსიმალური რაოდენობა, სიმშვიდის საათები, ასევე, შესვლისა და გასვლის დრო.

ამას გარდა, შეგიძლიათ არჩიოთ სახლის სტანდარტული წესები, მაგალითად, დაშვებულია თუ არა:

• შინაურ ცხოველებთან ერთად სტუმრობა;
• ღონისძიებები;
• მოწევა, ვეიპინგი და ელექტროსიგარეტების მოხმარება;
• კომერციული ვიდეო‑ და ფოტოგადაღება.

დაფიქრდით, სტუმრობამდე რამდენი ხნით ადრე შეეძლოთ სტუმრებს ჯავშნის გაუქმება თანხის სრულად ან ნაწილობრივ დაბრუნებით. თქვენ საშუალება გაქვთ, დაადგინოთ გაუქმების წესები როგორც 28 ღამეზე ნაკლები ხანგრძლივობის ჯავშნებისთვის, ისე გრძელვადიანი — ზედიზედ 28 ან მეტი ღამის ხანგრძლივობის — სტუმრობებისთვის.

მნიშვნელოვანია გაუქმების ოპტიმალური წესების შერჩევა, რომ ჯავშნების გაუქმების ხშირი შემთხვევებიც აიცილოთ თავიდან და სტუმრობის ის მსურველებიც დააინტერესოთ, რომელთა გეგმებიც, შესაძლოა, შეიცვალოს. გაუქმების შედარებით მოქნილი წესების დადგენა, შესაძლოა, ჯავშნების რაოდენობის გაზრდაში დაგეხმაროთ.

განცხადების შექმნისას უკვე მონიშნეთ გარკვეული საყოფაცხოვრებო პირობები ყველაზე მოთხოვნადი ვარიანტების მოკლე სიიდან. გაითვალისწინეთ, რომ განცხადების გამოქვეყნების შემდეგ საშუალება გექნებათ, განავრცოთ საყოფაცხოვრებო პირობების ჩამონათვალი. ასარჩევად ხელმისაწვდომი იქნება საყოფაცხოვრებო პირობების დაახლოებით 150 ვარიანტისგან შემდგარი სრული სია.

სტუმრობის მრავალი მსურველი იყენებს ფილტრებს მათთვის საჭირო საყოფაცხოვრებო პირობების მქონე საცხოვრებლების საპოვნელად. რაც უფრო სრული ჩამონათვალი გექნებათ ამ კუთხით, მით უფრო მეტი ადამიანის ძიების შედეგებში მოხვდება თქვენი განცხადება, რაც საცხოვრებლის შესახებ უფრო მკაფიო წარმოდგენის შექმნასაც შეუწყობს ხელს.

სტატიაში მოცემული ინფორმაცია, შესაძლოა, შეცვლილიყო მისი გამოქვეყნების შემდეგ.