საფასო პოლიტიკის შემუშავება

ფასებისა და ხელმისაწვდომობის რეგულარული გადახედვა და კორექტირება დაგეხმარებათ როგორც კონკურენტუნარიანობის შენარჩუნებაში, ისე მასპინძლობის კუთხით დასახული მიზნების მიღწევაში. ამ სტატიაში გაგაცნობთ საფასო პოლიტიკის დასახვის რამდენიმე ხერხს.

ფასისა და ხელმისაწვდომობის დადგენისას რამდენიმე პრიორიტეტი უნდა განსაზღვროთ.

• განბლოკეთ მეტი ღამე: ამგვარად თქვენი განცხადება ძიების მეტ შედეგში მოხვდება. თუ პარამეტრები თარიღებს დაბლოკავს, მათ განსაბლოკად რჩევებს მიიღებთ. მაგალითად, თუ სტუმრობის მინიმალურ ხანგრძლივობად განსაზღვრულია 5 ღამე, ხოლო ჯავშნებს შორის 4 დაუჯავშნელი ღამე გაქვთ, მიიღებთ რჩევას, რომ შეამციროთ სტუმრობის მინიმალური ხანგრძლივობა შესაბამისი ღამეებისთვის.
• განაახლეთ ხელმისაწვდომობის პარამეტრები: ეს დაგეხმარებათ თქვენთვის მოსახერხებელი განრიგით მასპინძლობაში. მარტივად ჩაასწორეთ სტუმრობის ხანგრძლივობა, დრო სტუმრობამდე, მომზადების დრო და სხვა პარამეტრები.
• გაეცანით რეკომენდებულ ფასებსა და მსგავს განცხადებებს: ეს ხელსაწყოები დაგეხმარებათ კონკურენტუნარიანი ფასების დაწესებაში სხვადასხვა დღის, სეზონისა და განსაკუთრებული ღონისძიების მიხედვით. გონივრული ფასწარმოქმნის გამოყენების შემთხვევაში ნაჩვენები არ იქნება რეკომენდებული ფასები ან მსგავსი განცხადებები.

„მსგავსი საცხოვრებლების ფასებს ვეცნობი, ჩემსას რომ შევადარო. ხელსაყრელი ფასი არც ძალიან მაღალი უნდა იყოს და არც ზედმეტად დაბალი“, — ამბობს კარენი, სუპერმასპინძელი ნელსონიდან (კანადა).

ფასების კორექტირებისას გაითვალისწინეთ სტუმრების მიერ ჯამში გადასახდელი ფასი, რომელიც მოიცავს თქვენ მიერ დამატებულ გადასახადებს.

ზოგჯერ ყველაზე მოთხოვნადი საცხოვრებლების შემთხვევაშიც კი მცირდება ჯავშნების რაოდენობა. ქვემოთ გაგაცნობთ რამდენიმე ხერხს, რომ თქვენი განცხადება გამორჩეული იყოს.

• დააწესეთ ფასდაკლებები: ერთ კვირასა და თვეზე დაწესებული ფასდაკლებები დაგეხმარებათ კალენდრის შევსებასა და სტუმრების ხშირი ცვლით გამოწვეული საზრუნავის შემცირებაში. მეორე მხრივ, ბოლო წუთის ფასდაკლებები დააინტერესებს მათ, ვინც დაგეგმილ დაბინავებამდე 1‑28 დღით ადრე აფორმებს ჯავშნებს.
• შეამცირეთ დრო დაბინავებამდე: რაც უფრო მცირე იქნება დაბინავებამდე განსაზღვრული დრო, მით უფრო მეტი ალბათობით მიიღებთ ჯავშნებს. აირჩიეთ დრო, რომელიც მომზადებისთვის გჭირდებათ. შეგიძლიათ, სტუმრობის მსურველებს ჯავშნის გაფორმების დღესვე დაბინავების საშუალებაც კი მისცეთ.
• დაუშვით უფრო ხანმოკლე სტუმრობები: მინიმალური ხანგრძლივობის შემცირებით ხანმოკლე სტუმრობის მსურველებს დააინტერესებთ. სურვილისამებრ, შეგიძლიათ დაბინავების დღის მიხედვით დააწესოთ სტუმრობის მინიმალური ხანგრძლივობა (ღამეებში).

„შედარებით ხანმოკლე სტუმრობები სულ უფრო პოპულარული ხდება“, — ამბობს ჯიმი, სუპერმასპინძელი პალმ‑სპრინგზიდან (კალიფორნია, აშშ), და დასძენს: „როგორც წესი, ესენი ბოლო წუთს სპონტანურად გაფორმებული ჯავშნებია, ორი დღით დასასვენებლად. მოქნილი პირობები ყველას მოსწონს“.

Airbnb‑ზე არაერთი ხელსაწყოა, რომლებიც დაგეხმარებათ, სტუმრობაზე გაზრდილი მოთხოვნის პერიოდებში მაქსიმალური სარგებელი მიიღოთ. გავიხსენოთ რამდენიმე ტაქტიკა.

• ყურადღება მიაქციეთ დღესასწაულებსა და განსაკუთრებულ ღონისძიებებს: მეტი ჯავშანი და შემოსავალი რომ მიიღოთ, განაახლეთ დასაჯავშნად ხელმისაწვდომობა და ფასები დიდი კონცერტების, ფესტივალების, სპორტული ღონისძიებებისა თუ სხვა მნიშვნელოვანი თარიღების წინ. კალენდარში მონიშნულია ადგილობრივი დღესასწაულებისა და მნიშვნელოვანი ღონისძიებების უმეტესობა.
• დააწესეთ ფასდაკლება ადრეულ დაჯავშნაზე: გსურთ, დააინტერესოთ სტუმრობის მსურველები, რომლებიც ყველაფერს წინასწარ გეგმავენ? შეამცირეთ ფასი ჯავშნებისთვის, რომლებიც გაფორმდება დაბინავებამდე 1‑24 თვით ადრე.
• გაახანგრძლივეთ ხელმისაწვდომი პერიოდი: თუ დასაჯავშნად ხელმისაწვდომ პერიოდს სტანდარტულ სამ თვეზე მეტი ხნით გაზრდით, თქვენი განცხადება ძიების მეტ შედეგში მოხვდება. კალენდრის განბლოკვა შესაძლებელია 2 წლით ადრეც კი.

„ზოგჯერ საზაფხულო ჯავშნებს ერთი წლით ადრეც კი ვიღებ, ან საშობაოდ — ექვსი თვით ადრე“, — აღნიშნავს ენი, სუპერმასპინძელი ტარაგონიდან (ესპანეთი) და დასძენს: სტუმრები, როგორც წესი, არ აუქმებენ დიდი ხნით ადრე გაფორმებულ ჯავშნებს და ესეც მნიშვნელოვანია, რადგან შესაძლებელი ხდება მომავლის წინასწარ დაგეგმვა“.

ფასებსა და სხვა პარამეტრებს ყოველთვის თავად აკონტროლებთ. თქვენი შედეგები, შესაძლოა, განსხვავდებოდეს სხვა მასპინძლების შედეგებისგან.

ინტერვიუებში მონაწილეობისთვის მასპინძლებმა კომპენსაცია მიიღეს.

სტატიაში მოცემული ინფორმაცია, შესაძლოა, შეცვლილიყო მისი გამოქვეყნების შემდეგ.