ფასების დაწესება Airbnb‑ზე

Airbnb გთავაზობთ სამასპინძლო ხელსაწყოებსა და მრავალმილიონიან აუდიტორიას, ბიზნესი რომ განავითაროთ. ფასები მხოლოდ თქვენი გადასაწყვეტია, მათ შეცვლას კი ნებისმიერ დროს შეძლებთ.

როგორც საკუთარ სფეროში გამოცდილ პროფესიონალს, ალბათ, კარგად გესმით, რამდენად მნიშვნელოვანია მაღალხარისხიანი მომსახურებების უზრუნველყოფა კონკურენტუნარიან ფასებად. სწორედ ამიტომ, Airbnb‑ზე ფასების დაწესებისას, გირჩევთ, გაითვალისწინოთ რამდენიმე ფაქტორი.

• მსგავსი მომსახურებები: მოიძიეთ თქვენის მსგავსი მომსახურებები Airbnb‑სა და სხვა პლატფორმებზე, რომ გაარკვიოთ, რას აფასებენ მომსახურებებს სხვები.
• გაცნობითი ხასიათის ფასები: დაფიქრდით, ხომ არ ჯობს შედარებით დაბალი ფასით დაწყება, რომ Airbnb‑ს მეშვეობით პირველი სტუმრები დააინტერესოთ. ბრენდისა და რეპუტაციის განვითარების პარალელურად, რაშიც სტუმრებისგან მიღებული დადებითი შეფასებები და მიმოხილვები დაგეხმარებათ, ფასში ცვლილების შეტანის საშუალება გექნებათ.
• Airbnb‑ს გადასახადი: არ დაგავიწყდეთ მომსახურების გადასახადი, რომელსაც Airbnb მასპინძლებისგან იღებს თითოეული ჯავშნიდან (ის მითითებული იქნება ფასის დაწესებისას). აღნიშნული გადასახადი ხმარდება სამასპინძლო ხელსაწყოების შემუშავებას, მომხმარებელთა სადღეღამისო მხარდაჭერის უზრუნველყოფასა და სტუმრობის მილიონობით მსურველისთვის ხმის მიწვდენას Airbnb‑ზე განთავსებული მომსახურებების ფარგლებში.

შეთავაზებების დამატება სხვადასხვა (საწყის, სტანდარტულ და პრემიუმ) ფასად სტუმრობის მსურველებს მეტ არჩევანს მისცემს და დაგეხმარებათ, უფრო სწრაფად მიაღწიოთ შემოსავლის კუთხით დასახულ მიზნებს.

თქვენ მიერ დაწესებული ფასი უნდა შეესაბამებოდეს თითოეული შეთავაზების ფორმატს, სირთულესა და უნიკალურობას. მაგალითად, აშშ‑ში მყოფ ფოტოგრაფს შეუძლია ჩაატაროს ნახევარსაათიანი ფოტოსესია, რომლის ღირებულებაც 50 აშშ დოლარზე ნაკლებია; პერსონალური პორტრეტების ფოტოსესია, რომლის ღირებულებაც 50 აშშ დოლარიდან 150 აშშ დოლარამდეა, ასევე, საოჯახო ფოტოგადაღება, რომლის ღირებულებაც 150 აშშ დოლარზე მეტია.

სტუმრობის მსურველები, რომლებიც Airbnb‑ს მეშვეობით მომსახურებებს ეძებენ, ძიების შედეგებში თქვენ მიერ დაწესებულ ყველაზე დაბალ ფასს დაინახავენ. საწყის ფასად ხელმისაწვდომმა შეთავაზებამ, შესაძლოა, პირველი სტუმრობის მსურველთა ყურადღება მიიქციოს და თქვენი სხვა შეთავაზებებით დაინტერესება გამოიწვიოს.

თქვენ საშუალება გექნებათ, დააწესოთ ფასი ერთ სტუმარზე ან ფიქსირებული ფასი. აღნიშნული გავრცელდება თქვენს ყველა შეთავაზებაზე.

• ფასი ერთ სტუმარზე: ერთ სტუმარზე დაწესებული ფასი უნდა მოიცავდეს ყველა გადასახადსა და გასამრჯელოს. ამას გარდა, საშუალება გაქვთ, განსაზღვროთ მინიმალური ფასი ერთ ჯავშანზე. გაითვალისწინეთ, რომ შედარებით დაბალმა ფასმა, შესაძლოა, მეტი ადამიანი დააინტერესოს, რაც მეტ შემოსავალში აისახება. მაგალითად, აშშ‑ში 60 აშშ დოლარად 4 სტუმრისთვის გაფორმებული ჯავშანი უდრის 240 აშშ დოლარს, 45 აშშ დოლარად 8 სტუმრისთვის გაფორმებული ჯავშანი კი — 360 აშშ დოლარს.
• ფიქსირებული ფასი: ჯამური ფასი უნდა მოიცავდეს ყველა გადასახადსა და გასამრჯელოს სტუმრების ნებისმიერი რაოდენობისთვის, კონკრეტული შეთავაზებისთვის განსაზღვრული მაქსიმუმის ფარგლებში.

კონკურენტუნარიანი ფასის შენარჩუნების ერთ‑ერთი შესანიშნავი ხერხია ფასდაკლებების შეთავაზება სხვადასხვა ტიპის ჯავშნებისთვის.

• დროში შეზღუდული: დააწესეთ 5‑დან 50%‑მდე ფასდაკლება 30 დღით, პირველი ჯავშნების მიღებას რომ შეუწყოთ ხელი.
• ადრეულ დაჯავშნაზე: შესთავაზეთ 20%‑იანი ფასდაკლება სტუმრებს, რომლებიც მინიმუმ 2 კვირით ადრე გააფორმებენ ჯავშანს. ამით დააინტერესებთ მათ, ვინც ყველაფერს წინასწარ გეგმავს.
• დიდი ჯგუფებისთვის: განსაზღვრეთ ფასდაკლება დიდი ჯგუფებისთვის, რომ უფრო სწრაფად მიაღწიოთ მაქსიმალურ ტევადობას.

ფასდაკლებები იმოქმედებს თქვენ მიერ განთავსებული მომსახურების ყოველი დაჯავშნისას. თუ ერთზე მეტი ფასდაკლება გექნებათ განსაზღვრული, სტუმრობის მსურველებისთვის აისახება ის, რომელიც მათ ყველაზე მეტი თანხის დაზოგვაში დაეხმარება. ამასთან, ერთი ჯავშნის ფარგლებში ისინი რამდენიმე ფასდაკლებით ვერ ისარგებლებენ.

ყველა მასპინძელი, ფოტო და განცხადებაში მითითებული ცნობა უნდა პასუხობდეს Airbnb‑ზე წარმოდგენილი მომსახურებების მიმართ მოქმედ სტანდარტებსა და მოთხოვნებს.

სტატიაში მოცემული ინფორმაცია, შესაძლოა, შეცვლილიყო მისი გამოქვეყნების შემდეგ.