Airbnb‑ზე ფასების დაწესებაში გარკვევა

Airbnb‑ზე ხელმისაწვდომია 3 ტიპის ფასი: საბაზისო, შაბათ‑კვირის და ინდივიდუალური. მათი საერთო მიზანია, თქვენი უძრავი ქონების ობიექტი მთელი წელი გამორჩეული იყოს სხვებისგან და დაგეხმაროთ, მიაღწიოთ შემოსავლის კუთხით დასახულ მიზნებს.

სამივე ტიპის შემთხვევაში Airbnb გთავაზობთ პერსონალურად რეკომენდებულ ფასებს, რომლებიც ეფუძნება მდებარეობას, საყოფაცხოვრებო პირობებს, თქვენ მიერ ადრე მიღებულ ჯავშნებს, უახლეს ფასებს თქვენს რეგიონში და სხვა ფაქტორებს.

საბაზისო ფასი ნაგულისხმევი ფასია ყველა ღამისთვის თქვენს კალენდარში. მას თავიდანვე ირჩევთ „Airbnb სტარტერში“, შეცვლა კი ნებისმიერ დროს შეგიძლიათ ფასების პარამეტრებიდან.

საბაზისო ფასის რეკომენდაცია შემოთავაზებულ ფასთან ერთად ნაჩვენები იქნება თქვენ მიერ მითითებული მნიშვნელობის ქვემოთ. თუ განსხვავებული ფასის დაწესებას გადაწყვეტთ, შეეცადეთ, სწორი ბალანსი იპოვოთ თქვენი, როგორც მასპინძლის, ხარჯებსა და იმ თანხას შორის, რომლის გადასახდელადაც მზად არიან სტუმრები. ქვემოთ გთავაზობთ ინფორმაციას იმის შესახებ, თუ რა უნდა გაითვალისწინოთ ამ კუთხით.

• მასპინძლობის ხარჯები: გაითვალისწინეთ ისეთი ფაქტორები, როგორიცაა იპოთეკა, კომუნალური სერვისები, ტექნიკური მომსახურება და გადასახადები.
• ფასის ხარისხთან შეფარდება: დაფიქრდით, რა გამოარჩევს თქვენს განცხადებას — მაგალითად, პოპულარული საყოფაცხოვრებო პირობები, ადაპტირებული პირობები ანდა საცხოვრებლის ადგილობრივ ღირსშესანიშნაობებთან სიახლოვე.
• მსგავსი განცხადებები: გამოიყენეთ ფასების დაწესების ეს ხელსაწყო, რომ შეადაროთ დაჯავშნილი და დაუჯავშნელი საცხოვრებლების საშუალო ფასი თქვენი რეგიონის რუკაზე. მსგავსი განცხადებები არ იქნება ნაჩვენები, თუ გონივრულ ფასწარმოქმნას იყენებთ.
• სტუმრების მიერ გადასახდელი ჯამური ფასი: ნებისმიერი გადასახადი, რომლის დამატებასაც გეგმავთ (მაგალითად, დასუფთავების გადასახადი), აისახება ჯამურ ფასზე.

საწყის ეტაპზე შედარებით დაბალი საბაზისო ფასის მითითება, შესაძლოა, დაგეხმაროთ პირველი სტუმრების დაინტერესებასა და მიმოხილვების მიღებაში, რაც შემოსავლის კუთხით დასახულ მიზნებთან დაგაახლოებთ.

სურვილისამებრ, შეგიძლიათ გაზარდოთ ფასი შაბათ‑კვირებისთვის, კერძოდ, პარასკევისა და შაბათის ღამეებზე. ღამეების მიხედვით ფასის ცვლა მაქსიმალურად მეტი ჯავშნის მიღებაში შეგიწყობთ ხელს.

შაბათ‑კვირის რეკომენდებული ფასი ნაჩვენები იქნება თქვენ მიერ მითითებული მნიშვნელობის ქვემოთ. ის ასახავს საბაზისო ფასის პროცენტულ ზრდას. თუ შაბათ‑კვირის ფასს არ დააწესებთ, საბაზისო ფასი გავრცელდება კვირის ყველა დღეზე.

ინდივიდუალური ფასის დაწესება ნებისმიერ ღამეზე შეგიძლიათ. არჩეული ღამეების შემთხვევაში ის ჩაანაცვლებს საბაზისო თუ შაბათ‑კვირის ფასს.

ერთ ღამეზე რეკომენდებული ფასები კალენდრის თითოეული დღის ინდივიდუალური ფასის ქვემოთ აისახება, რაც დაგეხმარებათ, განასხვაოთ ფასები სხვადასხვა დღის, სეზონისა და განსაკუთრებული ღონისძიების მიხედვით.

თუ რეკომენდებულ ფასებს ვერ ხედავთ, ამის შესაძლო მიზეზებია:

• ჩართულია გონივრული ფასწარმოქმნა
• დაწესებული ფასი რეკომენდებულ დიაპაზონშია
• ფასდაკლებები ან პრომოაქციები უკვე დაწესებულია შესაბამისი ღამეებისთვის
• რეკომენდებული ფასების დასადგენად საკმარისი მონაცემები არ არის

თუ ფასების ავტომატურად კორექტირება გსურთ, გაააქტიურეთ გონივრული ფასწარმოქმნა.

ფასებსა და სხვა პარამეტრებს ყოველთვის თავად აკონტროლებთ. თქვენი შედეგები, შესაძლოა, განსხვავდებოდეს სხვა მასპინძლების შედეგებისგან.

სტატიაში მოცემული ინფორმაცია, შესაძლოა, შეცვლილიყო მისი გამოქვეყნების შემდეგ.