მაღალხარისხიანი ფოტოების შერჩევისა და დამატების ხერხები

ფოტოები ხელს უწყობს სტუმრობის იმ მსურველთა ყურადღების მიქცევას, რომლებიც Airbnb‑ზე სხვადასხვა ვარიანტს ეძებენ. სურათები უნდა ქმნიდეს მკაფიო და ზუსტ წარმოდგენას თქვენს მომსახურებაზე. ამასთან, სტუმრობის მსურველებსაც უნდა გაუჩნდეთ ჯავშნის გაფორმების სურვილი.

თქვენ მიერ გაზიარებული თითოეული ფოტო უნდა იყოს მაღალი ხარისხის — კერძოდ, რეკომენდებული გარჩევადობაა მინიმუმ 800 × 1200 პიქსელი, ხოლო ფაილის ზომა — მაქსიმუმ 10 მეგაბაიტი.

წარმოადგინეთ ფოტოები, რომლებიც:

• თავად გადაიღეთ ან ნებართვით გამოიყენება;
• კარგად განათებულია (სასურველია, ბუნებრივი განათების პირობებში);
• უბრალოა კომპოზიციისა და ფონის თვალსაზრისით;
• მოქცეულია ფოკუსში (მთავარი ობიექტი კი — ცენტრში);
• ასახავს როგორც ახლო კადრით გადაღებულ დეტალებს, ისე ფართო კუთხით აღბეჭდილ კომპოზიციებს.

არ წარმოადგინოთ ფოტოები, რომლებიც:

• წარმოადგენს აბსტრაქტულ გამოსახულებებს ან ზედმეტად ახლოდან გადაღებულ კადრებს;
• მოუწესრიგებელი ან ზედმეტად გადატვირთულია;
• ბნელია (ან ზედმეტად გადანათებულია ბლიცის გამო);
• წარმოადგენს ფოტოკოლაჟებს;
• წარმოადგენს ერთი და იმავე ფოტოს სხვადასხვა ვერსიას;
• ასახავს ლოგოებს ან ბრენდებს.

თუ რომელიმე ფოტოზე აღბეჭდილია ადამიანის სახე, მისი გამოყენების ნებართვა უნდა გქონდეთ.

მომსახურებების შესახებ განცხადებებში ფოტოები წარმოდგენილია 3 ადგილას: გარეკანის ფოტოს სახით, თქვენი შეთავაზებების სიასა და ფოტოგალერეაში.

წარმოადგინეთ მინიმუმ 5 ფოტო (მათ შორის, ერთი ფოტო თითოეული შეთავაზებისთვის). თუ სტუმრებს ფოტოგადაღების მომსახურებას სთავაზობთ, აირჩიეთ მინიმუმ 15 სურათი თქვენი პორტფოლიოსთვის.

ჩვენ შევამოწმებთ თქვენ მიერ წარმოდგენილ ფოტოებს, შემდეგ კი დავამტკიცებთ გამოსახულებებს, რომლებიც შეესაბამება ჩვენს სტანდარტებს. ქვემოთ გაგაცნობთ, რა უნდა წარმოადგინოთ თითოეული სექციისთვის.

გარეკანის ფოტო. ეს სურათი მოცემული იქნება თქვენი განცხადების ზედა ნაწილში. მისი მიზანია, სტუმრობის მსურველებს შეუქმნას წარმოდგენა იმის შესახებ, თუ რა ტიპის მომსახურებას სთავაზობთ მათ. ეფექტური გამოსახულება უნდა იყოს:

• ჰორიზონტალური;
• უბრალო და მოწესრიგებული;
• ცენტრირებული (რომ შესაძლებელი იყოს ყველა გვერდის ჩამოჭრა).

მოერიდეთ ისეთი სურათების გამოყენებას, რომლებზეც თეთრი სადა ფონი ან ადამიანების ახლო კადრით გადაღებული სახეებია.

თქვენი შეთავაზებები. შეთავაზებები არის ის, რასაც დაჯავშნიან სტუმრები. ჩათვალეთ, რომ ისინი ერთგვარი პრეისკურანტი ან მენიუა. დაამატეთ თითო‑თითო გამორჩეული სურათი, რომელიც ზუსტად ასახავს თქვენს თითოეულ შეთავაზებას. ამ ტიპის ფოტოები მცირე ზომით აისახება, ამიტომ შეარჩიეთ უბრალო, ადვილად აღსაქმელი კადრები. კარგ სურათებად ითვლება:

• ერთ ელემენტზე ფოკუსირებული გამოსახულებები სადა ფონით;
• კომპოზიციის თვალსაზრისით მსგავსი გამოსახულებები.

ფოტოგალერეა. ეს სექცია საშუალებას გაძლევთ, პოტენციურ სტუმრებს არა მხოლოდ აჩვენოთ ის, თუ რას სთავაზობთ მათ, არამედ თქვენი თავიც გააცნოთ. თქვენ მიერ გაზიარებული ყველა ფოტოს ნახვას სტუმრები ფოტოგალერეაში შეძლებენ. შეარჩიეთ ფოტოები, რომლებზეც აღბეჭდილია:

• პროცესი და მისთვის მზადება;
• გამოყენებული ხელსაწყოები, აღჭურვილობა ან ინგრედიენტები;
• თქვენი დაწესებულების მდებარეობა (თუ სტუმრებმა თავად უნდა მოგაკითხონ);
• გაწეული მომსახურების საბოლოო შედეგი (მაგალითად, როგორ მიირთმევენ სტუმრები მომზადებულ კერძებს).

წარმოდგენილი ფოტოების გამოყენების ნებართვა უნდა გქონდეთ. ამასთან, მათზე ზუსტად უნდა იყოს ასახული ის, თუ რა მომსახურებას მიიღებენ სტუმრები.

ყველა მასპინძელი, ფოტო და განცხადებაში მითითებული ცნობა უნდა პასუხობდეს Airbnb‑ზე წარმოდგენილი მომსახურებების მიმართ მოქმედ სტანდარტებსა და მოთხოვნებს.

თუ სტუმრებს მასაჟს ან სპა‑პროცედურას სთავაზობთ, განცხადებისთვის ფოტოების წარმოდგენა არ გჭირდებათ, რადგან თავად შევარჩევთ პროფესიონალურ ფოტოებს შესაბამისი მომსახურებების ილუსტრირებისთვის.

სტატიაში მოცემული ინფორმაცია, შესაძლოა, შეცვლილიყო მისი გამოქვეყნების შემდეგ.