ეფექტური სათაურისა და აღწერილობის შედგენა

სტუმრობის მსურველები, ხშირ შემთხვევაში ეძებენ შთაბეჭდილებებს, რომელთა ფარგლებშიც ისინი ქალაქს ადგილობრივივით შეიგრძნობენ. აქედან გამომდინარე, სათაურსა და აღწერილობაში უნდა იგრძნობოდეს არა მხოლოდ მდებარეობასთან თქვენი მჭიდრო კავშირი, არამედ ისიც, თუ რა უნიკალური გზით გააცნობთ სტუმრებს იქაურობის ავთენტიკურ მხარეს.

დაიწყეთ სათაურის შედგენა მოქმედებასთან დაკავშირებული ზმნით, რომელიც შეესაბამება იმას, რაც წინ ელით სტუმრებს. მოქმედების შემდეგ აღნიშნეთ დეტალები, რომლებიც სათაურს გამორჩეულობას შესძენს.

იყავით კონკრეტული და შეინარჩუნეთ სიზუსტე. სათაურის სიგრძე უნდა იყოს 50 სიმბოლო ან ნაკლები.

მოერიდეთ ისეთი ფრაზების მოხმობას, რომლებიც უკვე გამოიყენება სხვა ადგილობრივ განცხადებებში. ნუ მიუთითებთ სხვების სახელებსა თუ სავაჭრო ნიშნებს ნებართვის გარეშე.

გთავაზობთ შესანიშნავი სათაურების რამდენიმე მაგალითს:

• გამოაცხვეთ კრუასანები პარიზელ კონდიტერთან ერთად
• დაიჭირეთ ტალღები რიოში პროფესიონალ სერფერთან ერთად
• ხატეთ ეროვნულ გალერეაში ნამდვილი მხატვარივით

აღწერილობა უნდა ავსებდეს სათაურს. დაიწყეთ იმით, რაც, თქვენი აზრით, სტუმრობის მსურველებს ჯავშნის გაფორმებას მოანდომებს. შემდეგ აღნიშნეთ რამე თქვენი ბიოგრაფიიდან ანდა მდებარეობისა თუ ერთობლივი აქტივობის განსაკუთრებულობის შესახებ.

ჩამოაყალიბეთ ყველაფერი ისე, რომ მკითხველს თქვენი შეთავაზების ხელიდან გაშვება დაენანოს. შეინარჩუნეთ პირდაპირობა, ლაკონიურობა და ინფორმაციულობა.

ხაზი გაუსვით თქვენს კავშირს მდებარეობასთან — არ აქვს მნიშვნელობა, ეს წარმოშობას, საქმიანობას, აქტივობას თუ ამ ყველაფრის კომბინაციას ეხება. აღწერილობის სიგრძე უნდა იყოს 90 სიმბოლო ან ნაკლები.

გთავაზობთ შესანიშნავი აღწერილობების რამდენიმე მაგალითს:

• მოამზადეთ და დააგემოვნეთ შოკოლადი სან‑ფრანცისკოს ყურეში ადგილობრივი ინგრედიენტებით.
• აღმოაჩინეთ უძველესი არენა ადგილობრივთან ერთად, რომლის ოჯახიც შვიდი თაობაა, რომში ცხოვრობს.
• გაეცანით ნიუ‑იორკის ჰაილაინს გიდთან ერთად, რომელიც მის დამფუძნებელ ორგანიზაციაში მუშაობს.

ყველა მასპინძელი, ფოტო და განცხადებაში მითითებული ცნობა უნდა პასუხობდეს Airbnb‑ზე წარმოდგენილი შთაბეჭდილებების მიმართ მოქმედ სტანდარტებსა და მოთხოვნებს.

სტატიაში მოცემული ინფორმაცია, შესაძლოა, შეცვლილიყო მისი გამოქვეყნების შემდეგ.