ფასების დაწესების შესახებ

Airbnb გთავაზობთ სამასპინძლო ხელსაწყოებსა და მრავალმილიონიან აუდიტორიას, შემოსავლის კუთხით დასახულ მიზნებს რომ მიაღწიოთ. კონკურენტუნარიან ფასზე შეჯერება, დაგეხმარებათ, რომ შთაბეჭდილების შესახებ თქვენი განცხადება უფრო გამორჩეულად აქციოთ და მეტი სტუმარი დააინტერესოთ.

ფასები მხოლოდ თქვენი გადასაწყვეტია, მათ შეცვლას კი ნებისმიერ დროს შეძლებთ.

შთაბეჭდილების შესახებ ახალგანთავსებული განცხადებისთვის საწყის ეტაპზე შედარებით დაბალი ფასის მითითება, შესაძლოა, დაგეხმაროთ პირველი სტუმრების დაინტერესებასა და ადრეული შეფასებებისა თუ მიმოხილვების მიღებაში. დროთა განმავლობაში შეგიძლიათ ცვალოთ ფასი, შემოსავლის კუთხით დასახული მიზნების შესაბამისად.

Airbnb‑ზე ფასის დაწესებისას გაითვალისწინეთ ქვემოთ აღნიშნული რამდენიმე ფაქტორი.

• თქვენი ხარჯები: დაფიქრდით, რა გიჯდებათ დახარჯული დრო, მომარაგება და ლიცენზირება.
• მსგავსი შთაბეჭდილებები: მოიძიეთ თქვენის მსგავსი აქტივობები Airbnb‑სა და სხვა პლატფორმებზე, შემდეგ კი შეადარეთ ადგილობრივი ფასები, რომ შეჯერდეთ კონკურენტუნარიან ნიშნულზე.
• მომსახურების გადასახადი: არ დაგავიწყდეთ მომსახურების გადასახადი, რომელსაც Airbnb მასპინძლებისგან იღებს თითოეული ჯავშნიდან (ის მითითებული იქნება ფასის დაწესებისას). აღნიშნული გადასახადი ხმარდება სამასპინძლო ხელსაწყოების შემუშავებას, მომხმარებელთა სადღეღამისო მხარდაჭერის უზრუნველყოფასა და სტუმრობის მილიონობით მსურველისთვის ხმის მიწვდენას Airbnb‑ზე განთავსებული შთაბეჭდილებების ფარგლებში.

განსაზღვრეთ ჯგუფში სტუმრების მაქსიმალური რაოდენობა აქტივობის, მდებარეობისა და მჭიდრო ურთიერთობისთვის იდეალური სიდიდის მიხედვით. მაქსიმალური რაოდენობა გათვალისწინებული იქნება შთაბეჭდილების ყოველი შეთავაზებისას.

დააწესეთ ფასი ერთ სტუმარზე, ასევე, მინიმალური ფასი კერძო ჯგუფისთვის.

• ფასი ერთ სტუმარზე: აღნიშნული გულისხმობს თანხას, რომლის გადახდაც მოუწევს მონაწილეობის თითოეულ მსურველს. ფასი უნდა მოიცავდეს ყველა გადასახადსა და გასამრჯელოს. შედარებით დაბალმა ფასმა, შესაძლოა, მეტი ადამიანი დააინტერესოს, რაც მეტ შემოსავალში აისახება. მაგალითად, აშშ‑ში 60 აშშ დოლარად 4 სტუმრისთვის გაფორმებული ჯავშანი უდრის 240 აშშ დოლარს, 45 აშშ დოლარად 8 სტუმრისთვის გაფორმებული ჯავშანი კი — 360 აშშ დოლარს.
• მინიმალური ფასი კერძო ჯგუფისთვის: აღნიშნული გულისხმობს მინიმალურ თანხას, რომლის გადახდაც მოუწევს კერძო ჯგუფს. თუ ამ ტიპის ჯავშანი გაფორმდება, სხვა ვერავინ შეძლებს ამ კონკრეტულ თარიღში შესაბამისი დროის დაჯავშნას.

თქვენი კუთვნილი შემოსავლის ოდენობას პარამეტრების დაყენებისას შეიტყობთ.

კონკურენტუნარიანი ფასის შენარჩუნების ერთ‑ერთი შესანიშნავი ხერხია ფასდაკლებების შეთავაზება სხვადასხვა ტიპის ჯავშნებისთვის.

• დროში შეზღუდული: დააწესეთ 5‑დან 50%‑მდე ფასდაკლება 30 დღით, პირველი ჯავშნების მიღებას რომ შეუწყოთ ხელი.
• ადრეულ დაჯავშნაზე: შესთავაზეთ 20%‑იანი ფასდაკლება სტუმრებს, რომლებიც მინიმუმ 2 კვირით ადრე გააფორმებენ ჯავშანს. ამით დააინტერესებთ მათ, ვინც ყველაფერს წინასწარ გეგმავს.
• დიდი ჯგუფებისთვის: განსაზღვრეთ ფასდაკლება დიდი ჯგუფებისთვის, რომ უფრო სწრაფად მიაღწიოთ მაქსიმალურ ტევადობას.

ფასდაკლებები იმოქმედებს თქვენ მიერ განთავსებული შთაბეჭდილების ყოველი დაჯავშნისას. თუ ერთზე მეტი ფასდაკლება გექნებათ განსაზღვრული, სტუმრობის მსურველებისთვის აისახება ის, რომელიც მათ ყველაზე მეტი თანხის დაზოგვაში დაეხმარება. ამასთან, ერთი ჯავშნის ფარგლებში ისინი რამდენიმე ფასდაკლებით ვერ ისარგებლებენ.

ყველა მასპინძელი, ფოტო და განცხადებაში მითითებული ცნობა უნდა პასუხობდეს Airbnb‑ზე წარმოდგენილი შთაბეჭდილებების მიმართ მოქმედ სტანდარტებსა და მოთხოვნებს.

სტატიაში მოცემული ინფორმაცია, შესაძლოა, შეცვლილიყო მისი გამოქვეყნების შემდეგ.