მაღალხარისხიანი ფოტოების შერჩევისა და დამატების ხერხები

სტუმრობის მსურველები, ხშირ შემთხვევაში, ფოტოების საფუძველზე იღებენ გადაწყვეტილებას იმის შესახებ, თუ რომელი ვარიანტი დაჯავშნონ Airbnb‑ს მეშვეობით. სწორედ ამიტომ, თქვენ მიერ მათთვის შეთავაზებული შთაბეჭდილების ფოტოები უნდა იქცევდეს ყურადღებას, ქმნიდეს სათანადო სურათს და იწვევდეს მოლოდინს.

თქვენ მიერ გაზიარებული თითოეული ფოტო უნდა იყოს მაღალი ხარისხის — კერძოდ, რეკომენდებული გარჩევადობაა 800 × 1200 პიქსელი, ხოლო ფაილის ზომა — მაქსიმუმ 10 მეგაბაიტი. აღნიშნული შედეგები მიიღწევა სმარტფონთა უმეტესობის კამერით.

წარმოადგინეთ ფოტოები, რომლებიც:

• თავად გადაიღეთ ან ნებართვით გამოიყენება;
• ფერადია (და არა შავ‑თეთრი);
• კარგად განათებულია (სასურველია, ბუნებრივი განათების პირობებში);
• უბრალოა კომპოზიციისა და ფონის თვალსაზრისით;
• მოქცეულია ფოკუსში (მთავარი ობიექტი კი — ცენტრში);
• ასახავს როგორც ახლო კადრით გადაღებულ დეტალებს, ისე ფართო კუთხით აღბეჭდილ კომპოზიციებს.

არ წარმოადგინოთ ფოტოები, რომლებიც:

• ბნელია (ან ზედმეტად გადანათებულია ბლიცის გამო);
• ბუნდოვანი, მარცვლოვანი ან დაბალი გარჩევადობისაა;
• ზედმეტად დამუშავებული, გაფილტრული ან დამახინჯებულია;
• წარმოადგენს სელფებს ან დადგმულ კადრებს;
• წარმოადგენს ფოტოკოლაჟებს;
• წარმოადგენს ერთი და იმავე ფოტოს სხვადასხვა ვერსიას;
• ასახავს ლოგოებს ან ბრენდებს.

თუ მეტი ფოტო გჭირდებათ, სთხოვეთ მეგობრებს ან ოჯახის წევრებს მათი გადაღება აღნიშნული რჩევების გათვალისწინებით. ალტერნატივის სახით, შეგიძლიათ სტუმრებსაც სთხოვოთ, გაგიზიარონ მათ მიერ გადაღებული საუკეთესო კადრები და მოგცენ ნებართვა, გამოიყენოთ ისინი თქვენს განცხადებაში.

წარმოადგინეთ 5 ან მეტი ფოტო — იმდენი, რამდენიც საჭიროა ინტერესის აღძვრისა და სათანადო მოლოდინის შესაქმნელად.

შთაბეჭდილებების შესახებ განცხადებებში ფოტოები წარმოდგენილია 3 ადგილას: ბადეში, სტუმრობის გეგმასა და ფოტოგალერეაში. ამას გარდა, უნდა აირჩიოთ გარეკანის თვალწარმტაცი ფოტო, რომელსაც სტუმრობის მსურველები დაინახავენ ძიების შედეგებში Airbnb‑ზე.

ჩვენ შევამოწმებთ თქვენ მიერ წარმოდგენილ ფოტოებს, შემდეგ კი დავამტკიცებთ გამოსახულებებს, რომლებიც შეესაბამება ჩვენს სტანდარტებს. ქვემოთ გაგაცნობთ, რა უნდა წარმოადგინოთ თითოეული სექციისთვის.

ბადე. ოთხი ფოტო განცხადების ზედა ნაწილში ქმნის ე.წ. „ბადეს“. დაურთეთ მას ფოტოები, რომლებზეც აღბეჭდილია:

• ძირითად აქტივობაში ჩართული სტუმრები;
• თქვენ მიერ სტუმრების გაძღოლის პროცესი;
• მნიშვნელოვანი დეტალი, მაგალითად, ახლო კადრით გადაღებული აღჭურვილობა ან ინგრედიენტი;
• მდებარეობა (მაგალითად, ფართო კადრი, რომელზეც იგრძნობა ატმოსფერო).

სტუმრობის გეგმა. სტუმრობის გეგმა არის დღის ერთგვარი წესრიგი, რომლის დახმარებითაც სტუმრობის მსურველები წყვეტენ, რამდენად შეესაბამება თქვენი შეთავაზება მათ საჭიროებებს. სტუმრობის გეგმაში ასახული ფოტოები მცირე ზომისაა, ამიტომ შეარჩიეთ უბრალო კადრები სადა ფონით — დაურთეთ მას ფოტოები, რომლებზეც აღბეჭდილია:

• მომენტები, რომლებიც შეესაბამება ტექსტურ აღწერილობას;
• ადამიანები, ობიექტები და სხვა მარტივად აღსაქმელი დეტალები.

ფოტოგალერეა. თქვენ მიერ გაზიარებული ყველა ფოტოს ნახვას სტუმრები ფოტოგალერეაში შეძლებენ. ფოტოგალერეაში დემონსტრირებული უნდა იყოს ის, თუ რატომ იქნება მონაწილეობა საინტერესო და დასამახსოვრებელი. დაურთეთ მას ფოტოები, რომლებზეც აღბეჭდილია:

• სტუმრების ურთიერთქმედება თქვენთან, თანამასპინძლებთან (მათი არსებობის შემთხვევაში) და სხვა სტუმრებთან;
• სხვადასხვა რაკურსით გადაღებული (მათ შორის, სტუმრის თვალით დანახული) აქტივობები;
• ნივთები, რომელთა სამახსოვროდ წაღებაც არის შესაძლებელი (ასეთის არსებობის შემთხვევაში).

წარმოდგენილი ფოტოების გამოყენების ნებართვა უნდა გქონდეთ. ამასთან, მათზე ზუსტად უნდა იყოს ასახული ის, თუ რა ელით წინ სტუმრებს.

ყველა მასპინძელი, ფოტო და განცხადებაში მითითებული ცნობა უნდა პასუხობდეს Airbnb‑ზე წარმოდგენილი შთაბეჭდილებების მიმართ მოქმედ სტანდარტებსა და მოთხოვნებს.

სტატიაში მოცემული ინფორმაცია, შესაძლოა, შეცვლილიყო მისი გამოქვეყნების შემდეგ.