დაუბრკოლებლად მასპინძლობის ხერხები

სტუმრებს მოსწონთ, როცა მასპინძელი ცდილობს, რომ ყველაფერმა დაუბრკოლებლად ჩაიაროს. აღნიშნული მოიაზრებს ოპერატიულობას, მისასვლელი გზის მკაფიოდ განმარტებას, შთაბეჭდილების ზუსტად აღწერას, პუნქტუალურობასა და ორგანიზებულობას.

ისარგებლეთ შეტყობინებების მიმოცვლის ხელსაწყოებით, რომლებიც ხელმისაწვდომია Airbnb‑ზე — ოპერატიულად გამოეხმაურეთ სტუმრებისგან მიღებულ შეტყობინებებს როგორც შეხვედრამდე, ისე მის შემდეგ.

• გამოიყენეთ მზა პასუხები. აღნიშნული გულისხმობს შეტყობინებების მზა შაბლონებს, რომლებიც ავტომატურად ივსება კონკრეტული ინფორმაციით თქვენი განცხადებიდან და სტუმრების მიერ გაფორმებული ჯავშნებიდან, რომ კიდევ უფრო სწრაფად შეძლოთ პასუხის გაცემა. სურვილისამებრ, შეგიძლიათ მათი ჩასწორება და კონკრეტული დროისთვის (მაგალითად, ჯავშნის გაფორმებისთანავე) ავტომატურად გაგზავნის დაგეგმვა.
• დააყენეთ გაფრთხილებების მიღება. რაც უფრო მალე შეამჩნევთ სტუმრებისგან მიღებულ შეტყობინებებს, მით უფრო ოპერატიულად შეძლებთ გამოხმაურებას. განსაკუთრებული ყურადღება მიაქციეთ შეტყობინებებს შეხვედრის დროის მოახლოების პარალელურად.

„სწრაფი გამოხმაურება ძალზე მნიშვნელოვანია“, — ამბობს ჯიბი, რომელიც ბანგკოკში კულინარიის გაკვეთილს უძღვება, და დასძენს: „რაც უფრო სწრაფად მოაგვარებთ სტუმრების პრობლემას ან მიაწვდით მათ საჭირო ინფორმაციას, მით უფრო მეტ ნდობას მოიპოვებთ“.

დარწმუნდით, რომ სტუმრებმა ზუსტად იციან ის, თუ სად უნდა შეგხვდნენ.

• მოამზადეთ დეტალური მითითებები. სტუმრებმა შეხვედრის ადგილს უფრო სწრაფად რომ მიაგნონ და ადვილად გიცნონ, დეტალურად აღუწერეთ ყველაფერი.
• წინასწარ აცნობეთ სტუმრებს მისასვლელი გზა. დაწყების დრომდე ერთი ან ორი დღით ადრე შეგიძლიათ, სტუმრებს ავტომატურად გაუგზავნოთ შეტყობინება დეტალური მითითებებით. ამგვარად, მათ საკმარისი დრო ექნებათ შეკითხვების დასასმელად, თუ რამის დაზუსტება დასჭირდებათ.

დანი, რომელიც ბრუკლინის საფეხმავლო ტურს უძღვება, ჯავშნის გაფორმებისთანავე უგზავნის სტუმრებს ავტომატურ შეტყობინებას, რომელშიც მას წინასწარ აქვს ახსნილი, როგორაა მოწყობილი მეტროს სისტემა, სად უნდა შეხვდნენ და საიდან გაემგზავრონ. „ეს სტუმრებს დანარჩენი დღის მშვიდად დაგეგმვაში ეხმარება“, — ამბობს ის.

განცხადებაში დეტალურად უნდა იყოს აღწერილი ის, თუ რა ელით წინ სტუმრებს.

• დაამატეთ თანამასპინძლები. გადადით თქვენს კალენდარზე, შემდეგ კი დანიშნეთ თანამასპინძლები, რომლებთანაც თანამშრომლობთ, კონკრეტულ ღონისძიებებზე. ამგვარად, სტუმრებს ეცოდინებათ, ვინ უმასპინძლებს მათ.
• დაურთეთ არაზედაპირული ინფორმაცია. დაეხმარეთ სტუმრებს სათანადოდ მომზადებაში — აღწერილობებისა და ფოტოების გამოყენებით გაუზიარეთ მათ ყველაფერი, რაც აუცილებლად უნდა იცოდნენ. მაგალითად, შეგიძლიათ პირდაპირ აღნიშნოთ, რომ ლაშქრობისთვის შესაფერისი ფეხსაცმელი, წყალი ან სხვა ნივთები უნდა იქონიონ თან, ან დაქანებული კიბის ამსახველი ფოტოს ატვირთვით მიახვედროთ, რა ელით წინ.

„სტუმრებს ვაცნობებ, რომ ერთად გავივლით ბაზარში, სადაც ნაირ‑ნაირი ხმები და სურნელებია“, — გვიზიარებს გრასიელა, რომელიც მეხიკოში კულინარიის გაკვეთილს უძღვება, და დასძენს: „ამგვარად, ისინი მომზადებული არიან დღის პროგრამისთვის“.

უკვე გაწერილი გეგმის მიხედვით მოქმედება დაგეხმარებათ, ყველაფერმა უსიამოვნო სიურპრიზების გარეშე ჩაიაროს.

• დაგეგმეთ ყველაფერი წინასწარ. სათანადოდ მოამზადეთ ადგილი, სადაც სტუმრებს უმასპინძლებთ, ასევე, მოიმარაგეთ ყველაფერი აუცილებელი, რომ თავიდან აიცილოთ შეფერხებები. მაგალითად, იზრუნეთ იქაურობის სისუფთავეზე, ასევე, დარწმუნდით, რომ სკამებისა თუ სამუშაო სივრცეების რაოდენობა საკმარისია.
• იმოქმედეთ კომფორტულ ტემპში. მიჰყევით წინასწარ განსაზღვრულ განრიგს და გამოყავით დრო შესვენებისთვის აქტივობებს შორის.

„ძალიან დიდი დრო დავუთმე მარშრუტის შემუშავებას“, — გვიზიარებს ევრენი, რომელიც ლონდონის სოჰოს რაიონში მუსიკალურ-საფეხმავლო ტურს უძღვება, და დასძენს: „შემდეგ ის რამდენჯერმე გავიარე, სანამ არ დავრწმუნდი, რომ ყველაფერი გეგმის მიხედვით მიმდინარეობს“.

ყველა მასპინძელი, ფოტო და განცხადებაში მითითებული ცნობა უნდა პასუხობდეს Airbnb‑ზე წარმოდგენილი შთაბეჭდილებების მიმართ მოქმედ სტანდარტებსა და მოთხოვნებს.

სტატიაში მოცემული ინფორმაცია, შესაძლოა, შეცვლილიყო მისი გამოქვეყნების შემდეგ.