ფასის ხარისხთან შეფარდების ხერხები

სტუმრები ისეთ შთაბეჭდილებებს ეძებენ, რომელთა ფასიც ხარისხის შესაბამისია. დაფიქრდით, როგორ აქციოთ თქვენ მიერ შეთავაზებული შთაბეჭდილება კიდევ უფრო განსაკუთრებულად, რომ სტუმრებმა მაქსიმალური სიამოვნება მიიღონ გადახდილი თანხის სანაცვლოდ.

ფასის ხარისხთან კარგი შეფარდების თვალსაზრისით მნიშვნელოვანია ყველა ფაქტორი: უნიკალურობა, კომპეტენტურობა, კავშირი, მდებარეობა და საიმედოობა. მაღალრეიტინგული მასპინძლები გვიყვებიან, როგორ მივაღწიოთ ფასის ოპტიმალურ შეფარდებას ხარისხთან.

• შესძინეთ აქტივობებს პერსონალური ელფერი. ჩანართიდან „დღეს“ და ჯგუფური მიმოწერიდან შეგიძლიათ შეიტყოთ, რა ინტერესები აქვთ სტუმრებს, რომელ ენებზე საუბრობენ ისინი და ა.შ. შეეცადეთ, გაითვალისწინოთ მსგავსი ინფორმაცია აქტივობების ორგანიზებისას.
• გააუმჯობესეთ ყველაფერი, რაც შეგიძლიათ. უფრო კარგი ხარისხის მასალები, უფრო კარგად მომზადებული ისტორიები და სხვა გაუმჯობესებები, შესაძლოა, დადებითი შედეგის მომტანი იყოს. აღნიშნული გულისხმობს მცირე გაუმჯობესებებსაც კი, მაგალითად, ორგანული ინგრედიენტების გამოყენებაზე გადასვლას.
• შეეხმიანეთ სტუმრებს. გაუგზავნეთ სტუმრებს შეტყობინება შეხვედრის დასრულების შემდეგ, გადაუხადეთ მადლობა და გაუზიარეთ ფოტოები ან რეკომენდაციები. მსგავსი დამატებითი ძალისხმევა აგრძნობინებს სტუმრებს, რომ ნამდვილად ზრუნავთ მათზე.

„შეხვედრის დასრულების შემდეგ სტუმრებს ვუგზავნი რუკას პერსონალური რეკომენდაციებით“, — ამბობს ჯასტინი, რომელიც სიდნეისა და ბრიზბენში (ავსტრალია) საფეხმავლო ტურებს უძღვება, და დასძენს: „როგორც წესი, გიდები ამას არ აკეთებენ, სტუმრები კი აფასებენ მსგავს წვრილმანებს“.

ყველაზე საინტერესო შთაბეჭდილებებმაც კი შეიძლება მიიღოს დაბალი შეფასებები, თუკი სტუმრები ჩათვლიან, რომ ხარისხი ფასთან შეუსაბამო იყო. შეიტყვეთ, რა უნდა გაითვალისწინოთ ფასზე შეჯერებისას.

• შეადარეთ მსგავსი შთაბეჭდილებები. მოიძიეთ თქვენის მსგავსი აქტივობები Airbnb‑სა და სხვა პლატფორმებზე, შემდეგ კი შეადარეთ ადგილობრივი ფასები, რომ შეჯერდეთ კონკურენტუნარიან ნიშნულზე.
• იმოქმედეთ მოთხოვნის ცვლილების შესაბამისად. სცადეთ სხვადასხვა ფასის დაწესება დღის მონაკვეთის, კვირის დღეების, წელიწადის დროების ან განსაკუთრებული მოვლენების გათვალისწინებით. მაგალითად, შაბათ‑კვირას, შესაძლოა, სტუმრობის მეტი მსურველი იყოს, ვიდრე სამუშაო დღეებში.
• დააწესეთ ფასდაკლებები. კონკრეტულ პერიოდზე, ასევე, ადრეულ დაჯავშნასა და დიდი ჯგუფებისთვის ფასდაკლებების შეთავაზება დაგეხმარებათ სტუმრობის მსურველთა დაინტერესებასა და ადგილების შევსებაში. თუ ერთზე მეტი ფასდაკლება გექნებათ განსაზღვრული, სტუმრობის მსურველებისთვის აისახება ის, რომელიც მათ ყველაზე მეტი თანხის დაზოგვაში დაეხმარება.

„მნიშვნელოვანია, ადამიანებმა ყოველთვის იმაზე მეტი მიიღონ, ვიდრე ისინი მოელიან კონკრეტული ფასის თვალსაზრისით“, — გვიზიარებს ევრენი, რომელიც ლონდონის სოჰოს რაიონში მუსიკალურ-საფეხმავლო ტურს უძღვება, და დასძენს: „ჩემთვის ეს სულაც არ ნიშნავს იმას, რომ მარშრუტს მეტი მოსანახულებელი ადგილი უნდა დავამატო — უბრალოდ, ვცდილობ, უფრო საინტერესო ფაქტები და ისტორიები მოვუყვე სტუმრებს, რომ მათ მაქსიმალურად ისიამოვნონ“.

ყველა მასპინძელი, ფოტო და განცხადებაში მითითებული ცნობა უნდა პასუხობდეს Airbnb‑ზე წარმოდგენილი შთაბეჭდილებების მიმართ მოქმედ სტანდარტებსა და მოთხოვნებს.

სტატიაში მოცემული ინფორმაცია, შესაძლოა, შეცვლილიყო მისი გამოქვეყნების შემდეგ.