Airbnb‑ზე მომსახურებების განთავსების მსურველთა მიმართ მოქმედი მოთხოვნები

Airbnb‑ზე წარმოდგენილი მომსახურებები არაჩვეულებრივი სერვისებია, რომლებიც სტუმრობას უფრო განსაკუთრებულად აქცევს. მომსახურებები დაყოფილია სხვადასხვა კატეგორიად, რომელთა შორისაცაა შეფმზარეულის სერვისი, ფოტოგადაღება, მასაჟი, სპა‑პროცედურები, ინდივიდუალური ვარჯიში, თმის მოვლა, მაკიაჟი, ფრჩხილების მოვლა, მზა კერძები და საღონისძიებო მომსახურება.

მომსახურებები მოწმდება ხარისხზე. ამასთან, ყველა მასპინძელი, თანამასპინძელი თუ განცხადება უნდა პასუხობდეს ჩვენთან მოქმედ სტანდარტებსა და მოთხოვნებს. ქვემოთ შეიტყობთ, კონკრეტულად რა დაგვჭირდება თქვენგან, როგორც მასპინძლისგან ან თანამასპინძლისგან.

• ვინაობის დადასტურება: თქვენ უნდა დაადასტუროთ ვინაობა, ზოგიერთ შემთხვევაში კი გაიაროთ სხვა ტიპის შემოწმებები (მაგალითად, ბიოგრაფიული მონაცემების).
• ლიცენზიები და სერტიფიკატები: უნდა გქონდეთ მოქმედი ლიცენზიები, სერტიფიკატები და დაზღვევა სტუმრებისთვის შეთავაზებული მომსახურებისთვის. საჭიროების შემთხვევაში დაგჭირდებათ მათი ქონის დამადასტურებელი დოკუმენტების წარმოდგენა.
• გამოცდილება: საჭიროა მინიმუმ 2‑წლიანი გამოცდილება შესაბამის სფეროში, კარიერული მიღწევები და განათლება.
• რეპუტაცია: მოითხოვება შესანიშნავი რეპუტაცია ხარისხის კუთხით, რაც დასტურდება, მაგალითად, სტუმრებისგან მიღებული ბრწყინვალე გამოხმაურებით, მოპოვებული ჯილდოებით, პრესაში პუბლიკაციებით ან აღიარების სხვა ტიპის ნიშნებით.
• პორტფოლიო: განცხადების შექმნისას გააზიარეთ ფოტოები, რომლებზეც დემონსტრირებულია თქვენი სამუშაო გამოცდილება.* მაგალითად, მათზე შეიძლება ილუსტრირებული იყოს უშუალოდ რაიმე პროცესი და მისთვის მზადება, ხელსაწყოები ან აღჭურვილობა, ასევე, თქვენი სამუშაო ადგილი, თუ სტუმრებმა თავად უნდა მოგაკითხონ.

• ფოტოები: უნდა წარმოადგინოთ მინიმუმ 5 მაღალხარისხიანი ფოტო (მათ შორის, თითოეული შეთავაზების ამსახველი მინიმუმ ერთი ფოტო), რომელთა მეშვეობითაც შესაძლებელი იქნება მკაფიო, რეალისტური წარმოდგენის შექმნა თქვენი მომსახურების შესახებ.* თუ ფოტოგრაფი ხართ, მინიმუმ 15 ფოტო უნდა წარმოადგინოთ.
• სათაური: განმარტეთ, რას მოიცავს მომსახურება და ვინ სთავაზობს მას სტუმრებს. დასაწყისში გამოიყენეთ რამდენიმე ინფორმაციული სიტყვა. სახელი ბოლოს დაურთეთ.
• კომპეტენტურობა: აღნიშნეთ, კონკრეტულად რა გამოარჩევს თქვენეულ მიდგომას სხვებისგან. შეინარჩუნეთ პირდაპირობა, სისხარტე და კონკრეტიკა.
• შეთავაზებები: დაამატეთ მინიმუმ ერთი შეთავაზება. გირჩევთ, თითოეული განცხადების ფარგლებში მოამზადოთ 3 შეთავაზება სხვადასხვა (საწყის, სტანდარტულ და პრემიუმ) ფასად. აუცილებლად აღნიშნეთ კონკრეტული დეტალები (მაგალითად, ინგრედიენტები, ტექნიკა, აღჭურვილობა ან მასალები), რომ სტუმრობის მსურველებს ესმოდეთ, კონკრეტულად რას მიიღებენ გადახდილი თანხის სანაცვლოდ.

ახალი განაცხადები და მომსახურებების შესახებ დამტკიცებულ განცხადებებში შეტანილი ცვლილებები შემოწმებას გადის.

• ჯავშნები: პატივი ეცით სხვის დროს და შეეცადეთ, არ გააუქმოთ ჯავშნები საფუძვლიანი მიზეზის გარეშე.
• განცხადება: განცხადებაში მითითებული ცნობები უნდა იყოს ზუსტი. აღნიშნული მოიცავს როგორც მდებარეობასა და მოთხოვნებს სტუმრების მიმართ, ისე მომსახურების დაწყებისა და დასრულების საათებს.
• მიმოწერა: შეეცადეთ, დროულად გამოეხმაუროთ სტუმრებს. თუ მომსახურების გაწევისას თანაშემწე გეყოლებათ, საკმაო ხნით ადრე შეატყობინეთ ამის შესახებ სტუმრებს, რომ მათ, სურვილის შემთხვევაში, გადასახადის გარეშე შეძლონ ჯავშნის გაუქმება.
• უსაფრთხოება: ჩაატარეთ მომზადება ან ინსტრუქტაჟი ტრავმების თავიდან აცილების საკითხზე, უზრუნველყავით სუფთა აღჭურვილობა და შეიმუშავეთ სამოქმედო გეგმა საგანგებო სიტუაციებისთვის. საჭიროების შემთხვევაში დააწესეთ ასაკობრივი შეზღუდვები თქვენი სხვადასხვა შეთავაზებისთვის.
• მდებარეობა: გაუფრთხილდით ადგილს, სადაც მომსახურების გაწევა იგეგმება. არ დააზიანოთ სხვისი საკუთრება და მოაწესრიგეთ იქაურობა თქვენ შემდეგ.

შემოწმება მუდმივად მიმდინარეობს. ზემოაღნიშნულის გარდა, უნდა დაიცვათ როგორც Airbnb‑ს მომსახურების პირობები, ისე ძირითადი წესები მასპინძლებისთვის და უსაფრთხოდ მასპინძლობასთან დაკავშირებული მითითებები.

ჩვენი სტანდარტებისა და მოთხოვნების დარღვევის შემთხვევაში, შესაძლოა, ჯერ გაფრთხილებით შემოვიფარგლოთ, შემდეგ კი მოქმედება შევუჩეროთ როგორც განცხადებებს, ისე სამასპინძლო ანგარიშებს, ან წავშალოთ ისინი. სრულად გაეცანით Airbnb‑ზე წარმოდგენილი მომსახურებების მიმართ მოქმედ სტანდარტებსა და მოთხოვნებს.

* თუ სტუმრებს მასაჟს ან სპა‑პროცედურას სთავაზობთ, ამ მომსახურების საილუსტრაციო გამოსახულებებს შეარჩევთ წინასწარ დამტკიცებული პროფესიონალური ფოტოების გალერეიდან.

სტატიაში მოცემული ინფორმაცია, შესაძლოა, შეცვლილიყო მისი გამოქვეყნების შემდეგ.