განსაკუთრებული დასუფთავების 5‑ეტაპიანი პროცედურა Airbnb‑სგან

დღეს სისუფთავე განსაკუთრებით მნიშვნელოვანია, ამიტომ საცხოვრებლების ყველა მასპინძელმა უნდა დაიცვას Airbnb‑ს მიერ შემუშავებული განსაკუთრებული დასუფთავების 5‑ეტაპიანი პროცედურა — მის შესრულებაში ჩვენ დაგეხმარებით. ეს სტატია წარმოდგენას შეგიქმნით აღნიშნული 5‑ეტაპიანი პროცედურის შესახებ, ასევე, გაგაცნობთ მითითებებსა და რჩევებს, რომლებიც დასუფთავების სტანდარტების დაცვაში დაგეხმარებათ. ეს სასარგებლო რჩევები ეფუძნება განსაკუთრებული დასუფთავების სახელმძღვანელოს, რომელიც ჯანდაცვისა თუ მასპინძლობის სფეროს სპეციალისტებთან თანამშრომლობით მომზადდა თქვენი უსაფრთხოებისთვის.

ჩვენ მოგიმზადეთ რჩევები დასუფთავების პროცედურის 5 ეტაპის, მომზადების, დასუფთავების, სანიტარიული დამუშავებისა და მოწესრიგების, შესახებ.

• გაანიავეთ ოთახები დასუფთავებამდე და მისი მსვლელობისას. ჰაერის ცირკულაციის გაუმჯობესების მიზნით, ჯანდაცვის მსოფლიო ორგანიზაციის და აშშ‑ის დაავადებათა კონტროლისა და პრევენციის ცენტრების რეკომენდაციაა, დასუფთავებისა და სანიტარიული დამუშავების დაწყებამდე გავაღოთ გასასვლელი კარები/ფანჯრები და ჩავრთოთ ვენტილატორები. გაანიავეთ სივრცეები შეძლებისდაგვარად დიდხანს დასუფთავების დაწყებამდე და მის პროცესში.

• მოიმარაგეთ სათანადო საწმენდი საშუალებები. გირჩევთ, მხოლოდ ის საწმენდი და სადეზინფექციო ხსნარები გამოიყენოთ, რომლებიც რეგისტრირებულია ქიმიური ნივთიერებების ადგილობრივი მაკონტროლებელი ორგანოების (მაგალითად, ევროპის ქიმიკატების ან აშშ‑ის გარემოს დაცვის სააგენტოების) მიერ.

• გაეცანით ქიმიური საშუალებების უსაფრთხოდ გამოყენების წესებს. ყოველთვის ყურადღებით გაეცანით ამა თუ იმ საშუალების ეტიკეტზე დატანილ ინფორმაციას მოქმედი ნივთიერებებისა და გამოყენების წესის შესახებ.

• დაიბანეთ ხელები საპნითა და თბილი წყლით მინიმუმ 20 წამის განმავლობაში. თუ ვერ ახერხებთ, გამოიყენეთ ხელის ანტისეპტიკური საშუალება სპირტის მინიმუმ 60%‑იანი შემცველობით. უახლესი მითითებებისთვის მიმართეთ ადგილობრივ ოფიციალურ უწყებას.

• გაიკეთეთ დამცავი საშუალებები. ამა თუ იმ სივრცეში შესვლამდე გაიკეთეთ ერთჯერადი ხელთათმანები, ნიღაბი/პირბადე და სხვა დამცავი საშუალებები.

• გაიტანეთ ნაგავი. თავიდანვე იზრუნეთ ამაზე, რომ აიცილოთ ჯვარედინი დაბინძურება დასუფთავების შემდეგ. ჩააფინეთ ახალი პარკები სანაგვე ურნებში, რომ დასუფთავების შემდეგ მარტივად გადაყაროთ ხელსახოცები და სხვა ნარჩენები.

• შეაგროვეთ ჭუჭყიანი თეთრეული. მასპინძლებისგან შევიტყვეთ, რომ თეთრეულის რეცხვა ერთ‑ერთი ყველაზე შრომატევადი საქმეა. საცხოვრებელში შესვლისთანავე შეაგროვეთ ჭუჭყიანი თეთრეული და მოერიდეთ მათ დაბერტყვას, რამაც შეიძლება მიკრობების გავრცელებას შეუწყოს ხელი.

• დასუფთავებამდე ქსელიდან გამორთეთ ელექტრომოწყობილობები. უსაფრთხოების მოსაზრებებიდან გამომდინარე, გამოაერთეთ შტეფსელები როზეტებიდან. საყოფაცხოვრებო ტექნიკის ღილაკის მეშვეობით გამორთვა საკმარისი არ არის, რადგან მოწყობილობა მაინც ქსელთან დაკავშირებული რჩება. ელექტროენერგიის გამორთვა ავტომატური გამომრთველითაც შეგიძლიათ.

ყურადღება! საცხოვრებელში შესვლამდე რეკომენდებულია, გაიკეთოთ სუფთა დამცავი საშუალებები. ამას გარდა, გაეცანით ქიმიური საწმენდი საშუალებების უსაფრთხოდ გამოყენების წესებს ეტიკეტებზე.

დასუფთავება გულისხმობს ზედაპირებიდან მიკრობებისა და ჭუჭყის მოშორებას. მაგალითად, როცა სამზარეულოს სამუშაო მაგიდის და ქურის ზედაპირებს წმენდენ საპნიანი ტილოთი. აღნიშნული ეტაპი საცხოვრებლის სანიტარიულ დამუშავებამდე უნდა დასრულდეს.

• გარეცხეთ თეთრეული მაქსიმალურად მაღალ დასაშვებ ტემპერატურაზე. სუფთა თეთრეულის დაგებამდე დაიბანეთ ხელები.

• გარეცხეთ ჭურჭელი და დაცალეთ ჭურჭლის სარეცხი მანქანა. ჰიგიენის სტანდარტების დაცვის მიზნით, აუცილებელია სტუმრების მიერ გამოყენებული ჭურჭლის დარეცხვა. თუ ჭურჭლის სარეცხი მანქანა არ გაქვთ, მაშინ გარეცხეთ ჭურჭელი ცხელი წყლისა და ანტიბაქტერიული სარეცხი საშუალების გამოყენებით. ჯვარედინი დაბინძურება თავიდან რომ აიცილოთ, რეცხვის დაწყებამდე მოაგროვეთ ჭურჭელი ყველა ოთახიდან.

• გადაწმინდეთ მტვერი, გამოგავეთ ან მტვერსასრუტით გაწმინდეთ იატაკი. მტვერი ზემოდან ქვემოთ უნდა გაიწმინდოს და ჭუჭყის ხილული ნაკვალევი არ უნდა დარჩეს. მყარზედაპირიანი იატაკი უნდა გამოგავოთ, ხოლო რბილზედაპირიანი — მტვერსასრუტით გაწმინდოთ.

• გაწმინდეთ მყარი ზედაპირები საპნით და წყლით. გაწმინდეთ ყველა ზედაპირი, მოაშორეთ ჭუჭყი, ცხიმი, მტვერი და მიკრობები. მყარ ზედაპირებში იგულისხმება სამზარეულოს სამუშაო ზედაპირები, მაგიდები, ნიჟარები, კარადები და იატაკები. იატაკის მორეცხვა ოთახის ბოლო კუთხიდან დაიწყეთ შესასვლელის მიმართულებით, ხოლო გამოყენებული წყალი გაუწმენდავ ნიჟარაში ჩაღვარეთ.

• გაწმინდეთ რბილი ზედაპირები მწარმოებლის ინსტრუქციის შესაბამისად. რბილ ზედაპირებში იგულისხმება ხალიჩა, თეთრეული და გადასაკრავი მასალა. საჭიროებისამებრ, მოაცილეთ ყოველგვარი ჭუჭყი, შემდეგ კი შესაბამისი საწმენდი საშუალებებით გაწმინდეთ. რეცხვისთვის, შეძლებისდაგვარად, გამოიყენეთ სარეცხი მანქანა, მწარმოებლის ინსტრუქციის შესაბამისად.

ყურადღება! მიკრობების გავრცელების პრევენციის მიზნით, დასუფთავებისას არ შეეხოთ სახეს.

სანიტარიული დამუშავება გულისხმობს ბაქტერიებითა და სხვა მიკრობებით დაბინძურების დონის შემცირებას ქიმიური საშუალებების გამოყენებით. ამ ეტაპზე მასპინძლებმა სანიტარიულად უნდა დაამუშაონ ის ზედაპირები, რომლებსაც სტუმრები ყველაზე ხშირად ეხებიან. მაგალითად, ქიმიური სადეზინფექციო საშუალებები მასპინძლებმა უნდა მიასხურონ კარის სახელურებს, ჩამრთველებს და კარადებს.

• მყარი ზედაპირის გაწმენდის შემდეგ მიასხურეთ მას სადეზინფექციო საშუალება. სანიტარიული წესით დამუშავებისას განსაკუთრებული ყურადღება მიაქციეთ ზედაპირებს, რომლებსაც ხშირად ეხებიან (მაგალითად, კარის სახელურებს და ჩამრთველებს). ელექტრომოწყობილობების სანიტარიული წესით დამუშავებისას იხელმძღვანელეთ მწარმოებლის ინსტრუქციით.

• დატოვეთ სადეზინფექციო საშუალება ზედაპირზე მის ეტიკეტზე მითითებული დროის განმავლობაში. ეტიკეტზე მითითებული უნდა იყოს დრო, რომელიც საჭიროა ზედაპირის ეფექტური სანიტარიული დამუშავებისთვის. ამ დროის განმავლობაში ქიმიური საშუალება მიკრობების მაქსიმალურად დიდ რაოდენობას გაანადგურებს.

• აცადეთ ზედაპირებს თავისით გაშრობა. თუ ზედაპირს მითითებულ დროზე ადრე გააშრობთ, არ არსებობს გარანტია, რომ ქიმიური საშუალება შეძლებს პათოგენური ორგანიზმების განადგურებას, როგორც მითითებულია ეტიკეტზე.

ყურადღება! აუცილებლად გაეცანით ქიმიური საწმენდი საშუალებების უსაფრთხოდ გამოყენების წესებს ეტიკეტებზე.

თქვენთვის ხელმისაწვდომი იქნება ინდივიდუალური საკონტროლო სიები. აუცილებელია, გაეცნოთ რეკომენდაციებს თითოეული ოთახისთვის განკუთვნილ საკონტროლო სიებში და ისინი მათაც გაუზიაროთ, ვინც მასპინძლობასა და დასუფთავებაში გეხმარებათ.

• ზედაპირები, რომლებსაც ხშირად ეხებიან, აუცილებლად უნდა იყოს დამუშავებული სანიტარიული წესით. გამოასწორეთ, რაც გამოგრჩათ.

• ყურადღება მიაქციეთ ტექნიკურ პრობლემებსა თუ დაკარგულ ნივთებს. საკონტროლო სიის მიხედვით გადაამოწმეთ, ხომ არ არის საჭირო ნივთების შეცვლა ან მარაგის შევსება.

ჯვარედინი დაბინძურების თავიდან ასაცილებლად მნიშვნელოვანია, მომდევნო სტუმრის დაბინავებამდე დაასრულოთ საცხოვრებლის დასუფთავება და სანიტარიული დამუშავება.

• გადაყარეთ ან გარეცხეთ საწმენდი საშუალებები. გადაყარეთ სადეზინფექციო ხელსახოცები და სხვა ერთჯერადი საშუალებები. აუცილებლად გაწმინდეთ ყველა გამოყენებული ნივთი თუ ხელსაწყო. გარეცხეთ საწმენდი ტილოები სარეცხ მანქანაში, მაქსიმალურად მაღალ დასაშვებ ტემპერატურაზე.

• დასუფთავების შემდეგ ფრთხილად მოიხსენით დამცავი საშუალებები. გადაყარეთ ან გარეცხეთ დამცავი საშუალებები მათი გამოყენების წესების შესაბამისად.

• დაიბანეთ ხელები საპნითა და თბილი წყლით მინიმუმ 20 წამის განმავლობაში. თუ ვერ ახერხებთ, გამოიყენეთ ხელის ანტისეპტიკური საშუალება სპირტის მინიმუმ 60%‑იანი შემცველობით. უახლესი მითითებებისთვის მიმართეთ ადგილობრივ ოფიციალურ უწყებას.

• ვიზუალურად შეაფასეთ, რამდენად მზადაა ოთახები მომდევნო სტუმრისთვის. წარმოიდგინეთ, რომ პირველად შედიხართ საცხოვრებელში.

• დაუტოვეთ სტუმრებს საწმენდი საშუალებები. სტუმრებისგან შევიტყვეთ, რომ საცხოვრებლის დამოუკიდებლად დასუფთავება სურთ სტუმრობისას. მოუმზადეთ მათ საწმენდი საშუალებები — მაგალითად, ხელის ანტისეპტიკური საშუალება, ქაღალდის ერთჯერადი ხელსახოცები, მისასხურებელი სადეზინფექციო საშუალებები ან ხელსახოცები და ხელის საპნის მარაგი.

• შეავსეთ საწმენდი საშუალებების მარაგი. შეამოწმეთ მოქმედების ვადები და შეავსეთ მარაგი.

ყურადღება! შეინახეთ ქიმიური საწმენდი საშუალებები ბავშვებისთვის მიუწვდომელ ადგილას.

დასუფთავების 5-ეტაპიან პროცედურას უკვე გაეცანით, ამიტომ დროა, ის პრაქტიკაში გამოიყენოთ. დასუფთავების ახალი პროცედურის შესრულება რომ გაგიმარტივოთ, დასუფთავების ყოვლისმომცველი სახელმძღვანელო შევიმუშავეთ. სახელმძღვანელო მოიცავს ექსპერტებთან თანამშრომლობით მომზადებულ მითითებებს, უსაფრთხოებასთან დაკავშირებულ რჩევებსა და საკონტროლო სიებს. მასპინძლებს ვთხოვთ, განსაკუთრებული დასუფთავების 5-ეტაპიანი პროცედურა საცხოვრებლიდან ყოველი სტუმრის გასვლის შემდეგ შეასრულონ.

გაითვალისწინეთ, რომ დასუფთავებასთან დაკავშირებული მოთხოვნები, შესაძლოა, შეიცვალოს დროთა განმავლობაში. განსაკუთრებული დასუფთავების 5‑ეტაპიანი პროცედურა და დასუფთავების სახელმძღვანელო ჩვენი გაერთიანების წევრების ჯანმრთელობისა და კეთილდღეობისთვის მომზადდა.

შემდეგი: დასუფთავებასთან დაკავშირებული მითითებები მასპინძლებისთვის, რომლებიც სტუმრებს ცალკე ოთახს სთავაზობენ