კალენდრისა და დაჯავშნის პარამეტრების შესახებ

განსაზღვრეთ ფასები და დასაჯავშნად ხელმისაწვდომობა, სასურველი ჯავშნები რომ მიიღოთ.
ავტორი: Airbnb (1 დეკ, 2020)
3‑წუთიანი საკითხავი
განახლების თარიღი: 3 აპრ, 2023

კალენდრისა და დაჯავშნის პარამეტრების მეშვეობით გააკონტროლებთ, როდის და როგორ გსურთ სტუმრობის მსურველთათვის საცხოვრებლის შეთავაზება — მაგალითად, შეგიძლიათ გადაწყვიტოთ მხოლოდ შაბათ‑კვირას მასპინძლობა ან მთელი წლის განმავლობაში. აღნიშნული პარამეტრების სათანადოდ გამოყენება არა მხოლოდ სტუმრების საჭიროებების დაკმაყოფილებაში დაგეხმარებათ, არამედ მასპინძლობის კუთხით თქვენი საქმიანობის დაუბრკოლებლად წარმართვაშიც.

ამ სტატიაში გაგიზიარებთ, როგორ შეარჩიოთ კალენდრის ხელსაყრელი პარამეტრები.

დასაჯავშნად ხელმისაწვდომობის განსაზღვრა კალენდარში

კალენდარში თარიღების განბლოკვა შეგიძლიათ ორი წლით ადრეც კი. რაც უფრო მეტი თარიღი გექნებათ დასაჯავშნად ხელმისაწვდომი, მით უფრო დიდი არჩევანი ექნებათ სტუმრობის მსურველებს.

დასაჯავშნად ხელმისაწვდომი თარიღების მუდმივი განახლება კალენდარში თავიდან აგაცილებთ ჯავშნების გაუქმების აუცილებლობასა და საჯარიმო სანქციებს, სტუმრებს კი — მოულოდნელ უსიამოვნებებს.

კევინო, სუპერმასპინძელი მეხიკოდან (მექსიკა), ამბობს, რომ კალენდრისა და დაჯავშნის პარამეტრების მეშვეობით მას შეუძლია:

  • ფასების მორგება ადგილობრივ დონეზე არსებული მოთხოვნის მიხედვით. „ოქტომბერსა და ნოემბერში მეხიკოში მრავალი ფესტივალი იმართება, ამიტომ ფასებს ვზრდი. მიცვალებულთა მოხსენიების დღეს განსაკუთრებით ბევრი ადამიანი ჩამოდის“, — აღნიშნავს ის.
  • კონკრეტული საათების მითითება შესვლისა და გასვლისთვის. „სტუმრებს 14:00‑დან შეუძლიათ დაბინავება, ხოლო საცხოვრებლიდან გასვლას 12:00‑მდე ვთხოვ. მინდა, რომ სტუმრებს წასვლამდე დასვენებისა და საუზმისთვის საკმარისი დრო ჰქონდეთ. ამას გარდა, სპეციალური ადგილი გამოვუყავი, სადაც მათ უსაფრთხოდ შეუძლიათ ბარგის შენახვა, თუ გასვლის შემდეგ გარკვეული დრო ქალაქში ყოფნა უწევთ“, — გვიზიარებს კევინო.

  • იმ თარიღების დაბლოკვა, როცა მასთან მეგობრები, ოჯახის წევრები ან ხშირი სტუმრები ჩადიან. „რამდენიმე სტუმარი წელიწადის ერთსა და იმავე დროს ჩამომდის ხოლმე, ამიტომ წინასწარ ვბლოკავ შესაბამის თარიღებს“, — გვიხსნის კევინო.

ამას გარდა, დაჯავშნის პარამეტრების მეშვეობით შეგიძლიათ:

  • სტუმრებისთვის მოსამზადებლად საჭირო დროის არჩევა.
  • სტუმრობის მინიმალური და მაქსიმალური ხანგრძლივობის განსაზღვრა.

  • Airbnb კალენდრის სინქრონიზაცია თქვენს სხვა ონლაინკალენდრებთან. კალენდრის სინქრონიზაცია დაგეხმარებათ, თავიდან აიცილოთ ორმაგი ჯავშნები და ერთი სივრციდან მართოთ თქვენი განრიგი.

კალენდრიდან შეგიძლიათ სტუმრების მიერ გაფორმებული ჯავშნების გაკონტროლებაც. დეტალების ჩვენების ან დამალვის ფუნქციის დახმარებით მარტივად შეამოწმებთ, რომელი თარიღებია ხელმისაწვდომი დასაჯავშნად, ასევე, გაეცნობით ძველ ტარიფებს ერთ ღამეზე, ჩაასწორებთ ფასებსა და პრომოაქციებს სამომავლოდ და ა.შ.

სტუმრებისთვის დაჯავშნის მეთოდის შეთავაზება

სტუმრობის მსურველებს საცხოვრებლის დაჯავშნა შეუძლიათ ორგვარად: მომენტალურად ან დაჯავშნის მოთხოვნით.

დაჯავშნის მოთხოვნის ვარიანტი საშუალებას აძლევს მასპინძლებს, ინდივიდუალურად მიიღონ გადაწყვეტილება თითოეულ ჯავშანთან დაკავშირებით, მოთხოვნის მიღებიდან 24 საათის განმავლობაში. მსგავსი მიდგომა, მასპინძლებს, როგორც წესი, ურჩევნიათ, თუ:

  • არაპროგნოზირებადი გრაფიკი აქვთ პირადი ან პროფესიული მიზეზებიდან გამომდინარე.
  • სტუმრებს სთავაზობენ არასტანდარტულ საცხოვრებელს (მაგალითად, სოფლის სტილის სახლს, რომელსაც ჩვეული პირობები არ გააჩნია) და დეტალების წინასწარ შეთანხმება სურთ.
  • სტუმრებს მხოლოდ გრძელვადიანი ჯავშნების (28 ან მეტი ღამის ხანგრძლივობის) გაფორმების საშუალებას აძლევენ.

მომენტალური დაჯავშნა საშუალებას აძლევს სტუმრობის მსურველებს, რომლებიც თქვენ მიერ დაწესებულ ყველა მოთხოვნას აკმაყოფილებენ და სახლის წესებსაც ეთანხმებიან, მომენტალურად დაჯავშნონ ხელმისაწვდომი თარიღები. ამ ხელსაწყოს მეშვეობით, სტუმრობის მსურველებს საგრძნობლად უმარტივდებათ ჯავშნების გაფორმება, თქვენ კი ნაკლებად გიწევთ დაჯავშნის თითოეული მოთხოვნის ინდივიდუალურად განხილვა და დაკმაყოფილება.

„განცხადების გამოქვეყნებისას ერთი ცდა ჩავატარე: თავიდან დაჯავშნის ინდივიდუალურად მოთხოვნა ავირჩიე, მოგვიანებით კი — მომენტალური დაჯავშნა“, — იხსენებს კევინო, და დასძენს: „მომენტალური დაჯავშნის შემთხვევაში ჯავშნების რაოდენობამ საგრძნობლად მოიმატა“.

ამ და სხვა პარამეტრების მეშვეობით მეტად გააკონტროლებთ, როდის და როგორ დაიჯავშნება თქვენ მიერ განთავსებული საცხოვრებელი, რაც მასპინძლობისთვის თქვენთვის ხელსაყრელი კალენდრის შექმნაში შეგიწყობთ ხელს.

სტატიაში მოცემული ინფორმაცია, შესაძლოა, შეცვლილიყო მისი გამოქვეყნების შემდეგ.

Airbnb
1 დეკ, 2020
სასარგებლო იყო?

გაეცანით სხვა თემებს