მეტი 5‑ვარსკვლავიანი მიმოხილვის მიღების ხერხები

გაიცანით სუპერმასპინძლები, მეწარმეები და ინტერიერის დიზაინერები კეტრინ და ბრაიან უილიამსონები, რომლებიც თავიანთ ბლოგში Beginning in the Middle მასპინძლებს ურჩევენ, რაზე იზრუნონ, სტუმრებისგან 5‑ვარსკვლავიანი შეფასება რომ დაიმსახურონ. მათ 2000‑ზე მეტ სტუმარს უმასპინძლეს, ამ სტატიაში კი გაგვიზიარებენ, რა არის საჭირო დაუვიწყარი სტუმრობისთვის.

კეტრინი: „გაგვიმართლა, რომ Airbnb‑ს მეშვეობით საკუთარი ბიზნესის დაწყება და დიზაინის კომპანიის გახსნა შევძელით. ოჰაიოს შტატში, ბრაიანის მშობლიურ ქალაქ კოლუმბუსში, 2013 წელს გადმოვედით საცხოვრებლად ნიუ‑იორკიდან. მეტი სივრცე გვჭირდებოდა და ადგილიც შემოქმედებითი საქმიანობისთვის“.

ბრაიანი: „სამსაძინებლიანი სახლი შევიძინეთ, რისთვისაც სესხის აღება დაგვჭირდა, თუმცა მუდმივი თანამაცხოვრებლის ყოლის იდეა დიდად არ გვხიბლავდა“.

კეტრინი: „ჩემი ერთი მეგობარი იცნობდა მასპინძელს, რომელიც Airbnb‑ს მეშვეობით სტუმრებს თავისუფალ საძინებელს სთავაზობდა. გვირჩია, რომ ჩვენც გვეცადა. მაშინ არ ვიცოდით, რა იყო Airbnb. წელიწადში 10 ღამის ჯავშანიც რომ მიგვეღო, მე და ბრაიანი დიდ მიღწევად ჩავთვლიდით“.

ბრაიანი: „განცხადება გამოვაქვეყნეთ და ძალიან დიდი მოთხოვნა იყო. მალევე გადავწყვიტეთ, სტუმრებისთვის საცხოვრებელი მთლიანად შეგვეთავაზებინა. კოლუმბუსში ნაირ‑ნაირ მოტელებში ვჩერდებოდით, სანამ მეტ‑ნაკლებად ნორმალური ვარიანტი არ ვიპოვეთ, რომელშიც, ზოგჯერ, კვირაობით ვრჩებოდით. ყველა გავიცანით, ვინც იქ მუშაობდა, თუმცა, ასე, რა თქმა უნდა, დიდხანს ვერ გაგრძელდებოდა“.

კეტრინი: „ვალი გავისტუმრეთ და სხვა სახლი ვიყიდეთ. მომდევნო წლების განმავლობაში კიდევ რამდენიმე სახლი ვიყიდეთ და გავყიდეთ, საუკეთესო ვარიანტები კი Airbnb‑ს მეშვეობით შევთავაზეთ სტუმრებს. სამსახურიდან წამოვედით, სანაცვლოდ კი შევქმენით ინტერიერის დიზაინის სტუდია (Mix Design Collective), დასასვენებელი საცხოვრებლების ბრენდი (The Village Host) და ბლოგი (Beginning in the Middle)“.

ბრაიანი: „ჩვენთვის მნიშვნელოვანია, რომ თითოეულ სტუმარს განსაკუთრებული შთაბეჭდილებები ვაჩუქოთ, თანაც მასპინძლობის წყალობით ახლა სწორედ იმას ვაკეთებთ, რაც ყოველთვის გვსურდა. სულაც არ არის აუცილებელი, სტუმრებს უდახვეწილეს საცხოვრებელს სთავაზობდეთ — მთავარია, იზრუნოთ, რომ სტუმრობისას მათ განსაკუთრებულად იგრძნონ თავი. დადებითი მიმოხილვების რაოდენობისა და მოთხოვნის ზრდას მალევე შეამჩნევთ“.

კეტრინი: „5‑ვარსკვლავიანი მიმოხილვები რომ მიიღოთ, სტუმრებს ჯავშნის გაფორმებამდე უნდა შეუქმნათ სათანადო მოლოდინი. ჩვენი სახლები ძველია — მაქსიმალურად შევეცადეთ, მყუდრო, კომფორტული და ლამაზი ყოფილიყო, თუმცა ვაცნობიერებთ, რომ ისინი იდეალური არ არის. სწორედ ამიტომ, სტუმრებს შეძლებისდაგვარად მეტ ინფორმაციას ვაწვდით წინასწარ. მაგალითად, რომ ჭრაჭუნა იატაკი და კარები გვაქვს“.

ბრაიანი: „სააბაზანოებში სივიწროვეა. ერთ‑ერთ ოთახს მეზობელთან საერთო კედელი აქვს, რასაც ხაზგასმით აღვნიშნავთ, რომ სტუმრებმა არ იხმაურონ. არც წვეულებების გამართვას მივესალმებით“.

კეტრინი: „ანტიკვარული აბაზანა გვაქვს, ფეხებზე დგას და სტანდარტულზე მაღალია — ეს ინფორმაცია სასარგებლოა მათთვის, ვისაც ადაპტირებული პირობები სჭირდება. ზოგიერთ ადამიანს ამგვარი თავისებურებები არ ხიბლავს, ზოგისთვის კი სულ ერთია, თუმცა ჩვენი ადრესატი მაინც ის სტუმრებია, რომლებსაც ზუსტად ვიცით, რომ მოეწონებათ სახლიც და უბანიც“.

ბრაიანი: „სტუმრებთან სწრაფი და მკაფიო კომუნიკაცია 5‑ვარსკვლავიანი მიმოხილვების მიღების ერთ-ერთი მთავარი საწინდარია. ამგვარად სტუმრებს აგრძნობინებთ, რომ მათზე მუდმივად ზრუნავთ“.

კეტრინი: „სტუმრები თქვენთან მხოლოდ მცირე ხნით რჩებიან და, როგორც წესი, ყველას მნიშვნელოვანი გეგმები აქვს, ამიტომ სტუმრობის ნახევარი დრო ისე არ უნდა გაატარებინოთ, რომ თქვენგან პასუხს ელოდნენ ან პრობლემა მოუგვარებელი რჩებოდეთ. ჩემი ხასიათიდან გამომდინარე, ყველას 5 წუთის განმავლობაში ვპასუხობ ხოლმე, თუმცა თუ ფიქრობთ, რომ სტუმრებს დროულად ვერ გამოეხმაურებით, ელწერილებისა და შეტყობინებების დაგზავნაში შეგიძლიათ თანამასპინძელი დაიხმაროთ. რაც შეგვიძლია, ყველაფერს ვაკეთებთ, რომ ჩვენი მზრუნველობა ყოველთვის იგრძნობოდეს. 5‑ვარსკვლავიანი მიმოხილვები რომ დავიმსახუროთ, მზად ვართ, სტუმრებისთვის ზოგჯერ სხვა საქმეც გადავდოთ“.

ვრცლად თანამასპინძლობის შესახებ

კეტრინი: „დეკორი და მთელი საცხოვრებელი სივრცე სტუმრებს უნდა აგრძნობინებდეს, რომ ყველაფერი მათთვის არის. არ დაიშუროთ დრო და ძალისხმევა სივრცეების ავეჯით გასაფორმებლად, რომ საცხოვრებელს გამორჩეული იერი და დახვეწილი შტრიხები შესძინოთ“.

ბრაიანი: „ეს კი, რა თქმა უნდა, არ ნიშნავს, რომ მთელი სამზარეულო აუცილებლად მარმარილოში უნდა ჩასვათ ან ყველაფერი უმაღლესი დონის შეიძინოთ. ჩემი აზრით, ყველაზე მნიშვნელოვანია, საცხოვრებელი სუფთა, მოწესრიგებული და კომფორტული იყოს.

კეტრინი: „უნდა იგრძნობოდეს, რომ ყველაფერი სტუმრებისთვის მოამზადეთ. მაგალითად, გაიტანეთ პირადი ფოტოები, სამახსოვრო თუ წვრილმანი ნივთები, ნაგავი და ყველაფერი, რაც სხვის სახლში ყოფნის განცდას იწვევს“.

ბრაიანი: „აქვე აღვნიშნავ, რომ კომფორტული საწოლი ნამდვილად საჭიროა, თუმცა აქაც არ არის აუცილებელი, ძვირადღირებული ლეიბი იყიდოთ. სტუმრებს მატრასზე გადასაკრავ თხელ ლეიბსა და ორი სახის ბალიშს ვახვედრებთ: ერთი ბუმბულისაა, მეორე კი ბუმბულის შემცვლელი სინთეტიკური მასალის“.

კეტრინი: „რაც შეეხება თეთრეულს, ჩვენ მიერ შერჩეულ ზეწრებში გამოყენებულია მინიმუმ 300 ნართი. ბევრი სასტუმროც ამ სტანდარტს იცავს. მთავარია, კომფორტული ქსოვილი იყოს და კანს ზუმფარის ქაღალდივით არ აღიზიანებდეს. სტუმრები საცხოვრებელს დასასვენებლად და ღამის გასატარებლად ჯავშნიან, მშობლებმა კი ყველაზე კარგად ვიცით, რომ კარგი ძილი არცთუ ისე ხშირი სიამოვნებაა“.

კეტრინი: „გახსოვდეთ, რომ სტუმრებს არა მხოლოდ საცხოვრებელს, არამედ თქვენი ქალაქის ხიბლსაც უზიარებთ. მაქსიმალურად ვცდილობთ, საცხოვრებელს ინდივიდუალური შტრიხები შევმატოთ. თან კოლუმბუსი მცირე ბიზნესით ცხოვრობს, ყველანი ერთმანეთს ვეხმარებით და ეს ძალიან სასიამოვნოა“.

ბრაიანი: „ზოგჯერ სტუმრებს პატარა საჩუქრებს ვუტოვებთ ყველაფრიდან, რაც ადგილობრივებს გვიყვარს: მაგალითად, სასაჩუქრე ბარათებს ვახვედრებთ, რომ ადგილობრივ კაფეს ესტუმრონ და უბანსაც უკეთ გაეცნონ. შამპუნით, თმის კონდიციონერითა და სახის გელით ადგილობრივი კომპანია Cliff Original გვამარაგებს, ხელის ბუნებრივი საპნით კი — Glenn Avenue. ამას გარდა, გვაქვს წიგნები სერიიდან The Columbus Book Project, რომელიც ადგილობრივი ხელოვნების პოპულარიზაციას ემსახურება. კოლუმბუსი განსაკუთრებით პოპულარული ქალაქი არ არის, თუმცა შესანიშნავი ადგილია მოსანახულებლად, საცხოვრებლად, ბავშვობის გასატარებლად — აღმოსაჩენი აქ ნამდვილად ბევრია“.

კეტრინი: „გვინდა, კოლუმბუსი ყველას ჩვენი თვალით დავანახოთ. გვიხარია, როცა სტუმრებს წარუშლელი შთაბეჭდილებები რჩებათ და აღნიშნავენ, რომ კოლუმბუსში სიამოვნებით იცხოვრებდნენ“.

ბრაიანი: „კიდევ ერთ იდეას განვიხილავთ, სტუმრებს ადგილობრივები რომ გავაცნოთ: საცხოვრებლები სამხატვრო გალერეის ან ვახშმის კლუბის სტილში მოვაწყოთ და ნაკლებადცნობილი ადგილობრივი მხატვრების ნამუშევრები წარმოვაჩინოთ. ვფიქრობთ, თითოეულ საცხოვრებელში ორ-ორი ნახატი დავკიდოთ და რამდენიმე თვეში ერთხელ ვცვალოთ. ჩართეთ ფანტაზია და იფიქრეთ, როგორ შემატოთ საცხოვრებელს ადგილობრივი კოლორიტი“.

ბრაიანი: „რა ძალისხმევასაც არ უნდა იჩენდეთ იმისთვის, რომ სტუმრებისგან 5‑ვარსკვლავიანი შეფასებები დაიმსახუროთ, გაუთვალისწინებელი შემთხვევები მაინც გარდაუვალია და პრობლემების მოგვარებაც მოგიწევთ. ვინ იცის, შესაძლოა, კონდიციონერი გაფუჭდეს ან სტუმრებს იმედი გაუცრუვდეთ. ყველაფერი ხდება. ერთ-ერთი ყველაზე ცუდი შემთხვევა იყო, როცა ჩვენთან მილი გასკდა, სტუმრებს სახლი დაეტბორათ და გვირეკავდნენ…“

კეტრინი: „… მაგრამ ტელეფონი დამჯდარი მქონდა“.

ბრაიანი: „… ეს ამბავი კი მათი ქორწილის ღამეს ხდებოდა“.

კეტრინი: „ძალიან არასასიამოვნო სიტუაცია იყო, თუმცა ბევრი რამ გვასწავლა. როდესაც ასეთი რამ ხდება, მოუხადეთ სტუმარს ბოდიში და გადაწყვიტეთ, როგორ აჯობებს უსიამოვნების მოგვარება — ფულადი კომპენსაციის შეთავაზებით თუ ისეთი მცირე საჩუქრით, როგორიცაა, მაგალითად, ნამცხვარი, ღვინო ან რომელიმე რესტორნის ვაუჩერი. თუ სტუმრები ძლიერ ზარალდებიან, თანხას სრულად ვუბრუნებთ, თუმცა ასეთი შემთხვევები ძალიან იშვიათია“.

ბრაიანი: „ერთ ოქროს წესს ვიცავთ: სტუმრებს ზუსტად ისე ვმასპინძლობთ, როგორც გვსურს, რომ ჩვენ გვიმასპინძლონ. მასპინძლობა ერთგვარი შემოქმედებაა — ამ საცხოვრებლებში მთელი გულს ვდებთ, შემდეგ კი სტუმრებს ვუზიარებთ, ამიტომაც დაფასების შეგრძნება ძალიან ბევრს ნიშნავს ჩვენთვის“.

კეტრინი: „5‑ვარსკვლავიანი მიმოხილვების მიღება მხოლოდ ადასტურებს, რომ ტყუილად არ ვშრომობთ. რემონტის დროს, პირველ რიგში, ვფიქრობთ ადამიანებზე, რომლებიც ჩვენს ძალისხმევას დააფასებენ. ჩემი აზრით, თუ მხოლოდ უძრავ ქონებაში ჩადებულ თანხებზე იქნებით კონცენტრირებული, ადვილად გამოგეპარებათ ისეთი ნიუანსები, რომლებიც სტუმრებისთვის მნიშვნელოვანია“.

ბრაიანი: „მასპინძლობა არ არის მარტივი. ის დიდ შრომას მოითხოვს“.

კეტრინი: „მასპინძლობამ ბევრი რამ მოგვცა და შეცვალა ჩვენს ცხოვრებაში — ინტერიერის დიზაინისადმი ჩვენი ინტერესი საქმედ ვაქციეთ, პარალელურად კი აღმოვაჩინეთ, რომ ძალიან გვიტაცებს სტუმარ‑მასპინძლობა. საკუთარი ბიზნესი დავიწყეთ, რომლის წყალობითაც მუდმივად ვვითარდებით. ჩემი აზრით, Airbnb რომ არ ყოფილიყო, მცირე ბიზნესში ორიენტირება და წარმატების მიღწევა გაცილებით გაგვიჭირდებოდა. ახლა ჩვენი ნიშა გვაქვს ნაპოვნი — მოგვწონს სივრცეების გარდაქმნა და მათი სხვებისთვის გაზიარება“.

ბრაიანი: „მეწარმეობისა და შემოქმედებითი უნარების ერთდროულად გამოცდის საშუალება მოგვეცა. იდეალურია, როცა საყვარელ საქმეს აკეთებ და ამით სიამოვნებას იღებ“.

კეტრინი: „იმედი გვაქვს, ეს რჩევები დაგეხმარებათ 5‑ვარსკვლავიანი მიმოხილვების მიღებაში“.

წარმატებულ მასპინძლობას გისურვებთ!
კეტრინი, ბრაიანი და ბიანკა