კიდევ უფრო მეტი შესაძლებლობა Airbnb‑ზე

შარშან Airbnb გასცდა მხოლოდ საცხოვრებლებს — მას Airbnb‑შთაბეჭდილებები და Airbnb‑მომსახურებები შეემატა. Airbnb‑ს არსებობის ისტორიაში პირველად სტუმრობის მსურველებს საშუალება მიეცათ, პლატფორმის მეშვეობით არა მხოლოდ საცხოვრებელი დაეჯავშნათ, არამედ ქალაქიც გაეცნოთ ადგილობრივის დახმარებით და პირადი შეფმზარეულის მომსახურებითაც კი ესარგებლათ. ამ შესაძლებლობით მსოფლიო მასშტაბით უკვე მილიონობით ადამიანმა ისარგებლა.

ამ ზაფხულს კიდევ უფრო შორს მივდივართ: ვამატებთ მომსახურებების ახალ კატეგორიებს სტუმრობის თითოეული ეტაპის გასამარტივებლად, ასევე, ახალ შთაბეჭდილებებს, რომლებიც მხოლოდ Airbnb‑ზეა ხელმისაწვდომი, მათ შორის, ექსკლუზიურ წვდომას 2026 წლის FIFA‑ს მსოფლიო საფეხბურთო ჩემპიონატზე. ამას გარდა, Airbnb‑ს პლატფორმას დაემატება ბუტიკ‑ოტელები და დამოუკიდებელი სასტუმროები. ჩვენს აპს კი შეემატება ხელოვნურ ინტელექტზე დაფუძნებული ხელსაწყოები, რომლებიც დაეხმარება სტუმრებს იდეალური საცხოვრებლის პოვნაში, სტუმრობის დაგეგმვასა და საჭირო დროს დახმარების მიღებაში.

„მოგზაურობა მხოლოდ მოსახერხებელი კი არ უნდა იყოს, არამედ შინაარსიანიც. საუკეთესო მოგზაურობა გულისხმობს აღმოჩენებს, რაღაც ახლის სწავლას და შინ ოდნავ სხვა ადამიანად დაბრუნებას. სწორედ ამისთვის იღვწის Airbnb. ამ ზაფხულს ადამიანებს დაუვიწყარი შთაბეჭდილებების მიღების კიდევ უფრო მეტ შესაძლებლობას შევთავაზებთ. მათ ელით გასაოცარი საცხოვრებლები და ბუტიკ‑ოტელები, რომლებშიც თავს ისე იგრძნობენ, როგორც Airbnb‑ზე განთავსებულ ნებისმიერ სხვა საცხოვრებელში, ასევე, განუმეორებელი აქტივობები მსოფლიო საფეხბურთო ჩემპიონატის თემაზე და მომსახურებები, რომლებიც სტუმრობას გაუმარტივებთ“, — აღნიშნავს ბრაიან ჩესკი, Airbnb‑ს თანადამფუძნებელი და გენერალური დირექტორი.

აპის გახსნისთანავე სტუმრობის მსურველებს ახალ მთავარ გვერდზე დახვდებათ ყველაფერი. ამას გარდა, ისინი უფრო მარტივად აღმოაჩენენ შესანიშნავ განცხადებებს და დაგეგმავენ სტუმრობებს მეგობრებსა თუ ოჯახის წევრებთან ერთად.

• ხელოვნური ინტელექტის მიერ მომზადებული ამონარიდები მიმოხილვებიდან — Airbnb‑ზე სტუმრებისა და მასპინძლების მიერ დატოვებული 1 მილიარდზე მეტი მიმოხილვაა. სტუმრობის მსურველებს ამიერიდან აღარ მოუწევთ თითოეული მათგანის წაკითხვა ჯავშნის გაფორმებამდე. ჩვენი მოდელების მეშვეობით შეჯამდება მიმოხილვები თითოეული განცხადებისთვის და სტუმრობის მსურველთათვის ყველაზე მნიშვნელოვანი მომენტები გამოიყოფა, მაგალითად, სხვების მოსაზრებები მდებარეობასთან, საყოფაცხოვრებო პირობებთან, ხმაურთან, ოჯახებისთვის შესაფერისობასთან და სხვა საკითხებთან დაკავშირებით.
• შედარება ხელოვნური ინტელექტის მეშვეობით — როცა სტუმრობის მსურველები რამდენიმე საცხოვრებელს შეინახავენ თავიანთ რჩეულების სიაში, ჩვენ დავეხმარებით მათ ყველაზე შესაფერის ვარიანტზე შეჯერებაში. შედარების ახალ ხედში წარმოდგენილი იქნება ხელოვნური ინტელექტის მიერ მომზადებული შეჯამება თითოეული საცხოვრებლისთვის მთავარი აქცენტით მდებარეობაზე, საუკეთესო საყოფაცხოვრებო პირობებსა და სხვა საკითხებზე. ხელმისაწვდომი გახდება წლის ბოლოსკენ.
• საზიარო გეგმა — ჩვენ ვამარტივებთ სტუმრობის ჯგუფურად დაგეგმვის პროცესს. „სტუმრობების“ ჩანართში მოცემული იქნება განახლებული რუკა, რომელზეც აღნიშნული იქნება როგორც სტუმრების მიერ დაჯავშნილი საცხოვრებლები, ისე ახლომახლო რესტორნები, შთაბეჭდილებები და დროის გატარების სხვა ვარიანტები (საცხოვრებლიდან სავალი დროის მითითებით). სტუმრებს საშუალება აქვთ, შეინახონ მოსანახულებელი ადგილები, ან პირდაპირ საზიარო გეგმას დაამატონ ისინი, რომ სტუმრობის ყველა მონაწილემ შეიტანოს საკუთარი წვლილი დაგეგმვის პროცესში.
• ნაცნობები და სამოგზაურო რუკა — საუკეთესო სამოგზაურო რეკომენდაციებს ადამიანი იღებს მათგან, ვისაც ის ყველაზე მეტად ენდობა. სწორედ ამიტომ, სტუმრებს შეუძლიათ მეგობრებისა და ოჯახის წევრების დამატება „ნაცნობების“ სახით, შემდეგ კი ახალი სამოგზაურო რუკის გამოყენება, რომ ნახონ, სად იმყოფებოდნენ მათი ნაცნობები Airbnb‑ს მეშვეობით და სად აპირებენ მოგზაურობას მომავალში. ნებისმიერ ცალკეულ სტუმრობაზე შეხებით გამოჩნდება, რა დაჯავშნეს ნაცნობებმა და როგორი მიმოხილვა დატოვეს. ამას გარდა, სტუმრები ნაცნობებისთვის პირადად მიწერასაც შეძლებენ რჩევების მისაღებად. ხელმისაწვდომი გახდება ზაფხულის ბოლოს.
• ხელოვნური ინტელექტის მიერ უზრუნველყოფილი მხარდაჭერა მსოფლიო მასშტაბით — თუ სტუმრობის პერიოდში დახმარების მიღება გახდება საჭირო, სტუმრების განკარგულებაში იქნება ხელოვნური ინტელექტის ბაზაზე მომუშავე ასისტენტი, რომელიც სამოგზაურო სფეროში საუკეთესო დამხმარე ასისტენტად ითვლება ხელოვნური ინტელექტის ბაზაზე.¹ ასისტენტი ახლა ხელმისაწვდომია 11 ენაზე. ამასთან, მისთვის ცნობილია სტუმრობის სხვადასხვა დეტალი, რის საფუძველზეც ის სტუმრებს შესთავაზებს ინტერაქტიურ ბარათებს, რომელთა მეშვეობითაც პირდაპირ ჩატში იქნება შესაძლებელი სხვადასხვა პრობლემის მოგვარება.² წლის ბოლოსთვის ხელოვნური ინტელექტის ბაზაზე მომუშავე ასისტენტს ხმოვანი ფუნქციაც დაემატება, რომ სტუმრებმა პასუხების სწრაფად მიღება სატელეფონო ზარის მეშვეობითაც შეძლონ.

შთაბეჭდილებები და მომსახურებები ამიერიდან Airbnb‑ს მეტ სექციაში აისახება. დაიხმარეთ სტატიაში მოცემული რჩევები, რომ თქვენი განცხადება უფრო დიდი ალბათობით მოხვდეს როგორც ახალ მთავარ გვერდზე, ისე „სტუმრობების“ ჩანართში.

• დეტალები განცხადებაში — სრულად შეავსეთ განცხადება და დაამატეთ საკმარისი რაოდენობის ხარისხიანი ფოტოები, რომლებიც სათანადოდ წარმოაჩენს იმას, რასაც სტუმრებს სთავაზობთ.
• კალენდარი — განბლოკეთ ყველა ის თარიღი და დრო, როცა მასპინძლობა შეგიძლიათ. შეეცადეთ, მაქსიმალურად დიდი პერიოდი მოიცვათ.
• ფასები — დააწესეთ შეძლებისდაგვარად მეტი ფასდაკლება, სტუმრობის მსურველებს თქვენგან საუკეთესო შეთავაზება რომ ჰქონდეთ.

შესანიშნავი სტუმრობა დაბინავებამდე იწყება. სწორედ ამიტომ, ჩვენს პლატფორმას ემატება მომსახურებები სტუმრობის თითოეული ეტაპისთვის — დანიშნულების ადგილზე ჩასვლის მომენტიდან იქაურობის დატოვებამდე. და ეს იმ ახალი მომსახურებების მხოლოდ ნაწილია, რომელთა დაჯავშნასაც სტუმრები წელს შეძლებენ Airbnb‑ს მეშვეობით.

• სურსათის ადგილზე მოტანა — სტუმრებს Airbnb‑ს მეშვეობით შეუძლიათ სურსათის Instacart‑ით მოტანის შეკვეთა აშშ‑ის 25‑ზე მეტ ქალაქში და პროდუქტის მიღება როგორც უშუალოდ დაბინავების შემდეგ, ისე სტუმრობის პერიოდში. ზოგან მასპინძლებს სტუმრების შეკვეთის ჩაბარებაც კი შეუძლიათ, რომ დაბინავებამდე შეავსონ მარაგი სამზარეულოში. Airbnb‑ზე რეგისტრირებული სტუმრები ისარგებლებენ უფასო მოტანითა და 10$‑იანი ფასდაკლებით მინიმუმ 50$‑ის ღირებულების შეკვეთების შემთხვევაში.³
• აეროპორტიდან ტრანსფერი — სტუმრებს საშუალება აქვთ, Welcome Pickups‑ის მეშვეობით დაჯავშნონ კერძო ტრანსფერი ავტომობილით თქვენ მიერ მათთვის შეთავაზებული საცხოვრებლის მიმართულებით და პირიქით. მძღოლი გააკონტროლებს სტუმრის ავიარეისს და მას ტერმინალთან დახვდება. Airbnb‑ზე რეგისტრირებული სტუმრები ისარგებლებენ 20%‑იანი ფასდაკლებით ყოველ მგზავრობაზე.⁴ მომსახურება უკვე ხელმისაწვდომია მსოფლიოს 160‑ზე მეტ ქალაქში.
• ბარგის შენახვა — Bounce‑თან ჩვენი პარტნიორობის წყალობით, სტუმრებს შეუძლიათ ბარგის შენახვა დაბინავებამდე ან სტუმრობის დასრულების შემდეგ. აპის მეშვეობით ისინი შეძლებენ როგორც ბარგის შესანახად ჩაბარების უახლოესი პუნქტების პოვნას, ისე იმის გარკვევას, თუ რამდენად შორსაა ესა თუ ის პუნქტი საცხოვრებლიდან. Airbnb‑ზე რეგისტრირებული სტუმრები ისარგებლებენ 15%‑იანი ფასდაკლებითა⁵ და 175 ქალაქში მდებარე 15 000‑ზე მეტ პუნქტზე წვდომით.
• ავტომობილის დაქირავება — Airbnb‑თი მოსარგებლე სტუმრების თითქმის მეოთხედი სტუმრობის პერიოდში ავტომობილს ქირაობს.⁶ ზაფხულიდან მათ საშუალება ექნებათ, პირდაპირ აპიდან იპოვონ დასაქირავებლად შემოთავაზებული ავტომობილები. სტუმრებს ვაჩვენებთ ავტომობილების გაქირავების იმ პუნქტებს, რომლებიც თქვენ მიერ მათთვის შეთავაზებულ საცხოვრებელთან ახლოს მდებარეობს, ასევე, ვურჩევთ მათი ჯგუფისთვის შესაფერის ვარიანტებს. Airbnb‑ს მეშვეობით ავტომობილის პირველი დაქირავებისას ისინი დაიბრუნებენ 20%‑იან ბონუსს მომდევნო საცხოვრებლის, შთაბეჭდილების ან შერჩეული მომსახურებების დასაჯავშნად.

სტუმრებს ძალიან მოსწონთ Airbnb‑ზე წარმოდგენილი შთაბეჭდილებები. ამას ადასტურებს ის ფაქტი, რომ საშუალო შეფასება, რომელსაც ისინი იღებენ 5‑დან 4,93 ვარსკვლავია.⁷ ამ ზაფხულს ადგილობრივი ექსპერტების მიერ ორგანიზებულ ათასობით ახალ შთაბეჭდილებას დავამატებთ სტუმრობის მსურველთათვის ყველაზე სასურველ კატეგორიებში, რომლებიც მოიცავს ღირსშესანიშნაობებს, გასტრონომიულ კულტურასა და ღონისძიებებს.

• ღირსშესანიშნაობები Airbnb‑ს სტილში — მოგზაურთა 75%‑ზე მეტი ღირსშესანიშნაობებს სტუმრობს ახალი ქალაქის მონახულებისას.⁸ ამიერიდან მათ საშუალება აქვთ, მსოფლიოს ყველაზე ცნობილი ადგილები დაათვალიერონ იმ ადგილობრივ ექსპერტებთან ერთად, რომლებმაც მათ შესახებ ყველაფერი იციან. სტუმრობის მსურველთათვის ახლა ხელმისაწვდომია 3000‑ზე მეტი შთაბეჭდილება ღირსშესანიშნაობების თემაზე, რომელთა ფარგლებშიც შესაძლებელია ლონდონის ტაუერის, ტოკიოს ზეციური ხის, თაჯ‑მაჰალისა და სხვა ადგილების სიღრმისეულად გაცნობა.
• გასტრონომიული კულტურა — სტუმრობის მსურველთათვის შეთავაზებულია 2500‑ზე მეტი შთაბეჭდილება, რომლებიც საშუალებას აძლევს მათ, შეიხედონ შეფმზარეულების საქმიანობის კულისებში, ეწვიონ ადგილობრივ ბაზრებს და ეზიარონ გასტრონომიას, რომელიც ამა თუ იმ ადგილს კოლორიტს სძენს. მაგალითად, Chef's Table‑სა და Grand Central Market‑თან თანამშრომლობის წყალობით, სტუმრობის მსურველებს ამიერიდან საშუალება აქვთ, მიშლენის ვარსკვლავის მქონე რომაული რესტორნის, Pascucci al Porticciolo‑ის, შეფმზარეულთან, ჯანფრანკო პასკუჩისთან, ერთად დაესწრონ 6‑კერძიან ვახშამსა და მასთან ღვინის შეხამების პროცესს, ან მოამზადონ კოქტეილები პარიზში, De Vie‑ში, მსოფლიოს ერთ‑ერთ საუკეთესო ბარში.
• 2026 წლის FIFA‑ს მსოფლიო საფეხბურთო ჩემპიონატი — ჩვენს პლატფორმაზე წარმოდგენილია განუმეორებელი შთაბეჭდილებები FIFA‑ს მსოფლიო საფეხბურთო ჩემპიონატის თემაზე, რომელთა მიღებაც 6 მასპინძელ ქალაშია შესაძლებელი. შეუერთდით მსოფლიო ჩემპიონებს, ები ვამბახსა და ჯული ფაუდის, ლოს‑ანჯელესში და მათთან ერთად, მყუდრო გარემოში უყურეთ აშშ‑ის მატჩს ავსტრალიის წინააღმდეგ. თუ ვარჯიში გირჩევნიათ, ფეხბურთის არგენტინელ ლეგენდასთან და „ინტერ მაიამის“ ყოფილი მენეჯერ ხავიერ მასკერანოსთან ერთად, შეგიძლიათ მოედანზე გასვლა.

ზოგიერთი ტიპის სტუმრობისთვის, მაგალითად, ქალაქში ერთი ღამის გასატარებლად ან ბოლო წუთს დაგეგმილი საქმიანი ვიზიტისთვის, შესაძლოა, სასტუმრო იყოს საუკეთესო არჩევანი. სწორედ ამიტომ, ამ ზაფხულს Airbnb‑ს პლატფორმას მეტი ბუტიკ‑ოტელი და დამოუკიდებელი სასტუმრო დაემატება.

გასაოცარი სასტუმროების პოვნა სტუმრობის მსურველებს ამიერიდან შეეძლებათ მსოფლიოს 20 ყველაზე პოპულარულ ქალაქში, მათ შორის, ნიუ‑იორკში, პარიზში, ლონდონში, მადრიდში, რომსა და სინგაპურში. წლის განმავლობაში ამ სიას სხვა მიმართულებებიც დაემატება. თითოეული სასტუმრო შერჩეულია მისი მდებარეობის, დიზაინისა და სტუმარ‑მასპინძლობის ხარისხის მიხედვით.

• სასტუმროები Airbnb‑ს სტილში — სტუმრობის მსურველებს მსოფლიოს საუკეთესო კუთხეებში მდებარე სასტუმროების პოვნა და დაჯავშნა შეუძლიათ. თითოეული ობიექტი შერჩეულია Airbnb‑ს მიერ და არ მიეკუთვნება სასტუმროთა მსხვილ ქსელებს.
• Airbnb‑ბონუსი სასტუმროების ჯავშნებისთვის — სტუმრებს, რომლებიც კონკრეტულ გამორჩეულ სასტუმროებში გააფორმებენ ჯავშნებს, საშუალება აქვთ, მიიღონ 15%‑მდე ბონუსი, რომლის გამოყენებასაც ისინი შეძლებენ Airbnb‑ს მეშვეობით მომდევნო საცხოვრებლის დაჯავშნისას.⁹ შემოთავაზება უკვე მოქმედებს მსოფლიოს სხვადასხვა დიდ ქალაქში (მალე მათ რიცხვს სხვა ქალაქებიც შეემატება).
• ფასის გათანაბრების გარანტია — თუ სტუმრები კონკრეტულ სასტუმროს სხვაგან უფრო დაბალ ფასად მიაგნებენ, მათ Airbnb‑ბონუსის სახით აუნაზღაურდებათ სხვაობა.¹⁰

ახალი ბუტიკ‑ოტელები, მომსახურებები და შთაბეჭდილებები უკვე ხელმისაწვდომია მსოფლიოს ზოგიერთ ქვეყანაში, ავტომობილების დაქირავების სერვისისა და აპის დამატებითი ფუნქციების ამოქმედება კი ზაფხულის ბოლოსკენ იგეგმება.

¹ ეფუძნება შედარებით ანალიზს, რომელიც 2026 წლის მარტიდან აპრილამდე პერიოდში ჩაატარა წამყვანმა გარე საკონსულტაციო კომპანიამ, და რომლის ფარგლებშიც შედარებული იყო აშშ‑ში მოქმედი 6 მსხვილი სამოგზაურო პლატფორმის მომხმარებელთა მხარდაჭერის სამსახურთა ასისტენტები ხელოვნური ინტელექტის ბაზაზე. შეფასებისას გათვალისწინებული იყო ეფექტურობის მაჩვენებლები მხარდაჭერის ხარისხის, პრობლემების მოგვარების, ამოცანების შესრულებისა და ურთიერთობასთან დაკავშირებული საერთო შთაბეჭდილების კუთხით.

² ეს ფუნქცია მიუწვდომელია კონტინენტურ ჩინეთში.

³ შემოთავაზება ხელმისაწვდომია მხოლოდ აშშ‑ის შერჩეულ ქალაქებში და კრიტერიუმების შესაბამისი შეკვეთებისთვის. მოქმედებს 2026 წლის 30 ივნისამდე ან გამოყენებათა განსაზღვრული რაოდენობის ამოწურვამდე. ამას გარდა, მოქმედებს გარკვეული პირობები და გადასახადები.

⁴ შემოთავაზება ხელმისაწვდომია მხოლოდ ზოგიერთ ქალაქში. არ მოიცავს გადასახადებსა და მოსაკრებლებს. მოქმედებს გარკვეული პირობები.

⁵ შემოთავაზება ხელმისაწვდომია მხოლოდ ზოგიერთ ქალაქში. არ მოიცავს გადასახადებსა და მოსაკრებლებს.

⁶ ეფუძნება Airbnb‑ს მიერ 2024 წლის 25‑30 აპრილის პერიოდში ჩატარებული იმ გამოკითხვის მონაცემებს, რომელშიც მონაწილეობა მიიღო 2752‑მა რესპონდენტმა აშშ‑დან, კანადიდან, გაერთიანებული სამეფოსა და ავსტრალიიდან.

⁷ ეფუძნება Airbnb‑ს მიერ 2025 წლის 13 მაისიდან 2026 წლის 31 მარტამდე პერიოდში საერთაშორისო მასშტაბით შეგროვებულ შიდა მონაცემებს.

⁸ ეფუძნება 2024 წლის IV კვარტალში ჩატარებულ გამოკითხვას, რომელშიც მონაწილეობა მიიღეს მოგზაურებმა აშშ‑დან, კანადიდან, გაერთიანებული სამეფოდან, საფრანგეთიდან, გერმანიიდან, იტალიიდან, ესპანეთიდან, ბრაზილიიდან, მექსიკიდან, ავსტრალიიდან, იაპონიიდან, სამხრეთ კორეასა და ინდოეთიდან.

⁹ 15%‑იან ბონუსთან დაკავშირებული შემოთავაზება ძალაშია 2026 წლის 31 დეკემბრამდე და ეხება კრიტერიუმების შესაბამის სასტუმროებს. ბონუსის გაანგარიშებისას არ იქნება გათვალისწინებული გადასახადები და მოსაკრებლები. ბონუსი ძალაში იქნება ერთი წლის განმავლობაში. ბონუსის მაქსიმალური ოდენობაა 2000 აშშ დოლარი ან მისი ეკვივალენტი ადგილობრივ ვალუტაში. მოქმედებს გარკვეული პირობები და გამონაკლისები.

¹⁰ ვრცელდება მხოლოდ შერჩეულ სასტუმროებზე. მოთხოვნა შესაძლებელია ჯავშნის გაფორმებიდან 24 საათის განმავლობაში. ბონუსის მაქსიმალური ოდენობაა 400 აშშ დოლარი ან მისი ეკვივალენტი ადგილობრივ ვალუტაში. ფასთა შორის სხვაობა გამოითვლება გადასახადებისა და მოსაკრებლების გაუთვალისწინებლად. ბონუსი ძალაში იქნება ერთი წლის განმავლობაში. მოქმედებს გარკვეული პირობები და გამონაკლისები.

მომავალზე ორიენტირებული განცხადებები

წინამდებარე სტატია შეიცავს მომავალზე ორიენტირებულ განცხადებებს 1995 წლის „კერძო ფასიან ქაღალდებთან დაკავშირებული სასამართლო დავების რეფორმის შესახებ აქტის“ ე.წ. „უსაფრთხო ნავსაყუდლის“ დებულებების გაგებით. წინამდებარე სტატიაში მოცემული ყველა განცხადება, ისტორიული ფაქტების გარდა, შეიძლება მიჩნეულ იქნეს მომავალზე ორიენტირებულ განცხადებად, მათ შორის (თუმცა ამით არ შემოიფარგლება) განცხადებები, რომლებიც ეხება პროდუქტების, მომსახურებების, შთაბეჭდილებებისა და სასტუმროებთან დაკავშირებული შემოთავაზებების ხელმისაწვდომობას, ვადებსა და გეოგრაფიულ არეალს; ხელოვნური ინტელექტის ინტეგრაციას, მის შესაძლებლობებსა და წარმადობას; მესამე მხარეებთან ჩვენს პარტნიორობას; ასევე, ჩვენს პრომოშემოთავაზებებს, ფასებსა და მათთან დაკავშირებულ პირობებს.

მომავალზე ორიენტირებული განცხადებები დაკავშირებულია ცნობილ თუ უცნობ რისკებთან, გაურკვევლობებთან, დაშვებებსა და სხვა ფაქტორებთან, რომლებმაც, შესაძლოა, განაპირობოს ფაქტობრივი შედეგების არსებითი სხვაობა წინამდებარე სტატიაში გამოხატულ თუ ნაგულისხმევ მიზნებთან, მათ შორის, პარტნიორთა მომსახურებების პირობებისა თუ ხელმისაწვდომობის ცვლილება; ჩვენი შესაძლებლობა, წარმატებით მოვახდინოთ ხელოვნურ ინტელექტზე დაფუძნებული ტექნოლოგიების ინტეგრაცია და დანერგვა; ასევე, ჩვენი შესაძლებლობა, დაგეგმილ ვადებში გავუშვათ ახალი პროდუქტები, მომსახურებები, შთაბეჭდილებები და ფუნქციები. სხვა მნიშვნელოვანი ფაქტორები მოიცავს (თუმცა ამით არ შემოიფარგლება) პოლიტიკური, საქმიანი და ეკონომიკური პირობების ცვლილებებს, მათ შორის, გეოპოლიტიკური კონფლიქტებით გამოწვეულს; ასევე, სხვა რისკებს, რომლებიც აღწერილია ფასიანი ქაღალდებისა და ბირჟების კომისიაში წარდგენილ ჩვენს დოკუმენტებში, რომლებიც ხელმისაწვდომია ჩვენს ვებსაიტზეც.

მომავალზე ორიენტირებული ყველა განცხადება მართებულია მხოლოდ წინამდებარე სტატიის გამოქვეყნების თარიღის მდგომარეობით და ეფუძნება ამავე თარიღისთვის ჩვენთვის ხელმისაწვდომ ინფორმაციას. ჩვენ ცალსახად ვიხსნით ყოველგვარ ვალდებულებას, განვაახლოთ ან შევასწოროთ წინამდებარე სტატიაში მოცემული ინფორმაცია, კანონით გათვალისწინებული შემთხვევების გარდა.

სტატიაში მოცემული ინფორმაცია, შესაძლოა, შეცვლილიყო მისი გამოქვეყნების შემდეგ.