ფასების დაწესების ხელსაწყოების გამოყენება Airbnb‑ზე

Airbnb‑ზე არსებული ხელსაწყოების გამოყენებით ფასების კორექტირება და კონკურენტუნარიანობის შენარჩუნება მარტივია. ისინი ხელმისაწვდომია კალენდარში.

ფასების დაწესების ხელსაწყოები და ხელმისაწვდომობის პარამეტრები ხშირად ერთობლივად მუშაობს. მაგალითად, თუ ერთ თვეზე ფასდაკლების დაწესება გსურთ, შედარებით ხანგრძლივი სტუმრობების დაშვება დაგჭირდებათ.

ფასის რეგულარული გადახედვა და კორექტირება დაგეხმარებათ როგორც კონკურენტუნარიანობის შენარჩუნებაში, ისე მასპინძლობის კუთხით დასახული მიზნების მიღწევაში. თითოეული ფასის ჩასწორებისას გაითვალისწინეთ რეკომენდებული ფასები Airbnb‑ზე.

• საბაზისო ფასი: ეს იქნება ნაგულისხმევი ფასი ყველა ღამისთვის თქვენს კალენდარში. მის შესაცვლელად გადადით ფასების პარამეტრებზე. სურვილისამებრ, შეგიძლიათ მსგავსი განცხადებების შედარება, რომ გაეცნოთ დაჯავშნილი და დაუჯავშნელი საცხოვრებლების საშუალო ფასებს თქვენი რეგიონის რუკაზე.
• შაბათ‑კვირების ფასი: პარასკევისა და შაბათის ღამეებისთვის შეგიძლიათ ფასნამატი განსაზღვროთ. ის საბაზისო ფასს დაემატება. ღამეების მიხედვით ფასის ცვლა მაქსიმალურად მეტი ჯავშნის მიღებაში შეგიწყობთ ხელს.
• ინდივიდუალური ფასი: ფასის ჩასასწორებლად აირჩიეთ ერთი ან რამდენიმე ღამე კალენდარში. თითოეული ღამისთვის მითითებული ინდივიდუალური ფასის ქვემოთ, შესაძლოა, ნაჩვენები იყოს რეკომენდებული ფასები. მათი ჩვენება ან დამალვა შესაძლებელია კალენდრის ზემოთ მოცემულ ჯადოსნური ჯოხის ხატულაზე შეხებით.

ფასები ავტომატურად რომ განისაზღვროს, ჩართეთ გონივრული ფასწარმოქმნა. ერთ ღამეზე ფასის დასაწესებლად ეს ხელსაწყო ითვალისწინებს მდებარეობას, საყოფაცხოვრებო პირობებს, თქვენ მიერ ადრე მიღებულ ჯავშნებს, უახლეს ფასებს თქვენს რეგიონში და სხვა ფაქტორებს. ფასთა დიაპაზონს თავად უთითებთ, საჭიროებისამებრ კი ფუნქციის მხოლოდ კონკრეტული თარიღებისთვის გააქტიურება/გათიშვა შეგიძლიათ. გონივრული ფასწარმოქმნის გამოყენების შემთხვევაში ნაჩვენები არ იქნება რეკომენდებული ფასები თუ მსგავსი განცხადებები.

პრომოაქციებისა თუ ფასდაკლებების მეშვეობით შესაძლებელია განცხადების პოზიციის გაუმჯობესება ძიების შედეგებში და სტუმრობის მსურველთა ყურადღების მიქცევა. ფასების პარამეტრებიდან ხელმისაწვდომია 4 ფასდაკლება.

• ერთ კვირაზე: კალენდარი უფრო სწრაფად რომ შეგევსოთ და სტუმრების ხშირი ცვლით გამოწვეული საზრუნავიც შეამციროთ, დააწესეთ ფასდაკლებები მინიმუმ 7 ღამის ხანგრძლივობის ჯავშნებზე.
• ერთ თვეზე: მინიმუმ 28 ღამის ხანგრძლივობის ჯავშნებზე ფასდაკლების შეთავაზება დაგეხმარებათ თქვენ მიერ განთავსებულ საცხოვრებლებში სტუმრობის საშუალო ხანგრძლივობის გაზრდაში (რაც, თავის მხრივ, თავიდან აგაცილებთ საცხოვრებლის ხშირი მომზადების საჭიროებას).
• ადრეული: გსურთ, დააინტერესოთ სტუმრობის მსურველები, რომლებიც ყველაფერს წინასწარ გეგმავენ? შეამცირეთ ფასი ჯავშნებისთვის, რომლებიც გაფორმდება დაბინავებამდე 1‑24 თვით ადრე.
• ბოლო წუთის: შეამცირეთ ფასი ჯავშნებისთვის, რომლებიც გაფორმდება დაბინავების დაგეგმილ თარიღამდე 1-დან 28 დღემდე პერიოდში. ეს დაგეხმარებათ კალენდრის შევსებაში.

ფასდაკლებები შეგიძლიათ დააწესოთ კონკრეტული თარიღებისთვის. აირჩიეთ სასურველი თარიღები კალენდარში, რომ გახსნათ ინდივიდუალური პარამეტრები და დაამატოთ ფასდაკლება შესაბამის დღეებში.

საცხოვრებლის მინიმუმ ერთი კვირით ან თვით დაჯავშნაზე 10%‑იანი ან უფრო მაღალი ფასდაკლებების შემთხვევაში განცხადების გვერდსა და ძიების შედეგებში განთავსდება სპეციალური აღნიშვნა. ფასდაკლებული ფასი მითითებული იქნება გადახაზული თავდაპირველი ფასის გვერდით.

საბაზისო ფასის შეცვლის გარეშე მეტი ჯავშნის მიღების კიდევ ერთი ხერხია პრომოაქციების დაწესება მოკლევადიან სტუმრობებზე. კრიტერიუმებთან შესაბამისობის მიხედვით, თქვენთვის, შესაძლოა, დასაწესებლად ხელმისაწვდომი იყოს ერთი ან ორი ტიპის პრომოაქცია.

• პრომოაქცია „ახალი განცხადება“: დააწესეთ 20%‑იანი ფასდაკლება პირველ სამ ჯავშანზე, სტუმრობის მსურველები რომ დააინტერესოთ და მიმოხილვები უფრო სწრაფად მიიღოთ.
• ინდივიდუალური პრომოაქცია: აირჩიეთ თარიღები და ფასდაკლება, რომლის შეთავაზებაც გსურთ. მოქმედებს გარკვეული მოთხოვნები.

თუ დააწესებთ პრომოაქციას „ახალი განცხადება“ ან მინიმუმ 15%‑იან ინდივიდუალურ პრომოაქციას, განცხადების გვერდსა და ძიების შედეგებში განთავსდება სპეციალური აღნიშვნა.

ფასს შეგიძლიათ დაურთოთ სამი ტიპის გადასახადი. გაითვალისწინეთ, რომ გადასახადები ზრდის ჯამურ ფასს. თუ ჯამური ფასი ზედმეტად მაღალი აღმოჩნდება, სტუმრობის ზოგიერთმა მსურველმა, შესაძლოა, გადაიფიქროს ჯავშნის გაფორმება, რა შემთხვევაშიც ნაკლებ შემოსავალს მიიღებთ.

• დასუფთავების გადასახადი: შეგიძლიათ დააწესოთ ორი ტიპის გადასახადი: მოკლევადიანი (1 ან 2 ღამით) სტუმრობისთვის და სტანდარტული.
• შინაური ცხოველების გადასახადი: ამ გადასახადის დაწესება შეგიძლიათ თითო შინაურ ცხოველზე, ერთ ღამეზე ან ერთ სტუმრობაზე. ადაპტირებულობასთან დაკავშირებით Airbnb‑ზე მოქმედი წესები კრძალავს დამხმარე ცხოველზე გადასახადის დაწესებას.
• დამატებითი სტუმრის გადასახადი: სურვილისამებრ, შეგიძლიათ დააწესოთ გადასახადი თითო ღამეზე ყოველი დამატებითი სტუმრისთვის, როცა თქვენ მიერ მითითებული რაოდენობა უკვე მიღწეულია. მაგალითად, თუ ერთი ღამის საბაზისო ფასი ექვსი სტუმრის გათვალისწინებით გაქვთ დადგენილი, ყოველ დამატებით სტუმარზე (საცხოვრებელში მათი მაქსიმალური რაოდენობის მიღწევამდე) შეგიძლიათ პლუს 10 აშშ დოლარი განსაზღვროთ.

ფასის დაწესებისას მხედველობიდან არ გამოგრჩეთ კომუნალური, საკურორტო თუ ადგილზე გადასახდელი სხვა გადასახადები, რომლებიც ჯამურ ფასზე იმოქმედებს.

ფასებსა და სხვა პარამეტრებს ყოველთვის თავად აკონტროლებთ. თქვენი შედეგები, შესაძლოა, განსხვავდებოდეს სხვა მასპინძლების შედეგებისგან.

სტატიაში მოცემული ინფორმაცია, შესაძლოა, შეცვლილიყო მისი გამოქვეყნების შემდეგ.