მეტი შემოსავლის მიღება გაზრდილი მოთხოვნის დროს

საცხოვრებელზე მოთხოვნა ზოგჯერ მნიშვნელოვნად იზრდება — მაგალითად, დღესასწაულებისა თუ მასშტაბური ღონისძიებების პერიოდებში, ანდა წელიწადის კონკრეტულ დროს. აღნიშნულ პერიოდებში მაქსიმალური სარგებელი მიიღოთ, Airbnb სხვადასხვა ხელსაწყოს გთავაზობთ. გიზიარებთ რამდენიმე რჩევას მათ გამოყენებასთან დაკავშირებით.

სეზონისთვის მზად რომ იყოთ, პირველ რიგში, განბლოკეთ მეტი ღამე კალენდარში. ამგვარად, განცხადება ძიების მეტ შედეგში მოხვდება, რაც საბოლოოდ მეტი შემოსავლის მიღებაში დაგეხმარებათ.

გადადით თქვენი განცხადების კალენდარზე და მოძებნეთ დაბლოკილი ღამეები, რომლებიც განაცრისფრებულია. განბლოკეთ ისინი, თუ შესაბამის ღამეებში მასპინძლობას ახერხებთ.

დასაჯავშნად ხელმისაწვდომი პერიოდის გახანგრძლივება სტუმრობის მსურველებს ჯავშნების კიდევ უფრო ადრე გაფორმების საშუალებას მისცემს. ეს სტრატეგია განსაკუთრებით ამართლებს იქ, სადაც მოთხოვნის ზრდა პროგნოზირებადია (მაგალითად, ყოველწლიური მასშტაბური ღონისძიებების პერიოდებისა ან ზამთრისა თუ ზაფხულის სეზონების შემთხვევაში).

კალენდარში ყოველდღიურად ერთი თარიღი განიბლოკება, არჩეული ხელმისაწვდომი პერიოდის მიხედვით. თუ, ვთქვათ, დასაჯავშნად ხელმისაწვდომ პერიოდად 12 თვეს განსაზღვრავთ, სტუმრობის მსურველები შეძლებენ ნებისმიერი პერიოდის დაჯავშნას მომავალი წლის დღეის სწორი თარიღის ჩათვლით, ხვალ კი ხვალის სწორი თარიღი გახდება დასაჯავშნად ხელმისაწვდომი ავტომატურად.

გაზრდილი მოთხოვნის სეზონებზე კონკურენტუნარიანობა რომ შეინარჩუნოთ, შეამოწმეთ თქვენ მახლობლად განთავსებული მსგავსი საცხოვრებლების ფასები. მსგავსი საცხოვრებლების შესადარებლად გადადით თქვენი განცხადების კალენდარზე და აირჩიეთ თარიღთა დიაპაზონი 31 დღის ფარგლებში.

ამის შემდეგ გამოჩნდება თქვენი რეგიონის რუკა, რომელზეც მითითებული იქნება მსგავსი საცხოვრებლების საშუალო ფასები. საცხოვრებელი ობიექტების მსგავსებას განაპირობებს სხვადასხვა ფაქტორი — მაგალითად, მდებარეობა, ფართობი, თავისებურებები, საყოფაცხოვრებო პირობები, შეფასებები, მიმოხილვები და ის, თუ სხვა რომელ ვარიანტებს ეცნობიან სტუმრობის მსურველები თქვენი განცხადების პარალელურად.

ძიების შედეგებში უფრო მაღალ პოზიციებზე ხვდება ხოლმე განცხადებები იმ საცხოვრებლების შესახებ, რომელთა ფასიც მსგავსი ახლომდებარე ვარიანტებისაზე დაბალია.

თუ ყოველ ღამეზე ერთი და იგივე ფასი გაქვთ განსაზღვრული, შეგიძლიათ განასხვაოთ სამუშაო დღეებისა და შაბათ‑კვირების ფასები მოთხოვნის ცვალებადობის შესაბამისად. დინამიკური ფასდადება მაქსიმალურად მეტი ჯავშნის მიღებაშიც შეგიწყობთ ხელს.

სტუმრობის მსურველთა ყურადღების მიქცევის კიდევ ერთი კარგი ხერხი ფასდაკლებების შეთავაზებაა. მათი განსხვავებული ინტერესების გასათვალისწინებლად შეგიძლიათ დააწესოთ:

• ფასდაკლებები ერთ კვირასა და თვეზე. ერთ კვირაზე დაწესებული ფასდაკლებები ვრცელდება მინიმუმ 7 ღამის ხანგრძლივობის ჯავშნებზე, ხოლო ერთ თვეზე — მინიმუმ 28 ღამისაზე. აღნიშნული, შესაძლოა, დაგეხმაროთ თქვენ მიერ განთავსებულ საცხოვრებლებში სტუმრობის საშუალო ხანგრძლივობის გაზრდაში (რაც, თავის მხრივ, თავიდან აგაცილებთ საცხოვრებლის ხშირი მომზადების საჭიროებას).
• ფასდაკლება ადრეულ დაჯავშნაზე. ის გავრცელდება დაბინავებამდე 1‑24 თვით ადრე გაფორმებულ ჯავშნებზე და დაგეხმარებათ, მაქსიმალურად მეტი ჯავშანი მიიღოთ მომავალი სეზონებისთვის.
• ბოლო წუთის ფასდაკლებები: დაბინავების თარიღის მოახლოების პარალელურად ერთი ღამის ფასის შემცირება სტუმრობის იმ მსურველთა დაინტერესებაში დაგეხმარებათ, რომლებიც გადაწყვეტილებას უეცრად იღებენ. დაბინავებამდე 1‑28 დღით ადრე გაფორმებულ ჯავშნებზე ფასდაკლების დაწესება ხელს შეგიწყობთ კალენდრის შევსებასა და მეტი შემოსავლის მიღებაში.

ერთ კვირაზე, თვეზე ან ბოლო წუთის მინიმუმ 10%‑იანი და ადრეულ დაჯავშნაზე მინიმუმ 3%‑იანი ფასდაკლებების შემთხვევაში განცხადების გვერდსა და ძიების შედეგებში განთავსდება სპეციალური აღნიშვნა. ფასდაკლებული ფასი მითითებული იქნება გადახაზული თავდაპირველი ფასის გვერდით.

გაითვალისწინეთ, რომ ფასდაკლება ადრეულ დაჯავშნაზე მიუწვდომელია, როცა ჩართულია გონივრული ფასწარმოქმნა, ხოლო ფასდაკლება გრძელვადიან ჯავშნებზე ადგილობრივი წესებისა და რეგულაციების შესაბამისად უნდა განსაზღვროთ.

ხარისხიანი ფოტოები ყურადღებას იქცევს, რეალისტურ მოლოდინს ქმნის და სტუმრობის მსურველებს ეჭვებს უქარწყლებს. გაზრდილი მოთხოვნის სეზონებს მომზადებული რომ შეხვდეთ, გირჩევთ, განაახლოთ საცხოვრებლის ფოტოები.

• დაგეგმეთ კადრები. დაფიქრდით, როგორ გადაიღოთ სურათები ისე, რომ საუკეთესოდ წარმოაჩინოთ საცხოვრებლის თავისებურებები, მოთხოვნადი საყოფაცხოვრებო ნივთები და ადაპტირებული პირობები. სხვადასხვა რაკურსით აღბეჭდეთ ფოტოებზე თითოეული ოთახი და სივრცე, რომელიც სტუმრების განკარგულებაში იქნება.
• ატვირთეთ ჰორიზონტალური, მაღალი გარჩევადობის სურათები. ფოტოები უნდა იყოს მინიმუმ 800×1200 პიქსელი. რაც უფრო დიდია ფაილი, მით უკეთესი (მაქსიმუმ 10 მეგაბაიტი).
• დაიხმარეთ პროფესიონალი. დაფიქრდით, ხომ არ გირჩევნიათ პროფესიონალი ფოტოგრაფის დაქირავება. მსოფლიოს ზოგიერთ ქალაქში Airbnb‑ს მეშვეობითაც შესაძლებელია პროფესიონალთან დაკავშირება.
• შექმენით ფოტოტური. Airbnb‑ზე არსებული ხელსაწყო ავტომატურად გადაანაწილებს თქვენ მიერ ატვირთულ ფოტოებს ოთახების მიხედვით, რაც დაეხმარება სტუმრობის მსურველებს, უკეთ წარმოიდგინონ საცხოვრებლის განლაგება. სურვილისამებრ, შეგეძლებათ ფოტოების გადაადგილება, წაშლა და დამატება, ასევე, თითოეული ოთახისთვის დეტალური ინფორმაციის მითითება და ფოტოებისთვის წარწერების დართვა.

საცხოვრებლის დაჯავშნით მეტი მსურველის დაინტერესების კიდევ ერთი ხერხია შესვლისა და გასვლის გამარტივება.

• დაამატეთ დამოუკიდებელი დაბინავების შესაძლებლობა. გონიერი საკეტის, ღილაკებიანი პანელის ან მინისეიფის დამონტაჟების შემთხვევაში სტუმრები კოდის შეყვანით შეძლებენ შესასვლელი კარის გაღებას. მრავალ სტუმარს დამოუკიდებლად დაბინავება ურჩევნია და თქვენც დრო დაგეზოგებათ. რომელი მეთოდიც არ უნდა აირჩიოთ, გახსოვდეთ, რომ მთავარია, თითოეული სტუმრობისთვის წვდომის უნიკალური კოდი მოამზადოთ.
• შეადგინეთ საცხოვრებლიდან გასვლის ინსტრუქცია. მოამზადეთ მარტივი და მკაფიო მითითებები — მაგალითად, სად დატოვონ სტუმრებმა გასაღებები და რა უნდა გამოირთოს საცხოვრებლიდან წასვლისას.

„მნიშვნელოვანია, რომ სტუმრები არ გადაიტვირთონ — წასვლამდე შესასრულებელი ამოცანების გრძელი სია არ უნდა იყოს მათი ბოლო მოგონება“, — გვიზიარებს კეიტი, მრჩეველ მასპინძელთა საბჭოს წევრი და სუპერმასპინძელი პალმ‑სპრინგზიდან (კალიფორნია, აშშ), და დასძენს: „შესაძლოა, 5‑ვარსკვლავიანი მიმოხილვაც კი მიიღოთ საცხოვრებლიდან გასვლის მოკლე ინსტრუქციის დამსახურებით“.

მსოფლიო მასშტაბით მასპინძელთა ასობით კლუბია, რომლებშიც Airbnb‑თი მოსარგებლე მასპინძლები ურთიერთობენ და ერთმანეთისგან რაღაც ახალს სწავლობენ. ჩვენი დაკვირვებით, ადგილობრივ კლუბებში გაწევრიანებული მასპინძლები ორჯერ მეტ შემოსავალს იღებენ დანარჩენებთან შედარებით,* სუპერმასპინძლის სტატუსის მოპოვების ალბათობა კი მათ შემთხვევაში დაახლოებით სამჯერ დიდია.**

კლუბებში აქტიურად მიმდინარეობს, მაგალითად:

• რჩევების გაცვლა მასპინძლობით მეტი შემოსავლის მიღების ხერხებთან დაკავშირებით;
• მოკლევადიან გაქირავებასთან დაკავშირებული რეგულაციების განხილვა;
• საიმედო დამლაგებლების, სანტექნიკოსებისა და სხვა ადგილობრივი სპეციალისტების შესახებ ინფორმაციის გაზიარება;
• სხვადასხვა ჯგუფური ღონისძიების ორგანიზება.

* ეფუძნება 2022 წლის სექტემბრიდან 2023 წლის სექტემბრამდე Airbnb‑ს მიერ შეგროვებულ შიდა მონაცემებს. საერთაშორისო მასშტაბით შედარებული იყო Airbnb‑ზე მასპინძელთა კლუბების წევრებისა და ერთობლივად ყველა მასპინძლის საშუალო შემოსავალი და საშუალო შეფასებები. შემოსავალთან დაკავშირებული მონაცემები განსხვავდება მდებარეობის, სეზონისა და საცხოვრებლის ტიპის მიხედვით.

** ეფუძნება შიდა მონაცემებს, რომლებიც Airbnb‑მ შეაგროვა 2023 წლის ივლისიდან 2024 წლის ივლისამდე პერიოდში გაწევრიანებული მასპინძლების მიერ სუპერმასპინძლის სტატუსის მოპოვებასთან დაკავშირებით.

ფასებსა და სხვა პარამეტრებს ყოველთვის თავად აკონტროლებთ. თქვენი შედეგები, შესაძლოა, განსხვავდებოდეს სხვა მასპინძლების შედეგებისგან.

ინტერვიუებში მონაწილეობისთვის მასპინძლებმა კომპენსაცია მიიღეს.

მასპინძლობასთან დაკავშირებული რჩევები ექვემდებარება ადგილობრივ კანონმდებლობას.

სტატიაში მოცემული ინფორმაცია, შესაძლოა, შეცვლილიყო მისი გამოქვეყნების შემდეგ.