შესვლისა და გასვლის გამარტივება

საცხოვრებელში შესვლა და საცხოვრებლიდან გასვლა მნიშვნელოვანი მომენტებია, რომლებსაც ერთნაირი წარმატებით შეუძლია როგორც 5‑ვარსკვლავიანი სტუმრობის განპირობება, ისე ყველაფრის გაფუჭება. სტუმრები მოელიან, რომ ისინი მარტივად მოხვდებიან საცხოვრებელში, სტუმრობისას თავს შინაურულად იგრძნობენ, შემდეგ კი ზედმეტი ძალისხმევის გარეშე გაიხურავენ კარს.

სტუმრებს აინტერესებთ, როგორ მიაგნონ საცხოვრებელს და როგორ გახსნან მისი შესასვლელი კარი, როცა ადგილზე მივლენ. დაფიქრდით, რა ხერხით ჯობს მათთვის დაბინავების პროცესის გამარტივება:

• შეიტანეთ ცვლილებები საცხოვრებელში. დაფიქრდით, რა გაამარტივებს დაბინავებას. მაგალითად, გონიერი საკეტი, გარე განათება ან მანიშნებლები.

• მიუთითეთ მაქსიმალურად მეტი დეტალი. გადადით განცხადების დაბინავების გზამკვლევზე, შემდეგ კი დაამატეთ ან ჩაასწორეთ დაბინავების მეთოდი და დრო, საცხოვრებლამდე მისასვლელი გზა, სტუმრის ცნობარი, Wi‑Fi ქსელის პაროლი და სხვა ცნობები. აღნიშნულ ინფორმაციას სტუმრები ჯავშნის გაფორმების შემდეგ მიიღებენ.
• იზრუნეთ საცხოვრებელში მოხვედრის პროცესის დემონსტრირებაზე. მოამზადეთ სხვადასხვა ეტაპის ამსახველი ფოტოები ან ვიდეორგოლები, სტუმრებს დაბინავებაში რომ დაეხმაროთ. მაგალითად, შეგიძლიათ გადაუღოთ ფოტო ურდულს, რომლითაც ჭიშკარი იღება.
• გადახედეთ თქვენს გზამკვლევს. შეეხეთ ჩვენების ღილაკს, რომ დაბინავების შესახებ ინფორმაცია ზუსტად ისე იხილოთ, როგორც მას სტუმრები დაინახავენ. სთხოვეთ მეგობარს, იხელმძღვანელოს თქვენ მიერ მომზადებული მითითებებით, შემდეგ კი, საჭიროებისამებრ, შეიტანეთ ცვლილებები, დაბინავება მაქსიმალურად რომ გაამარტივოთ.

სტუმრებმა, შესაძლოა, დაბინავებასთან დაკავშირებული შეკითხვებით მოგმართონ. უპასუხეთ მათ შეძლებისდაგვარად მალე — განსაკუთრებით მაშინ, როცა დაბინავებამდე 24 საათზე ნაკლებია დარჩენილი.

ის, თუ როგორ დახვდებით სტუმრებს და რამდენად მიიღებთ მხედველობაში მათ საჭიროებებს, დიდწილად განაპირობებს სტუმარ‑მასპინძლობის ხარისხს. ერთი შეხედვით უმნიშვნელო დეტალების გათვალისწინებასაც კი, შესაძლოა, დიდი მნიშვნელობა ჰქონდეს სტუმრებისთვის.

• დაგეგმეთ მისასალმებელი შეტყობინების გაგზავნა. დაბინავების დღესვე შეატყობინეთ სტუმრებს, რომ ხელმისაწვდომი იქნებით, თუ მათ რაიმე დასჭირდებათ.

• დაიცავით ინკლუზიური სტუმარ‑მასპინძლობის პრინციპები. გახსოვდეთ, რომ სტუმრები, შესაძლოა, არ იზიარებდნენ თქვენს მსოფლმხედველობასა თუ წეს‑ჩვეულებებს.

• იყავით ყურადღებიანი. მოიკითხეთ ხოლმე სტუმრები, გაითვალისწინეთ მათი საჭიროებები და პატივი ეცით მათ პირად სივრცეს.

რიე, მრჩეველ მასპინძელთა საბჭოს წევრი და სუპერმასპინძელი იომიტანიდან (იაპონია), სტუმრებს ახვედრებს ხოლმე მისასალმებელ წერილს სასარგებლო ადგილობრივი ინფორმაციით. „თუ, მაგალითად, მცირეწლოვან ბავშვთან ერთად ჩამოდიან, კარგ მაღაზიას ვურჩევ ბავშვთა ჰიგიენური საფენების საყიდლად“, — გვიზიარებს ის და დასძენს: „თუ ძაღლთან ერთად იქნებიან, ამ შემთხვევისთვისაც ვიცი ერთი ზოომაღაზია, რომელშიც ხარისხიანი საკვები იყიდება“.

ჩათვალეთ, რომ ის, რაც საცხოვრებლიდან გასვლისას ხდება, ბოლო შთაბეჭდილებას ტოვებს სტუმრობის შესახებ. სასურველია, რომ ეს შთაბეჭდილება არაფერმა გააფუჭოს.

დაბინავების გზამკვლევიდან სტუმრებს შეგიძლიათ მოუმზადოთ მარტივი და მკაფიო მითითებები საცხოვრებლიდან გასვლასთან დაკავშირებით. დაფიქრდით, მიიჩნევენ თუ არა სტუმრები საცხოვრებლიდან გასვლისას შესასრულებელ ზოგიერთ ამოცანას (მაგალითად, ნაგვის უპირობოდ გატანას ან გამოყენებული პირსახოცების ერთ ადგილას შეგროვებას) 5‑ვარსკვლავიანი სტუმრობისთვის აუცილებელ კომპონენტებად. უკეთესი მიმოხილვები რომ მიიღოთ, ზოგჯერ აჯობებს, მსგავს საკითხებს თავად მიხედოთ დასუფთავების პროცედურის ფარგლებში.

გაუგზავნეთ სტუმრებს სამადლობელი შეტყობინება ყოველი სტუმრობის დასრულების შემდეგ. შესთავაზეთ მათ, კვლავ გეწვიონ და აცნობეთ, რომ მათი გამოხმაურება თქვენთვის მნიშვნელოვანია. ჰკითხეთ, რა ესიამოვნებოდათ მათ მომდევნო სტუმრობისას.

სტატიაში მოცემული ინფორმაცია, შესაძლოა, შეცვლილიყო მისი გამოქვეყნების შემდეგ.