განცხადების გამორჩეულად ქცევა

თქვენი განცხადება სტუმრობის მსურველთა ძიების შედეგებში უფრო შესამჩნევი რომ იყოს, დაამატეთ მას შესანიშნავი ფოტოები და აღნიშნეთ ყველა პოპულარული საყოფაცხოვრებო პირობა, რომელიც უკვე არის საცხოვრებელში. ამით სტუმრობის მსურველები უფრო მარტივად გადაწყვეტენ, რამდენად შეესაბამება საცხოვრებელი თავიანთ საჭიროებებს.

ფოტოები განცხადების ერთ‑ერთი ყველაზე მნიშვნელოვანი კომპონენტია. ისინი დაგეხმარებათ სტუმრების ყურადღების მიქცევასა და მეტი ჯავშნის მიღებაში.

• საუკეთესოდ წარმოაჩინეთ საცხოვრებელი. შეარჩიეთ დრო, როცა ოთახები ყველაზე მეტად ივსება ბუნებრივი განათებით, გაწიეთ ფარდები და მოაწესრიგეთ იქაურობა.
• შექმენით კომპოზიცია. შეეცადეთ, იქონიოთ როგორც ფართო, ისე ახლო ხედით გადაღებული ფოტოები, რომლებზეც ობიექტი კადრის ცენტრშია მოქცეული. გადაიღეთ ფოტოები თვალის დონეზე, კამერის ზემოთ თუ ქვემოთ დახრის გარეშე.
• მოამზადეთ ფოტოტური. გადაუღეთ ფოტოები ყველა სივრცეს, რომელიც ხელმისაწვდომია სტუმრებისთვის. Airbnb გთავაზობთ ხელოვნურ ინტელექტზე დაფუძნებულ ფუნქციას, რომელიც მყისიერად დაალაგებს თქვენ მიერ გადაღებულ ფოტოებს ოთახების მიხედვით, რაც სტუმრობის მსურველებს საცხოვრებლის განლაგების უკეთ აღქმაში დაეხმარება.

სურვილისამებრ, შეგიძლიათ გაეცნოთ მეტ რჩევას საცხოვრებლის შესანიშნავი ფოტოების გადაღებასთან დაკავშირებით, ასევე, შეიტყოთ, როგორ ისარგებლოთ პროფესიონალი ფოტოგრაფის მომსახურებით.

განცხადების შექმნის პროცესში პოპულარული საყოფაცხოვრებო პირობების მოკლე სიიდან გთხოვთ არჩევანის გაკეთებას, თუმცა მისი გამოქვეყნების შემდეგ საშუალება გაქვთ, აირჩიოთ დანარჩენებიც (სრული სია დაახლოებით 150 ერთეულისგან შედგება).

კონკრეტული საყოფაცხოვრებო პირობებისა და მახასიათებლების მქონე საცხოვრებლების საპოვნელად სტუმრობის მრავალი მსურველი საძიებო ფილტრებს იყენებს. რაც უფრო სრული ჩამონათვალი გექნებათ ამ კუთხით, მით უფრო მეტი ადამიანის ძიების შედეგებში მოხვდება თქვენი განცხადება და მათ სათანადო მოლოდინს შეუქმნის.

პოპულარული საყოფაცხოვრებო პირობები, რომლებსაც სტუმრობის მსურველები Airbnb‑ს მეშვეობით მუდმივად ეძებენ, შემდეგია:

• Wi‑Fi კავშირი
• აუზი
• ჯაკუზი
• სამზარეულო
• სატელევიზიო ან საკაბელო მაუწყებლობა
• კონდიციონერი
• სარეცხი მანქანა და საშრობი
• უფასო საპარკინგე ადგილი
• დამოუკიდებლად დაბინავების შესაძლებლობა

შეეცადეთ, სათაურსა და აღწერილობაში წარმოაჩინოთ საცხოვრებლის განსაკუთრებულობა.

• შეამოკლეთ სათაური. მაგალითად, „თანამედროვე ლოფტი ცენტრის ხედით“ ოთხი მარტივი, მაგრამ ამავდროულად შინაარსიანი, სიტყვისგან შედგება. თუ სათაურში იყენებთ დამწერლობას, რომელშიც მთავრული ასოები გამოიყენება, მთავრული უნდა იყოს მხოლოდ პირველი სიტყვის პირველი ასო და საკუთარი სახელები. ნუ გამოიყენებთ ემოჯიებს, სპეციალურ სიმბოლოებსა თუ მხოლოდ მთავრულ ასოებს.
• ყურადღება გაამახვილეთ განსაკუთრებულ მახასიათებლებზე. სათაურში შეგიძლიათ აღნიშნოთ მდებარეობა ან გამორჩეული საყოფაცხოვრებო პირობა (მაგალითად, „ხის მყუდრო სახლი დიდი სამზარეულოთი“).
• მოერიდეთ შაბლონურ ტექსტებს. მოჰყევით საცხოვრებლისა და მასში სტუმრობის შესახებ მარტივი ენით; ისე, როგორც მეგობარს ეტყოდით. აღნიშნეთ ნებისმიერი დეტალი, რომელიც განსაკუთრებით მოგწონთ.

Airbnb‑ზე მოქმედებს ძირითადი წესები, რომლებიც სტუმრობის ყველა მსურველმა უნდა დაიცვას. ისინი მოკლე და მკაფიოა: სტუმრები თქვენ მიერ განთავსებულ საცხოვრებელს საკუთარივით უნდა გაუფრთხილდნენ. ამას გარდა, სტუმრობის მსურველები თქვენ მიერ შედგენილი სახლის სტანდარტული წესების დაცვასაც უნდა დაეთანხმონ ჯავშნის გაფორმებისას.

სახლის წესებიდან გასაგები უნდა იყოს, რა არის დაშვებული საცხოვრებელში და რა — არა. ამასთან, წესები არ უნდა ეწინააღმდეგებოდეს Airbnb‑ს მომსახურების პირობებსა და ანტიდისკრიმინაციულ პოლიტიკას.

სახლის სტანდარტული წესები Airbnb‑ზე მოიცავს შემდეგ განყოფილებებს:

• შინაური ცხოველები
• ღონისძიებები
• მოწევა, ვეიპინგი და ელექტროსიგარეტები
• სიმშვიდის საათები
• შესვლისა და გასვლის საათები
• სტუმრების მაქსიმალური რაოდენობა
• კომერციული ფოტო‑ და ვიდეოგადაღება

თუ გაქვთ განსაკუთრებული მოთხოვნები, რომლებიც სტანდარტულ ჩამონათვალში არ არის, მათი აღნიშვნა დამატებითი წესების სახით შეგიძლიათ.

სტატიაში მოცემული ინფორმაცია, შესაძლოა, შეცვლილიყო მისი გამოქვეყნების შემდეგ.