საცხოვრებლის მომზადება

ხუთვარსკვლავიანი სტუმრობა წვრილმანებით იწყება. სასიამოვნო და კომფორტული ატმოსფერო შესანიშნავი მიმოხილვების მიღებაში დაგეხმარებათ.

საცხოვრებელში იდეალური სისუფთავის შესანარჩუნებლად წარმატებული მასპინძლები:

• განსაკუთრებულ ყურადღებას აქცევენ სივრცეებს, რომლებიც ხშირად გამოიყენება. ისინი წმენდენ სამუშაო ზედაპირებს, ასუფთავებენ წყალსადინრებს და ავსებენ საპნის ბოთლებს. ასევე, რწმუნდებიან, რომ არსად არ დარჩა თმები.

• აწესრიგებენ თითოეულ ოთახს. ისინი აღებენ ფანჯრებს, მტვერს წმენდენ ზედაპირებს და წმენდენ იატაკს, მათ შორის, ავეჯის ქვეშ. ამას გარდა, საწოლებს ახალ თეთრეულს აკრავენ და თითოეულ სტუმარს სუფთა პირსახოცებს ახვედრებენ.

• ქმნიან საკონტროლო სიას. თითოეული სტუმრის დაბინავებამდე ისინი ასრულებენ ყველა პუნქტს ჩამონათვალიდან, რომ არაფერი გამორჩეთ.

„ჯავშნებს შორის ექვსი საათი მაქვს გამოყოფილი საგულდაგულო დასუფთავებისთვის“, — ამბობს დანიელი, მრჩეველ მასპინძელთა საბჭოს წევრი და სუპერმასპინძელი კანარის კუნძულებიდან (ესპანეთი), და დასძენს: „სტუმრებს საცხოვრებელი ზუსტად ისეთი უნდა დახვდეთ, როგორიც განცხადების ფოტოებშია“.

სტუმრები მოელიან, რომ საცხოვრებელში დახვდებათ პირველადი საჭიროების ნივთები:

• ტუალეტის ქაღალდი
• ხელისა და ტანის საპონი
• თითო პირსახოცი ყოველი სტუმრისთვის
• თითო ბალიში ყოველი სტუმრისთვის
• თეთრეულის თითო კომპლექტი ყოველი საწოლისთვის

სტუმრებმა თავი შინაურულად რომ იგრძნონ, თითოეულ ოთახში უნდა იყოს ყველაფერი აუცილებელი.

სამზარეულო

• სუფრის მოწყობილობა სტუმრების იმ მაქსიმალური რაოდენობისთვის, რომელიც განცხადებაში გაქვთ მითითებული
• ყავის მადუღარა, ჩაიდანი, ქვაბები, ტაფები და სამზარეულოს სხვა ნივთები
• მარილი, წიწაკა და ზეთი
• ჭურჭლის სარეცხი საშუალება, საშრობი და ქსოვილის ან ქაღალდის ხელსახოცები

მისაღები

• დასაჯდომი ადგილები სტუმრების იმ მაქსიმალური რაოდენობისთვის, რომელიც განცხადებაში გაქვთ მითითებული
• ტელევიზორი სტრიმინგის სერვისით
• სტუმრის ცნობარი მოწყობილობების გამოყენების ინსტრუქციით

სააბაზანო

• ხელის პირსახოცები და აბაზანის ხალიჩა
• უნიტაზის ჯაგრისი და ვანტუზი
• შამპუნი, კონდიციონერი და ფენი

საძინებელი

• ფანჯრების მოფარდულობა და საწოლის ტუმბოები სანათებით
• უჯრები ან საკიდები ტანსაცმლისთვის, ასევე, ბარგის შესანახი ადგილი
• დამატებითი საბანი და ვენტილატორი ან გამათბობელი

საცხოვრებლის მომზადების შემდეგ გაატარეთ იქ ერთი ღამე, ან სთხოვეთ მეგობრებს იქ დარჩენა და თავიანთი შთაბეჭდილებების თქვენთვის გაზიარება. ასე სწრაფად გაარკვევთ, სხვა რა გჭირდებათ.

სტუმრებს მოსწონთ, როცა მასპინძლები ყურადღებას აქცევენ დეტალებს და დამატებით ყურადღებას იჩენენ იმისთვის, რომ სტუმრობამ უფრო კომფორტულად ჩაიაროს. ეს გულისხმობს ყურის საცობების, ყურის ჩხირების, სამაგიდო თამაშების, ელკვების ადაპტერებისა თუ საცხოვრებლის მდებარეობის მიხედვით სპეციფიკური ნივთების (მაგალითად, ქოლგების ან პლაჟის პირსახოცების) დახვედრებას.

მრავალი გამოცდილი მასპინძლის თქმით, ისინი:

• უმზადებენ სტუმრებს პატარა საჩუქარს. მაგალითად, ხელით დაწერილ წერილს, კალათას ადგილობრივი პროდუქციით ან სხვა რაიმეს განსაკუთრებული მოვლენის აღსანიშნავად.
• ქმნიან სიმყუდროვეს დეკორის ელემენტების გამოყენებით. დაფიქრდით, თქვენ რა გეხმარებათ დასვენებაში, როცა მოგზაურობთ. ხელოვნების ნამუშევრები, ოთახის მცენარეები და დეკორატიული ბალიშები ოთახებს კომფორტსა და ინდივიდუალურ სტილს სძენს.
• ბეჭდავენ სტუმრის ცნობარს. ცნობარი სტუმრებს ისეთ ადგილას უნდა დაუტოვოთ, სადაც ისინი მას ადვილად იპოვიან, მაგალითად, მაგიდაზე.
• ხაზს უსვამენ განსაკუთრებულ მახასიათებლებს. საცხოვრებლის აღწერილობაში უნდა აღინიშნოს ყველაფერი განსაკუთრებული, რაც კონკრეტული საჭიროებების მქონე სტუმრებს დახვდებათ, მაგალითად, სამუშაო სივრცე ან ადაპტირებული პირობები.

„სტუმრებისთვის მაქვს მანეჟი, სკამ‑მაგიდა, ასევე, წიგნები და სათამაშოები“, — გვიყვება ელსი, მასპინძელი ნეშვილიდან (ტენესი, აშშ).

თუ პირველი ჯავშანი ჯერ არ მიგიღიათ და დამატებითი რჩევები გჭირდებათ, ინდივიდუალური დახმარების მიღება სუპერმასპინძლისგან შეგიძლიათ. სუპერმასპინძლები Airbnb‑ზე ყველაზე მაღალი შეფასების მქონე და გამოცდილი მასპინძლები არიან.

სტატიაში მოცემული ინფორმაცია, შესაძლოა, შეცვლილიყო მისი გამოქვეყნების შემდეგ.