Airbnb‑ზე შთაბეჭდილებების განთავსების მსურველთა მიმართ მოქმედი მოთხოვნები

Airbnb‑შთაბეჭდილებები გულისხმობს აქტივობებს, რომლებსაც თავიანთი ქალაქის მცოდნე ადგილობრივები უძღვებიან. შთაბეჭდილებები მოწმდება ხარისხზე. ამასთან, ყველა მასპინძელი, თანამასპინძელი თუ განცხადება უნდა პასუხობდეს ჩვენს სტანდარტებსა და მოთხოვნებს.

ქვემოთ შეიტყობთ, კონკრეტულად რა დაგვჭირდება თქვენგან, როგორც მასპინძლისგან ან თანამასპინძლისგან.

• ვინაობის დადასტურება: თქვენ უნდა დაადასტუროთ ვინაობა, ზოგიერთ შემთხვევაში კი გაიაროთ სხვა ტიპის შემოწმებები (მაგალითად, ბიოგრაფიული მონაცემების).
• ლიცენზიები და სერტიფიკატები: უნდა გქონდეთ სტუმრებისთვის შეთავაზებული აქტივობის შესაბამისი მოქმედი ლიცენზიები, სერტიფიკატები და დაზღვევა. საჭიროების შემთხვევაში დაგჭირდებათ მათი ქონის დამადასტურებელი დოკუმენტების წარმოდგენა.
• ცოდნა: საჭიროა პროფილური განათლება ან შესაბამისი გამოცდილება: მინიმუმ 5‑წლიანი პრაქტიკული სტაჟი თქვენ მიერ აღნიშნულ სფეროში, პუბლიკაციები პრესაში ან თქვენი პროფესიონალიზმის, ოჯახური ტრადიციებისა თუ თაობიდან თაობაზე გარდამავალი ცოდნის სხვა სახის მტკიცებულებები.
• აქტივობა: სტუმრებისთვის მომზადებული შთაბეჭდილება კავშირში უნდა იყოს იმ ასპექტთან, რომლითაც სახელგანთქმულია ქალაქი, ასევე, ადგილობრივ კულტურასთან, სამზარეულოსთან ან ცალკეულ ადამიანებთან. სტუმრებს უნდა მიეცეთ აქტიური მონაწილეობისა და ერთმანეთთან (მათ შორის, თქვენთან) ურთიერთობის საშუალება.
• ადგილი: მდებარეობად უნდა შეირჩეს უსაფრთხო, სუფთა, კომფორტული და აქტივობის შესაბამისად აღჭურვილი ადგილი.

• ბიზნესსუბიექტის სტატუსით მასპინძლობა: დაადასტურეთ თქვენი თანამშრომლების ვინაობა, შესაბამის შემთხვევებში კი შეამოწმეთ ნასამართლობის არსებობა. დარწმუნდით, რომ ყველას, ვინც ჩართულია ჯავშნების მქონე სტუმრების მასპინძლობაში, აქვს სათანადო დაზღვევა, ლიცენზია, მომზადება, ცოდნა და განათლება.

• სათაური: გაამახვილეთ ყურადღება მთავარ აქტივობაზე. დაიწყეთ სათაურის შედგენა მოქმედებასთან დაკავშირებული ზმნით, რომელიც შეესაბამება იმას, რაც წინ ელით სტუმრებს — მაგალითად, „აღმოაჩინეთ“, „გასინჯეთ“ ან „შეიგრძენით“.
• აღწერილობა: განავრცეთ სათაური ისეთი დეტალების მითითებით, რომლებიც სტუმრობის მსურველს შთაბეჭდილების დაჯავშნის სურვილს გაუჩენს. მაგალითად, მოკლედ მოყევით თქვენსა და იმის შესახებ, თუ რით გამოირჩევა თქვენ მიერ შერჩეული მდებარეობა.
• ფოტოები: უნდა წარმოადგინოთ მინიმუმ 5 მაღალხარისხიანი, ფერადი ფოტო. ატვირთეთ იმდენი ფოტო, რამდენიც საჭიროა, რომ სტუმრებს მკაფიო წარმოდგენა შეექმნათ თქვენ მიერ ორგანიზებული შთაბეჭდილების შესახებ. დაურთეთ ერთი გამორჩეული ფოტო თქვენს გეგმაში გაწერილი თითოეული პუნქტისთვის.
• სტუმრობის გეგმა: მოკლედ მიმოიხილეთ, კონკრეტულად რა ელით წინ სტუმრებს დასაწყისიდან დასასრულამდე, რომ მათ მარტივად გადაწყვიტონ, რამდენად შეესაბამება პროგრამა მათ საჭიროებებს. დაურთეთ მინიმუმ 3 პუნქტი. სტუმრობის გეგმა უნდა მოიცავდეს მხოლოდ ერთ შთაბეჭდილებას.

ახალი განაცხადები და შთაბეჭდილებების შესახებ დამტკიცებულ განცხადებებში შეტანილი ცვლილებები შემოწმებას გადის. თუ მსგავსი აქტივობების შესახებ განცხადებები სხვა პლატფორმებზეც გაქვთ გამოქვეყნებული, გირჩევთ, Airbnb‑შთაბეჭდილებისთვის განსაზღვრულ დროით ინტერვალებში მხოლოდ Airbnb‑თი მოსარგებლე სტუმრებს უმასპინძლოთ.

• ჯავშნები: პატივი ეცით სხვის დროს და შეეცადეთ, არ გააუქმოთ ჯავშნები საფუძვლიანი მიზეზის გარეშე.
• მიმოწერა: ოპერატიულად უპასუხეთ სტუმრებს შეხვედრის დაწყების დრომდე.
• უსაფრთხოება: შეარჩიეთ უსაფრთხო ადგილი, ჩაუტარეთ სტუმრებს ინსტრუქტაჟი და უზრუნველყავით ისინი სათანადო აღჭურვილობით ტრავმების თავიდან ასაცილებლად. შეიმუშავეთ სამოქმედო გეგმა საგანგებო სიტუაციებისთვის.
• შეფასებები: იზრუნეთ სტუმრებისგან მაღალი შეფასებების მიღებაზე.
• განცხადება: განცხადებაში მითითებული ცნობები უნდა იყოს ზუსტი. აღნიშნული მოიცავს როგორც მდებარეობას, ისე დაწყებისა და დასრულების საათებს, ინფორმაციას თანამასპინძლების შესახებ (ასეთების არსებობის შემთხვევაში) და მოთხოვნებს სტუმრების მიმართ (მაგალითად, ასაკობრივ შეზღუდვას ან აქტივობისთვის საჭირო მომზადების დონეს).

შემოწმება მუდმივად მიმდინარეობს. Airbnb ეცნობა სტუმრებისგან მიღებულ გამოხმაურებას, მასპინძლების მხრიდან ჯავშნების გაუქმების შემთხვევებსა და მომხმარებელთა მხარდაჭერის გუნდისთვის შეტყობინებულ პრობლემებს შთაბეჭდილებების უსაფრთხოებასა და ხარისხთან დაკავშირებით. ჩვენი სტანდარტებისა და მოთხოვნების დარღვევის შემთხვევაში, შესაძლოა, ჯერ გაფრთხილებით შემოვიფარგლოთ, შემდეგ კი მოქმედება შევუჩეროთ როგორც განცხადებებს, ისე სამასპინძლო ანგარიშებს, ან წავშალოთ ისინი.

ზემოაღნიშნულის გარდა, უნდა დაიცვათ როგორც Airbnb‑ს მომსახურების პირობები, ისე ძირითადი წესები მასპინძლებისთვის და უსაფრთხოდ მასპინძლობასთან დაკავშირებული მითითებები.

სრულად გაეცანით Airbnb‑ზე წარმოდგენილი შთაბეჭდილებების მიმართ მოქმედ სტანდარტებსა და მოთხოვნებს.

სტატიაში მოცემული ინფორმაცია, შესაძლოა, შეცვლილიყო მისი გამოქვეყნების შემდეგ.