ადაპტირებული პირობების საჭიროების მქონე სტუმრების მასპინძლობა

ჩვენ მუდმივად ვზრუნავთ ადაპტირებული პირობების საჭიროების მქონე სტუმრებზე. საზოგადოების ამ წევრებმა უნდა იცოდნენ, რომ მასპინძლები მათ ზუსტ ინფორმაციას მიაწვდიან ადაპტირებული პირობების შესახებ.

დაშვებულია

• გამონაკლისები დამხმარე ცხოველებთან მიმართებაში, როცა მასპინძლის ჯანმრთელობა ან უსაფრთხოება რისკის ქვეშ დგება: მასპინძელს შეუძლია განთავისუფლდეს დამხმარე ცხოველის განთავსების ვალდებულებისგან, თუ ცხოველი პირდაპირ საფრთხეს უქმნის საცხოვრებლის მუდმივი რეზიდენტის ჯანმრთელობასა და უსაფრთხოებას. მსგავსი გარემოებების შესახებ მასპინძლებმა Airbnb‑ს წინასწარ უნდა შეატყობინონ.
• დამხმარე ცხოველის საცხოვრებლიდან გაძევების მოთხოვნა, თუ სტუმარი მას ვერ აკონტროლებს: მასპინძელს შეუძლია არ დაუშვას საცხოვრებელში დამხმარე ცხოველის ყოფნა, თუ სტუმარი მის ქცევაზე პასუხს ვერ აგებს. მაგალითად, თუ ცხოველს ზედამხედველობის გარეშე ტოვებენ, ან თუ ის ბუნებრივი მოთხოვნილებების დასაკმაყოფილებლად გარეთ გაყვანას არ ითხოვს.

დაუშვებელია

• განთავსებაზე უარის თქმა სტუმრის განსაკუთრებული საჭიროებების გამო: როცა არ მოქმედებს გარკვეული გამონაკლისი, მასპინძლებს ეკრძალებათ ჯავშნის გაფორმებაზე უარის თქმა, ასევე, მისი გაუქმება ან სხვაგვარად შეცვლა მხოლოდ იმ მიზეზით, რომ სტუმარი სარგებლობს დამხმარე ცხოველით ან მოწყობილობით.
• ღირებულების გაზრდა სტუმრის განსაკუთრებული საჭიროებების გამო: მასპინძლებმა არ უნდა დააკისრონ სტუმრებს დამატებითი გადასახადი დამხმარე ცხოველებით ან მოწყობილობებით სარგებლობისთვის.
• განსაკუთრებული საჭიროებების მქონე სტუმრების გონივრული თხოვნების შესრულებაზე უარის თქმა: მასპინძლებმა უნდა შეუსრულონ სტუმრებს გონივრული თხოვნები საცხოვრებელში ადაპტირებული პირობების შექმნასთან დაკავშირებით. გონივრული თხოვნაა, მაგალითად, დივნის გაწევა კარის ღიობიდან, რომ შშმ პირთა ეტლით მოსარგებლე სტუმარი უპრობლემოდ მოხვდეს მისაღებ ოთახში (თუ მასპინძელს ფიზიკურად შეუძლია დივნის გაწევა და ამისთვის საკმარისი ადგილია). ამასთან, არაგონივრულია მასპინძლისთვის კარის ღიობის გაფართოების თხოვნა, რომ მასში შშმ პირთა ეტლი გაეტიოს.
• არათანაბარი მოპყრობა: როცა არ მოქმედებს გარკვეული გამონაკლისი, მასპინძლები ერთნაირად უნდა მოეპყრონ ყველა სტუმარს, მათი განსაკუთრებული საჭიროებების მიუხედავად, და ყველასთვის ერთი და იგივე წესები დაადგინონ.
• დამამცირებელი ლექსიკა: მიუღებელია სტუმრებისა და მასპინძლებისთვის შეურაცხყოფის მიყენება მათი შეზღუდული შესაძლებლობის გამო, მათ შორის, დამხმარე ცხოველებისა თუ მოწყობილობების მიერ გაწეული სამსახურის აგდებულად მოხსენიება და დისკრიმინაციის ნიშნების შემცველი სხვა ლექსიკის გამოყენება.
• ადაპტირებული პირობების შესახებ არასწორი ინფორმაციის მიწოდება: განცხადება უნდა შეიცავდეს ზუსტ ინფორმაციას საცხოვრებელში და მის მიმდებარე ტერიტორიაზე არსებული ადაპტირებული პირობების შესახებ. მასპინძლებმა გულწრფელად და დეტალურად უნდა განიხილონ ადაპტირებულ პირობებთან დაკავშირებული საკითხები სტუმრებთან მიმოწერაში.

ჩვენ მზად ვართ თქვენ დასახმარებლად

ჩვენი წესების დარღვევის შემჩნევის შემთხვევაში შეგვატყობინეთ.